Friday, September 13, 2013

TENGA AISHUKURU KAMATI YA LIGI




Rais wa Shirikisho la Mpira wa Miguu Tanzania (TFF), Leodegar Tenga ameishukuru Kamati ya Ligi kwa usimamizi mzuri tangu ilipokabidhi Ligi Kuu ya Vodacom (VPL) katika mzunguko wa pili msimu uliopita.


Leodegar Tenga, Rais wa TFF
 
Amesema TFF iliamua kuanzisha Kamati ya Ligi kwa lengo la kutaka klabu zijisimamie zenyewe ili kuongeza ufanisi, jambo ambalo limeleta mabadiliko kwa vile hivi sasa hakuna matatizo katika kuwalipa marefa na makamisha wanaosimamia VPL na Ligi Daraja la Kwanza (FDL).

“Fedha za udhamini sasa zinakwenda moja kwa moja kwenye Kamati ya Ligi. Ni matarajio yangu kuwa ufanisi utaongezeka, kwani tumeanzisha jambo hili kwa lengo la kuleta tija, maendeleo na utulivu,” amesema Rais Tenga wakati akizungumza na Wahariri wa Michezo kutoka vyombo mbalimbali vya habari.

Rais Tenga amesema mahali penye utulivu na utawala bora watu wanakuwa na imani hasa katika masuala ya fedha, hivyo ni lazima kwa kampuni kuwekeza kwa vile kunakuwa hakuna vurugu.

Amesema ukiondoa Afrika Kusini na Angola katika ukanda huu wa Afrika Mashariki, Kati na Kusini, Ligi Kuu ya Tanzania ndiyo yenye udhamini mkubwa kupitia mdhamini wa ligi na udhamini wa matangazo ya televisheni.

Pia amesema kuanzia msimu ujao 2014/2015 klabu za Ligi Kuu hazitaruhusiwa kusajili wachezaji hadi zitakapowasilisha TFF ripoti zao za mapato na matumizi zilizokaguliwa (Audited accounts), hivyo klabu husika zijiandae kwa ripoti hizo za Januari hadi Desemba 2013.

Kuhusu tiketi za elektroniki, Rais Tenga amesema bado linafanyiwa kazi na CRDB ambayo ndiyo iliyoshinda tenda hiyo na liko katika hatua nzuri, kwani nia ya TFF na benki hiyo kuona kuwa linaanza haraka iwezekanavyo.

“Tiketi za elektroniki zimechelewa kuanza kwa sababu ambazo haziwezi kuzuilika, lakini CRDB imeshatengeneza miundombinu katika karibu viwanja vyote. Kulitokea uchelewaji katika kuleta printer (mashine za kuchapia), zilizokuja hazikuwa zenyewe. Kwa upande wa Uwanja wa Taifa, system (mfumo) iliyopo inatofautiana na ile ya CRDB. Hivyo sasa tunaangalia uwezekano wa zote mbili zitumike kwa pamoja, kwa sababu Uwanja wa Taifa una system yake tayari. Printer zimeshafika, tunataka ili suala lisitucheleweshe,” amesema.

=30=

WATUMISHI FANYENI KAZI KWA KUJITUMA




W
atumishi mkoani Iringa wametakiwa kufanya kazi kwa kujituma ili kufikia malengo ya serikali ya kuwaletea wananchi maendeleo na matokeo makubwa yanayoonekana.
Kauli hiyo imetolewa na Muu wa Mkoa wa Iringa, Dkt. Christine Ishengoma alipokuwa akiongea na wafanyakazi wa serikali wilayani Mufindi katika ukumbi wa Halmashauri ya wilaya ya Mufindi kupitia utaratibu wake wa kuongea na kusikiliza changamoto zinazowakabili wafanyakazi wa serikali mkoani Iringa.
Dkt. Christine amesema kuwa kila mfanyakazi wa serikali lazima afanye kazi kwa nafasi yake na kwa kujituma ili kazi yake iweze kwenda vizuri na kufikia malengo ya serikali ya kuwaletea maendeleo wananchi wake. “Kazi hii ni yetu ya kumuendeleza mwana Mufindi na Iringa kwa ujumla. Hivyo, kila mmoja asipende kufanya kazi kwa kuchungwa ni vizuri kujichunga mwenyewe. Lazima muwe na ratiba zenu za kazi na zenye malengo” alisisitiza Dkt. Christine.
Amesema katika kuhakikisha matokeo makubwa yanapatikana na kuonekana kwa wananchi ni vizuri utaratibu wa matokeo makubwa sasa (BRN) ukaanzia nyumbani ili uweze kufahamika vizuri kuanzia ngazi ya familia. Amesema kuwa kabla ya kufikiria kutoa matokeo makubwa kwa ujumla wake ni vizuri kila mfanyakazi akajiangalia yeye mwenyewe. “Lazima uangalie wewe mwenyewe unaendaje na BRN” alisisitiza Dkt. Christine.
Mkuu wa Mkoa wa Iringa ameyataja maeneo ya vipaumbele katika utaratibu wa matokeo makubwa sasa kuwa ni maji, kilimo, elimu, uchukuzi, nishati na mapato. 

Akiongelea upande wa mapato, amesema kuwa ni lazima halmashauri ya wilaya ya Mufindi ikajipanga vizuri kuhakikisha inaongeza ukusanyaji wa mapato ya ndani ili iweze kutoa huduma bora kwa wananchi. Amesema “halmashauri hii inasikifa kwa uchapa kazi na ukusanyaji wa mapato hivyo hakikisheni mnaitendea haki halmashauri hii isirudi nyuma”alisisitiza Mkuu wa Mkoa.

Mkuu wa Mkoa amekemea vikali siasa katika utekelezaji wa utaratibu wa matokeo makubwa sasa (BRN). Amesema “kwenye utaratibu wa BRN msiweke siasa, mpo hapa kwa ajili ya kutekeleza Ilani ya uchaguzi ya chama cha mapinduzi ya mwaka 2010-2015.siaka kazini ni marufuku, fanyeni kazi za serikali kwa mujibu wa taratibu zilizopo” aling’aka Mkuu wa Mkoa wa Iringa.

Akiongelea maandalizi ya kilele cha mbio za Mwenge wa Uhuru, Kumbukumbu ya Baba wa Taifa Mwl. Julius Nyerere na Wiki ya Vijana, Mkuu wa Mkoa amewataka wafanyakazi hao kushirikiana na viongozi katika kufanikisha sherehe hizo kubwa mkoani hapa. “Amesema shirikianeni na viongozi wenu ikiwa ni pamoja na kutoa ushauri wa kuboresha maandalizi na maadhimisho ya sherehe hizi muhimu katika mkoa na taifa letu kwa ujumla”. 

Akiongelea miradiitakayotembelewa na Mwenge wa Uhuru mkoani Iringa, Mkuu wa Mkoa amezitaka wilaya kuhakikisha kuwa miradi ya Mwenye inakamilika kwa wakati na kwa ubora unaokubalika.

Mkoa wa Iringa umepewa heshima ya kuwa mwenyeji wa kilele cha mbio za Mwenge wa Uhuru, Kumbukumbu ya Baba wa Taifa Mwl. Julius Nyerere na wikiya Vijana kitaifa kwa mwaka 2013.
=30=


BRN KUTEKELEZWA KWA VITENDO IRINGA



Na. Bruno Machary, IRINGA
Serikali Mkoani Iringa imejipanga kutekeleza kwa vitendo utaratibu wa matokeo makubwa sasa (BRN) ili kufikia malengo yaliyowekwa kitaifa ya kutoa huduma bora kwa wananchi.
Mkuu wa Mkoa wa Iringa, Dkt. Christine Ishengoma

Hayo yamejidhihirisha jana kwa Mkuu wa Mkoa wa Iringa Mhe. Dkt. Christine Ishengoma kufanya ziara katika Halimashauri za Mkoa wa Iringa kwa lengo la kuhamasisha utendaji wa kazi kwa wafanyakazi wa kada mbalimbali kupitia utaratibu wa matokeo makubwa sasa. Katika ziara hizo pamoja na mambo mengine amekuwa akisikiliza changamoto na kero na kuzipatia ufumbuzi.

Akiongea na wafanyakazi wa Halmashauri ya Wilaya ya Iringa katika ukumbi wa mikutano wa Siasa ni Kilimo mjini Iringa, Mkuu wa Mkoa wa Iringa, Dkt. Ishengoma amesema kuwa wataalamu hawapaswi kukaa ofisini tu ila wanapaswa kutoka na kuwasikiliza wananchi ili kutatua kero zinazowakabiri kwa urahisi. 

Amesema kuwa wataalamu hao ndio suluhisho la kero hizo zinazowakabili wananchi katika kufikia maendeleo yao ya kiuchumi na kijamii. Amesema kuwa kila mfanyakazi analo jukumu la kujitazama na kujihoji yeye wenyewe jitihada alizofanya katika kufikia malengo ya Serikali.

“Utendaji kazi ubadilike na kila mmoja aipende kazi yake kulingana na kada aliyonayo” amesema Dkt. Ishengoma.

Akiongelea dhana ya mawasiliano katika kuleta ufanisi wa kazi, Mkuu wa Mkoa amesema kuwa mawasiliano ni jambo la muhimu sana kwa wafanyakazi kwasababu yanasaidia kuleta ushirikiano na upendo miongoni mwa wafanyakazi hatimae kuondoa chuki baina yao. Amesema kuwa mawasiliano yanapokuwa mazuri ufanisi wa kazi unakuwa mzuri pia.

Amewashauri wafanyakazi kuwashirikisha wakuu wa idara zao pale wanapokabiliwa na matatizo mbalimbali katika utendaji kazi wao. Amesema kuwa ni vizuri kutatua matatizo yanayojitokeza kupitia vikao rasmi vya idara kabla ya kuyawasilisha ngazi za juu.

Matokeo makubwa sasa (B.R.N) ni utaratibu wa utendaji kazi ulioanzishwa na Serikali kwa lengo la kutoa ufanisi wa kazi unaopimika haraka. Maeneo ya kipaumbele katika BRN ni elimu, nishati, maji, uchukuzi, mapato na kilimo.
=30=



IRINGA YAKOMESHA UDANGANYIFU KATIKA MITIHANI




Na. Bruno Machary, IRINGA
Serikali Mkoani Iringa imejidhatiti kufanikisha mtihani wa kuhitimu elimu ya msingi unafanyika pasipo kuwepo na vitendo vya udanyanyifu.

Kauli hiyo imetolewa na Afisa Elimu wa Mkoa wa Iringa, Mwl. Joseph Mnyikambi alipokuwa akiongea na waandishi wa habari waliomtembelea ofisini kwake ili kujua jitihada zilizochukuliwa na Mkoa katika kukabiliana na vitendo vya udanganyifu kwa walimu na wanafunzi wakati wa mtihani huo.

Akitoa ufafanuzi, Mnyikambi amesema kuwa wamejitahidi kutoa semina kwa walimu ili kuhakikisha  kuwa mtihani huo unafanyika kwa haki na amani pasipo kuwepo kwa vitendo vyovyote vya udanganyifu kwa wanafunzi wala walimu watakaosimamia mtihani huo. Kwa upande wa wanafunzi, amesema kuwa kila mwanafunzi atatumia dawati lake ili kuondoa mianya inayoweza kushawishi udanganyifu.

Akiongelea upande wa maandalizi ya mtihani huo, amesema kuwa maandalizi yote yamekamilika na  vifaa vyote vimeshafika Mkoani na vimeshapelekwa kila Halmashauri. “Vifaa vyote vinavyohusu masuala ya mtihani huo vimeshafika Mkoani hapa na vimeshapelekwa katika wilaya zote” amesema Mnyikambi.

Afisa Elimu huyo amesema kuwa katika mwaka wa masomo 2013  idadi ya wanafunzi wanaotarajiwa kufanya mtihani huo imepungua kwa jumla ya wanafunzi 1194 ikilinganishwa na mwaka wa masomo 2012. Kwa mwaka 2012 kulikuwa na watahiniwa 24,342 wakati mwaka huu wapo watahiniwa 23,148.

Mtihani huo unaotarajiwa kuanza kufanyika siku ya jumatano ya tarehe 11/9/2013 kitaifa, utajumuisha shule za msingi 466 za  Mkoa wa Iringa. Mkoa wa Iringa una jumla ya wilaya tatu ambazo ni Iringa, Mufindi na Kilolo, zenye jumla ya Halmashauri nne.
=30=

WATAHINIWA DARASA LA SABA WAPUNGUA IRINGA

Na Charles Amulike, IRINGA
Idadi ya watahiniwa wanaotarajia kufanya mtihani wa darasa la Saba mkoani Iringa imepungua kwa mwaka huu ikilinganishwa na mwaka jana 2012 kutoka wanafunzi 24,342 mpaka kufikia 23,148 kwa mwaka huu.

Hayo yamesemwa na Afisa Elimu wa Mkoa wa Iringa, Joseph Mnyikambi, alipokuwa akiongea na waandishi wa habari ofisini kwake kuhusu maandalizi ya mtihani wa kuhitimu elimu ya msingi kwa mwaka 2013.

Mnyikambi amesema kuwa jumla ya wanafunzi 23,148 tayari wamesajiliwa kufanya mtihani huo wa darasa la saba kwa mwaka huu 2013. Ameongeza kuwa kati ya watahiniwa hao wavulana 10,752 na wasichana 12,396. Akiongelea idadi ya watahiniwa hao kwa ulinganifu na mwaka jana, amesema “idadi ya watahiniwa waliofanya mtihani mwaka jana 2012 ni kubwa kuliko ya mwaka huu 2013”. Amefafanua kuwa mwaka jana jumla ya watahiniwa ilikuwa 24,342 waliofanya mtihani wa kumaliza darasa la saba. Kati yao wavulana walikuwa 11,484 na wasichana walikuwa 12,858.

Mnyikambi amesema kuwa idadi ya wanafunzi waliopungua kwa mwaka huu wa 2013 ni 1194 kiwango ambacho ni kikubwa ikilinganishwa na mwaka jana 2012.

Akiongelea maandalizi ya kufanyika kwa mtihani huo, Mnyikambi amesema “maandalizi yamekamilika, ikiwa ni pamoja vyumba vya kufanyia mtihani huo na madawati ya kutosha wanafunzi wote wanaotarajiwa kufanya mtihani huo”. Amesema katika kukomesha vitendo vya udandanganyifu katika mitihani ya kumaliza elimu ya msingi, Mkoa umejipanga vizuri kuhakikisha kila mtahiniwa anakaa kwenye dawati lake peke yake. Ameongeza kuwa  wasimamizi wa mitihani wamepatiwa semina ili kuhakikisha wanadhibiti udanganyifu wa aina yoyote unaoweza kujitokeza katika mitihani hiyo.

Afisa Elimu Mkoa amesema kuwa tayari vifaa vya mitihani vimefika na vimepelekwa katika Halmashauri zote za Mkoa wa Iringa. Aidha, amewahakikishia wananchi kuwa hakuna changamoto yoyote iliyojitokeza Mkoani hapa.
=30=ᘖ

MWALIKO WA TAMASHA LA 'MTAKUJA' KWA WADAU WA ELIMU NA WASANII




Uongozi wa shule ya Sekondari Mtakuja iliyopo Kunduchi, Dar-es-salaam, unayo furaha kukukaribisha wewe ukiwa kama mdau wa elimu na burudani katika Tamasha la Wanafunzi (2013 School Bash) litakalofanyika shuleni hapo siku ya kesho Jumamosi kuanzia saa mbili asubuhi.

Tamasha hilo linatarajiwa kuhusisha shule zaidi ya 20 na wanafunzi zaidi ya 1000. Kutakuwa na 'activities' mbali mbali za kielimu, kimichezo na kiburudani. Wewe ukiwa kama mdau wa mojawapo wa activities hizo, unakaribishwa. 

Wasanii wa muziki ambao ndio hupendwa zaidi na wanafunzi, nao wamealikwa bila kujali ni msanii mkubwa au mdogo. Uwepo wako utathaminiwa sana na utafurahiwa sana na wanafunzi. Utapewa nafasi bila hiyana kujihusisha nao moja kwa moja kwa kuwaburudisha au kuzungumza na kujadiliana nao kwa njia yeyote ile. Kumbuka pia lengo la Tamsha hili ni kukuza mkakati wa taifa unaoendelea hivi sasa hasa kwenye sekta ya elimu wa 'Big Results Now'.

Tumia fursa hii kukutana na mashabiki wako wanafunzi na wadau wengine mbali mbali, katika kuendelea kujijengea jina jema kwa vijana hawa wadogo wanaokua.

Imetolewa na:

Misonji Charles (0714642442)
Muandaaji wa Tamasha.