Friday, September 3, 2010

Mama Mpaka asisitiza elimu kwa wapiga kura pasina itikadi za kisiasa

Katibu Tawala Mkoa wa Iringa amekitaka chuo kikuu cha Tumaini Iringa kutoa elimu ya manufaa kwa wapiga kura pasipo kuingiza itikadi zinazolenga upande fulani wa chama chochote cha siasa.


Katibu Tawala Mkoa wa Iringa, Mama Gertrude Mpaka

Kauli hiyo ameitoa wakati akifungua warsha ya siku moja ya elimu ya mpiga kura kwa wilaya ya Iringa iliyofanyika katika ukumbi wa chuo cha ushirika tawi la Iringa.

Katibu Tawala Mkoa wa Iringa, mama Gertrude Mpaka amesema “nawakata mtoe elimu ya manufaa kwa wapiga kura bila kuingiza itikadi zinazoelekea upande fulani wa chana chochote”. Ameongeza kwa kuwataka wafundishe mambo yote kwa mujibu wa mada zilizopitishwa na Tume ya Taifa ya Uchaguzi (NEC) na si vinginevyo.

Mama Mpaka amesisitiza kuwa elimu kwa wapiga kura ni muhimu sana kwa wananchi wote hasa waishio vijijini kwa sababu wananchi wengu wa vijijini hudanganywa wasichiriki katika uchaguzi. Aidha ameongeza kuwa elimu hiyo itawasaidia wananchi wengi kutokushawishiwa kuuza shahada zao za kupigia kura wala kushawishiwa kushiriki kuleta fujo wakati wa kampeni au uchaguzi na kufanya hivyo ni kinyume na sheria.

Katibu Tawala huyo wa mkoa wa Iringa amewataka wananchi wa Mkoa wa Iringa kutunza kadi zao za kupiga kura kama mboni ya jicho. Amesema “kadi hii inakupa utu, inakupa haki ya kumchagua kiongozi, unayemtaka na unayeona anafaa kuwa kiongozi”. Aidha amechukua nafasi hiyo kuwataka wananchi wa Iringa ifikapo tarehe 31 Oktoba, 2010 kwenda kupiga kura.

Amewataka waandaaji wa warsha hiyo kuwaeleza wananchi kuwa kila raia anayo haki ya kuchagua, kuchaguliwa na kusikilizwa anapotoa maoni yake kwa mujibu wa Katiba ya Jamhuri ya Muungano wa Tanzania. Aidha amewataka wananchi kujitokeza kwa wingi katika kampeni kusikiliza sera za wagombea ili kuwa na uelewa mpana wa sera na ilani za wagombea wate wa nafasi za uongozi.

Mama Mpaka amewakumbusha watumishi wa umma kuzingatia Waraka waMkuu wa Utumishi wa Umma Na. 1 wa mwaka 2000 unaohusu maadili ya watumishi wa umma katika mfumo wa vyama vingi vya siasa kuwa unawataka watumishi wa umma kutojihusisha na siasa mahali pa kazi.

Amewataka washiriki wa warsha hiyo kuzingatia mafundisho watakayoyapa na kwenda kuwafundisha wengine kwa usahihi mkubwa bila upotoshaji wa makusudi. Amekumbusha kuwa serikali imekemea vitendo vyovyote vya rushwa wakati wa uchaguzi na kuwataka wawe wasimamiaji wa sera na sheria za taifa zenye kudhibiti vitendo hivyo.

Warsha hiyo imeandaliwa na chuo kikuu cha Tumaini- Iringa baada ya kushinda tenda ya shirika la maendeleo la umoja wa mataifa (UNDP) inayosimamiwa na shirika la DELOITTE. Warsha hiyo inawahusisha maafisa watendaji wa kata za Kalenga, Nzihi, Ulanda, Mseke, Nduli, Nyang’oro na Kihorogota. Wengine ni walimu wa masomo ya uraia na waandishi wa habari kwa uwiano wa kijinsia.


Washiriki wa warsha ya elimu ya mpiga kura wilaya ya Iringa akisikiliza kwa umakini hotuba ya mgeni rasmi mama Gertrude Mpaka katika ukumbi wa chuo cha ushirika Iringa.

Wednesday, September 1, 2010

RAS Iringa awaweka sawa watumishi wake

Wafanyakazi wa Ofisi ya Mkuu wa Mkoa wa Iringa wametakiwa kuchukua tahadhari na jitihada za dhidi ya majanga ya moto yanayoweza kujitokeza katika ofisi hiyo.
Katibu Tawala Mkoa wa Iringa, Gertrude Mpaka akiongea na wafanyakazi wake


Tahadhali hiyo imetolewa na Katibu Tawala wa Mkoa huo, Gertrude Mpaka katika kikao baina yake na wafanyakazi wote wa ofisi yake kilichofanyika leo katika ukumbi wa RAS.

Mpaka amesema “nimewaita hapa ili tuelezane na kuchukua hatua za tahadhari katika ofisi zetu na matumizi sahihi ya vifaa vinavyotumia umeme ili moto usitokee na kuunguza ofisi”. Ameongeza kuwa kila mfanyakazi lazima ahakikishe anazima vifaa vyote vya umeme pindi amalizapo kazi na kutenganisha kebo za umeme na soketi za ukutani. Aidha amesisitiza kuwa kikao hicho anakipa umuhimu mkubwa japokuwa ofisi yake imekuwa ikiwakumbusha mara kwa mara wafanyakazi wake kuchukua tahadhari na matumizi sahihi vya vifaa vya moto.

Akiongelea hali ya usalama katika ofisi ya Mkuu wa Mkoa wa Iringa, Mwangalizi wa Ofisi, Avelyne Ngonyani, amesema kuwa hali ya usalama katika ofisi hiyo ni ya kuridhika baada ya kujiwekea mikakati kadha wa kadha ya kuimarisha usalama. Ngonyani amechukua nafasi hiyo kuwakumbusha wafanyakazi wote kuwa lazima funguo zote za ofisi zihifadhiwe katika ‘combination locks’. Ameongeza kuwa katika kuimarisha usalama kila mfanyakazi lazima asaini kitabu cha mahudhuria pindi aingiapo ofisini na baada ya muda wa kazi pia.

Akichangia katika usalama wa ofisi ya Mkuu wa Mkoa, Katibu Tawala Msaidizi, Sehemu ya Utawala na Rasilimali watu, Barnabas Ndunguru amesisitiza kuwa funguo za ofisi ni nyaraka za serikali na ni kosa kwa mfanyakazi yeyote kuondoka na funguo hizo. Aidha amesisitiza kuwa endapo mfanyakazi atahitaji kufanya hivyo au kuendelea na kazi baada ya muda wa kazi basi hanabudi kuomba kibali kutoka kwa mkuu wa utawala ofisini hapo.

Katibu Tawala Mkoa pia amegusia kuwa nchi ipo katika kampeni za uchaguzi mkuu unaotarajiwa kufanyika Oktoba 31, 2010 na kusisitiza kuwa “joto la kampeni za uchaguzi limeanza, hivyo wafanyakazi hatutakiwa kushabikia siaka katika ofisi za umma na katika muda wa kazi japokuwa tuna vyama vya siasa”. Mpaka amechukua nafasi hiyo kuwatakia maandalizi mema ya uchaguzi mkuu na kuwataka wafanyakazi wote wajitokeze kupiga kura.


Baadhi ya wafanyakazi wa ofisi ya RAS Iringa wakimsikiliza RAS wao leo

Tuesday, August 31, 2010

ZIARA YA GADDAFI ITALIA UTATA MTUPU!

Kiongozi wa Libya Muammar Gaddafi amewasili mjini Rome siku ya jumapili katika ziara yake ya siku mbili nchini Italia.


Kiongozi wa Libya Muammar Gaddafi

Vyombo vya habari nchini Italia vimeikosoa vikali ziara hiyo hasa baada ya Gaddafi kufanya mkutano na wanawake vijana takribani 700 akiwaelezea umuhimu wa uislam katika nchi iliyobobea katika ukristo na hasa imani ya kikatoliki. Mkutano huo uliandaliwa na Mrembo wa zamani wa Italia Mara Carfagna ambae pia ni mtangazaji maarufu wa TV na mwaka uliopita aliteuliwa na waziri mkuu kuwa waziri wa haki sawa. Aidha katika mkutano huo taarifa ambazo hazijathibitishwa rasmi zinasema kuwa wanawake vijana walilipwa karibia Euro 70 na zawadi ya Qu’ran na watatu kati yao walislimu katika mkutano huo.



Warembo wa kiitaliano wakielekea katika mkutano na Gaddafi

Katika dhifa ya kitaifa iliyoandaliwa katika jumba la kifalme la Ourinal na Rais Napolitano, alichukua nafisi hiyo kuipongeza ziara hiyo na kusema kuwa ziara hiyo itachangia kuleta amani katika mashariki ya kati na mediteranian. Aidha alimpongeza Gaddafi na kumuita kuwa kichicheo cha madabiliko ya kisasa barani Afrika. Katika dhifa hiyo ya kitaifa waitaliano walihudumiwa mvinyo mweupe ‘white wine’ wakati ujumbe wa Libya ulijiburudisha kwa juice ya machungwa.

Kiongozi huyo alipata wakati ngumu kutoka kwa wanafunzi wa chuo kikuu cha Roma wanaopinga ziara hiyo na wajimbe wa Seneti wa mlengo wa shoto, na Seneta wa chama cha Christian Democratic alisema kuwa uamuzi wa kumualika Gaddafi kulihutubia baraza la hilo la juu haukuwa sahihi. Aidha Waziri mkuu wa Italia hakuonesha kushtushwa na kelele hizo za wapingaji wa ziara hiyo na kusema kuwa hao ni wafungwa wa mawazo ya kale.


Kiongozi wa Libya, Muammar Gaddafi (kushoto) na Warizi Mkuu

wa Italia Silvio Berlusconi (kulia)

Baadae, Waziri Mkuu, Silvio Berlusconi na Gaddafi walizindua maonesho ya picha na sherehe za kumbukumbu ya maadhimisho ya pili ya mkataba baina ya Italia na Libya ambapo Italia ilikubali kuilipa Libya fidia ya dola za kimarekani bilioni 5 kwa kuikalia kimabavu. Aidha kama sehemu ya makubaliano hayo, Libya ilikubali kuwazuia maelfu ya waafrika wanaozamia Italia.

Wakati wa mazungumzo hayo ya jioni baina wa Berlusconi, Gaddafi na watu wengine wenye majina makubwa katika biashara nchini Italia, Gaddafi aliitaka Jumuiya ya Ulaya kutoa Euro bilioni 7.1 kwa mwaka kwa ajili ya kupambana na uhamiaji haramu.

Nyota ya Gaddati kimataifa ilianza kung’ara mwaka 2008 baada ya kusaini makubaliano ya mabilioni ya fidia na sasa Italia ni mshirika mkubwa wa kibiashara.

Muammar al- Gaddafi (Muʿammar alQadhdhafi) alizaliwa 1942 katika mji wa Surt, kaskaazini mwa Libya na amekuwa kiongozi wa Libya tangu mwaka 1969. Gaddafi alizaliwa katika hema jangwani na amehitimu masomo ya chuo kikuu cha Libya na shule ya kijeshi ya Libya. Akiwa katika cheo cha Kaptaini jeshini aliongoza mapinduzi yaliyomuangusha mfalme Idris I.

(Habari hii imeandaliwa kwa msaada wa Reuters euronews)

Thursday, August 26, 2010

CCM yaendelea kuvuna Madiwani Mufindi Kaskazini, Mufindi Kusini, Njombe Kusini na Kilolo


Chama cha Mapinduzi (CCM) kimeendelea kuvuna ushindi wa chee kwa kujipatia jumla ya madiwa 34 waliopita bila kupingwa katika Kata 34 za majimbo ya Mufindi Kaskazini, Mufindi Kusini, Kilolo na Njombe Kusini.

Taarifa hiyo imetolewa na Mratibu wa uchaguzi wa Mkoa wa Iringa, Barnabas Ndunguru Ofisini kwake leo. Ndunguru amefafanua kuwa wagombea nafasi za udiwani 13 kati ya 30 wa chama cha mapinduzi wamepita bila kupingwa katika Majimbo ya Mufindi Kaskazini na Mufindi Kusini. Wagombea 10 kati ya 12 wa CCM wamepita bila kupingwa katika jimbo la Kilolo na wagombea udiwani 11 kati ya 15 wamepita bila kupingwa katika Kata za jimbo la Njombe Kusini.

Mratibu huyo wa uchaguzi wa Mkoa wa Iringa ameongeza kuwa katika Majimbo ya Mufindi Kaskazini na Mufindi Kusini, Kata 17 zinawagombea zaidi ya mmojana hivyo zitafanya uchaguzi. Amevitaja vyama vitakavyoshiriki uchaguzi huo na idadi ya wagombea wake kuwa ni CCM (17), CHADEMA (9), NCCR- Mageuzi (5), TLP (3) na CUF (2). Aidha katika jimbo la Kilolo vyama vyenye wagombea ni CCM, CHADEMA, CHAUSTA, wakati katika jimbo la Njombe Kusini ni CCM, TLP na CHADEMA.

Wakati huohuo katika jimbo la Njombe Kusini aliyekuwa Naibu wa Spika wa bunge la Jamhuri ya Muungano wa Tanzania na mbunge wa jimbo hilo, Anne Semamba Makinda amefanikiwa kutetea nafahi hiyo baada ya kupita bila kupingwa. Nao Mgimwa Mahmoud Hassan (CCM) jimbo la Mufindi Kaskazini, na Kigola Mendrad Lutengano (CCM) jimbo la Mufindi Kusini wamepita bila kupingwa baada ya kushinda pingamizi zao dhidi ya wagombea ubunge Laurence Chumila (NCCR- Mageuzi) na Sanga Christian Aloyce wa majimbo ya Mufindi Kaskazini na Mufindi Kusini. Katika jimbo la Kilolo wanaowania jimbo hilo ni Profesa. Peter Mahamudu Msolla (CCM), Clay Meshack Mwitula (CHADEMA) na Mwaka Lameck Mgimwa (CHAUSTA).



Madiwani 13 wa CCM wapita bila kupingwa Njombe Kaskazini na Njombe Magharibi

Jumla ya wagombea nafasi za udiwani 13 wa chama cha mapinduzi wamepita bila kupingwa katika Kata zao ndani ya majimbo ya uchaguzi ya Njombe Kaskazini na Njombe Magharibi.

Taarifa hiyo imetolewa na Mratibu wa uchaguzi Mkoa wa Iringa, Barnabas Ndunguru ofisini kwake leo. Ndunguru amesema katika Jimbo la Uchaguzi la Njombe Kaskazini wagombea nadasi za udiwani 6 wa chama cha mapinduzi wamepita bila kupingwa na kuwataja majina yao kuwa ni Peter Luka Nyahuya (Kichiwa), Camilo Albino Hongoli (Mfriga), Chabiko Eliah Kyenga (Idamba), Richard Julius Chagavahye (Mahongole), Paulo Luhalagata Kinyamagoha (Ninga), Lunyamadzo Cheleso Mhidze (Ikondo) kati ya Kata 19 za Jimbo hilo. Katika Jimbo la Uchaguzi la Njombe Magharibi amewataja wagombea udiwani waliopita bila kupingwa kuwa ni Anna Upendo Edward Gombela (Mdundu), Frank Jeremia Lulandala (Wangama), Andrew Girson Mangula (SAJA), Elly Safari Chengula (Igosi), Enock Fungameza Kiswaga (Imalinyi), Abraham Lutangilo Chaula (Makoga), Lukengelo John Mgaya (Kipengere) kati ya Kata 17 za jimbo hilo.

Aidha Mratibu wa uchaguzi Mkoa wa Iringa amesema ushindani mkubwa upo katika vyama vya CCM, CHADEMA na CUF ambavyo vimesimamisha wagonbea katika majimbo mengi. Mratibu huyo ameongeza kuwa chama cha TLP kimesimamisha mgombea 1 katika Kata ya Lupembe na chama cha NCCR-Mageuzi kimesimamisha mgombea 1 katika Kata ya Luguda.

Kwa upande wa wagombea ubunge waliochukua fomu na kuteuliwa kugombea ubunge, Ndunguru amesema kuwa katika Jimbo la Njombe Kaskazini ni Deo Kasenyenda Sanga (CCM), Alatanga Ludaliko Nyagawa (CHADEMA), Hongole Ayubu, Godrey (CUF). Jimbo la Njombe Magharibi amewataja kuwa ni Gerson Hosea Lwenge (CCM), Thomas Simon Nyimbo (CHADEMA), Mhanga Jacob Lichano (CUF).

Mkoa wa Iringa una jumla ya majimbo 11 ya uchaguzi.



‘...Ndunguru awataka kufanya kazi kama familia moja!’

Watumishi wa Sehemu ya Utawala na menejimenti ya Rasilimali watu katika ofisi ya Mkuu wa Mkoa wa Iringa wametakiwa kuishi kama familia moja ili waweze kufikia malengo waliyojiwekea katika ufanisi wa kazi.

Kauli hiyo imetolewa na Katibu Tawala Msaidizi, Sehemu ya Utawala na Menejimenti ya Rasilimali watu, Barnabas Ndunguru katika kikao cha Sehemu ya Utawala na Menejimenti ya Rasilimali watu kilichofanyika leo katika ofisi yake.

Ndunguru amesema “lazima tuishi kama familia moja sababu sisi ni kitu kimoja”. Ameongeza kuwa “muda tunaotumia kufanya kazi pamoja ni mwingi kuliko muda tunaotumia sehemu nyingine yoyote ikiwa ni pamoja na nyumbani hivyo sisi ni familia moja”.

Katibu Tawala huyo Msaidizi amesisitiza ushirikiano kwa watumishi katika utendaji kazi ili kufanikisha malengo aliyojiwekea kila mtumishi na malengo jumla ya ofisi ya Mkuu wa mkoa wa Iringa. Aidha amesisitiza pia watumishi kufanya kazi kwa kufuata mpango kazi wa kila mtumishi ili kuondokana na dhana ya kulaumiana na kukinzana katika majukumu ya kila siku. Ameongeza kuwa kufanya kazi kwa kufuata mpango kazi wa kila mtumishi utachochea uwajibikaji unaolenga kutoa matokeo na Upimaji wa Wazi wa Utendaji Kazi wa Watumishi (OPRAS).

Watumishi wote wa Sehemu ya Utawala na Menejimenti ya Rasilimali watu wamekamilisha mpango wa mwaka na mpango kazi kwa kila mtumishi na kuukabidhi kwa Katibu Tawala Mkoa.



Timu ya RAS katika mazoezi mepesi

Timu ya michezo mbalimbali ya Katibu Tawala Mkoa wa Iringa maarufu kama (RAS Iringa) itakayoshiriki mashindano ya Shirikisho la Michezo kwa Wizara, Mikoa, Idara na Wakala mbalimbali wa Serikali (SHIMIWI) imeanza mazoezi mepesi ya kujiwinda ma michezo hiyo.

Afisa Michezo na Utamaduni wa Sekretarieti ya Mkoa wa Iringa, Kenneth Komba amesema kuwa mazoezi hayo yalianza rasmi 4 Agosti, 2010 katika viwanja vya chuo kikuu kishiriki cha Elimu- Mkwawa kila siku ya juma kuanzia saa 9:30 alasiri hadi 11:30 jioni.

Komba ameitaja timu hiyo kuwa inajiwinda na michezo kama mpira wa miguu kwa wanaume chini ya kocha John Ndumbalo ambaye pia Katibu wa chama cha makocha mkoa wa Iringa, mpira wa pete kwa wanawake chini ya kocha Warda Sapali na kuvuta kamba wanawake na wanaume chini ya kocha Magret Msigwa.

Afisa Michezo na Utamaduni amesema kuwa mchujo wa awali kwa wachezaji utafanyika tarehe 13 Septemba na kusisitiza kuwa mchujo huo utazingatia mahudhurio katika mazoezi, uwezo wa mchezaji binafsi na nidhamu kwa mchezaji binafsi na timu.

Kwa upande wa mahudhurio amesema kuwa ni ya kuridhisha japokuwa watumishi wengi wanakabiliwa na majukumu mengi ya kikazi.

Mwandishi wa habari hiili amefanikiwa kufika katika viwanja vya chuo kikuu kishiriki cha elimu- Mkwawa na kuwakuta wachezaji wamehudhuria kwa kiwango cha kuridhisha na wakifanya mazoezi mepesi mepesi.

Komba amemuomba Katibu Tawala Msaidizi, Sehemu ya Utawala na Rasilimali watu, Barnabas Ndunguru kuhudhuria na kushiriki katika mazoezi hayo ili kuleta hamasa kwa wanamichezo hao. Kwa upande wake Ndunguru amekubali ombi hilo na kuahidi kuwatembelea mara kwa mara.

Michezo ya SHIMIWI inatarajiwa kutimua vumbi tarehe 17 Septemba hadi Oktoba 2, 2010 jijini Tanga.