Tuesday, September 17, 2013

SIETCO YAONGEZEWA MIEZI 6 KUKAMILISHA UJENZI WA BARABARA YA IRINGA- MIGORI




Serikali imemuongezea muda wa miezi sita mkandarasi anayejenga barabara ya Iringa-Migori ili aweze kukamilisha ujenzi huo na kukabidhi barabara hiyo serikalini. 
 
Waziri wa Ujenzi, Dk. John Magufuli (kushoto) na Mkuu wa Mkoa wa Iringa, Dk. Christine Ishengoma (kulia) 
Kauli hiyo imetolewa na Waziri wa Ujenzi, Dk. John Magufuli alipokuwa akifanya majumuisho ya ziara yake ya kukagua mradi wa barabara ya Iringa-Dodoma katika ukumbi wa mikutano wa Ofisi ya Mkuu wa Mkoa wa Iringa.

Dk. Magufuli amesema kuwa Mkandarasi China Sichuan International Cooperation Company Limited (SIETCO) anayejenga barabara ya Iringa-Dodoma sehemu ya kwanza Iringa- Migori (km. 95.2) yupo nyuma, hivyo serikali imemuongezea miezi sita. 

Amesema kuwa baada ya kuongeza miezi hiyo mkandarasi huyo atatakiwa kukabidhi barabara hiyo kwa serikali mwezi Septemba, 2014. Akiongelea sababu zilizomfanya mkandarasi huyo awe nyuma, Dk. Magufuli amesema kuwa eneo la Nyang’oro lilikuwa na milima mikali na kuhitajika nguvu zaidi katika kuikata kwa ajili ya ujenzi wa barabara. Amesema baada ya kipindi hicho mkandarasi lazima akabidhi barabara na hakuna muda wa ziada utakaoongezwa.

Kutokana na umuhimu wa kimkakati wa barabara ya Iringa- Dodoma yenye urefu wa km 260 utakapokamilika, Waziri wa Ujenzi ameshauri uandaliwe mpango wa kutengeneza barabara za michepuo. Amesema kuwa umuhimu wa barabara hizo za michepuo ambazo zitakuwa haziingii katikati ya mji zitaondoa msongamano wa magari katikati ya mji. Aidha, ameshauri itengenezwe stendi kubwa ya magari nje ya mji ili kupunguza msongamano wa magari mjini.

Mkuu wa Mkoa wa Mkoa wa Iringa, Dk. Christine Ishengoma ameishukuru serikali ya awamu ya nne chini ya uongozi wa Rais, Dk. Jakaya Kikwete kwa kuweka nguvu katika ujenzi wa miundombinu ya barabara nchini hasa mkoani Iringa. Amesema kuwa Mkoa wa Iringa utaendela kusimamia barabara zote ili ziweze kudumu kwa muda mrefu. Amesema kuwa serikali kupitia wizara ya Ujenzi inafanya kazi nzuri na wale wasiyoiona basi hawana macho alisisitiza Dk. Christine.
 
Mkuu wa Mkoa wa Iringa, Dk. Christine Ishengoma (kulia) akitoa shukrani. Kushoto ni Waziri wa Ujenzi, Dk. John Magufuli
 
Mkuu wa Mkoa wa Iringa alitumia majumuisho hayo kumuomba Waziri wa Ujenzi kuiangalia kwa jicho la pekee barabara kuu ya TANZAM sehemu ya mlima Kitonga ipanuliwe ili kuondoa ajali za mara kwa mara na hadha kwa watumiaji wa barabara hiyo. Waziri Dk. Magufuli alilipokea ombi hilo na kuahidi kulitafitia ufumbuzi.

Mkataba wa ujenzi wa mradi wa barabara ya Iringa-Migori (km. 95.2) ulisainiwa tarehe 13 Januari, 2011 kati ya Tanroads na Mkandarasi China Sichuan International Cooperation Company Limited (SIETCO) kwa gharama ya shilingi 84.216 bilioni kwa utekelezaji wa miezi 35.
=30=


Sunday, September 15, 2013

SERIKALI NA SPANEST KUSHIRIKIANA KUBORESHA HUDUMA KWA WATALII




Serikali imeahidi kuendelea kushirikiana na mradi wa kuboresha mtandao wa maeneo yaliyohifadhiwa kusini mwa Tanzania (SPANEST) katika kuboresha huduma kwa watalii na wageni wanaotembelea nyanda za juu kusini.


Mkuu wa Mkoa wa Iringa, Dk. Christine Ishengoma aliyesimama akisoma hotuba ya kufunga mafunzo ya mbinu za kuboresha utoaji huduma kwa wateja mahala pa kazi kwa watumishi wa TANAPA kutoka hifadhi za kusini. Kushoto  ni mratibu wa mradi wa SPANEST, Godwell ole Maing'ataki na kulia ni Afisa Utalii wa TANAPA, Risala Kabongo. 


Kauli ya serikali imetolewa na Mkuu wa Mkoa wa Iringa Dkt. Christine Ishengoma alipokuwa akifunga mafunzo juu ya mbinu za kuboresha utoaji wa huduma kwa wateja mahala pa kazi kwa watumishi wa TANAPA kutoka hifadhi za kusini yaliyofanyika katika ukumbi wa Neema Craft Manispaa ya Iringa.

Dkt. Christine amesema “serikali itaendelea kuunga mkono jitihada zinazofanywa na SPANEST na Wadau wengine wa utalii katika kuhakikisha kuwa huduma kwa wageni wanaotembelea Nyanda za Juu Kusini zinaboreshwa, ili kuwafanya wageni  kufurahia safari zao na kufikia matarajio yao ili kuwa  mabalozi wazuri wa kutangaza vivutio vyetu”. Aidha, alishukuru juhudi za kukabiliana na huduma duni zinazotolewa kwa wageni katika mikoa ya nyanda za juu kusini, alisema “tunashukuru na kupongeza jitihada za SPANEST kukabiliana na changamoto ya huduma duni kwa wageni wanaotembelea mikoa ya nyanda za juu Kusini kupitia mafunzo kama haya”.

Alisema Dkt. Christine. Alitoa wito kwa Mratibu wa mradi wa SPANEST kuendelea kushirikiana na wadau wengine katika mkoa wa Iringa na mikoa mingine kuandaa mafunzo kama hayo kwa watumishi ambao wanatoa huduma kwa wageni kwa kuzingatia umuhimu na upana wa sekta ya utalii ambayo ina wadau wengi wa ndani na nje. Amesema kuwa watalii wanaotembelea hifadhi za Taifa pia hutembelea vivutio na  maeneo yaliyopo nje ya hifadhi hivyo huduma bora zinahitajika kuboreshwa katika hifadhi na maeneo yote nje ya hifadhi.

Akiongelea mantiki ya mafunzo hayo kwa washiriki wa mafunzo hayo, Mkuu wa mkoa alisema “kwa washiriki wote wa mafunzo haya kutoka hifadhi za nyanda za juu kusini chini ya TANAPA, nawapongeza na kuwataka kuonyesha kwa vitendo yale yote ambayo mmejifunza kwa kipindi cha siku nne za mafunzo”. Amesema kuwa anategemea kuwa washiriki hao watakuwa mfano bora katika utoaji wa huduma katika maeneo yao ya kazi na kuwa waalimu kwa wale ambao hawakupata nafasi ya kushiriki katika mafunzo hayo.

Mkuu wa Mkoa wa Iringa amesema kuwa mikoa ya nyanda za juu kusini ina sifa ya kuwa na hifadhi zenye maliasili za kipekee zisizopatikana katika maeneo mengine nchini. Amezitaja hifadhi hizo kuwa ni ruaha ambayo ni hifadhi kubwa kuliko zote nchini, kitulo ambayo ni bustani ya maua ya asili isiyopatikana popote duniani, katavi yenye viboko na mamba wengi, udzungwa yenye misitu na maporomoko ya maji yanayofikia urefu wa mita 170. Hifadhi nyingine amezitaja kuwa ni mikumi na mapori ya akiba ya mpanga kipengere, rungwe-kizigo na hifadhi za jamii zinazosimamiwa na wananchi pamoja na maeneo ya historian a kitamaduni.

Akitoa maelezo ya mafunzo hayo, mratibu wa mradi wa kuboresha mtandao wa maeneo yaliyohifadhiwa kusini mwa Tanzania (SPANEST), Godwell Meing’ataki amesema kuwa tatizo la uduni wa huduma zisizo za viwango kwa wageni wanaotembelea mikoa ya Kusini limekuwa kubwa hasa katika maeneo yanayopokea na kutoa huduma kwa wageni. Ameyataja maeneo yenye changamoto kubwa kuwa ni mapokezi, malazi, chakula, mawasiliano, utoaji taarifa na usafirishaji.

Meing’ataki amesema kuwa mafunzo hayo yamejikita katika maeneo ya kutoa huduma bora, namna ya kufanya mawasiliano, mbinu za kuboresha masoko, kujenga mahusiano, maadili na taratibu za kuboresha huduma.

Mafunzo ya mbinu za kuboresha utoaji wa huduma kwa wateja mahala pa kazi kwa watumishi wa TANAPA kutoka hifadhi za kusini yameandaliwa na mradi wa kuboresha mtandao wa maeneo yaliyohifadhiwa kusini mwa Tanzania (SPANEST). 

Mkuu wa Mkoa wa Iringa, Dk. Christine Ishengoma (wapili kushoto waliokaa) akiwa katika picha ya pamoja na washiriki wa mafunzo ya mbinu za kuboresha utoaji huduma kwa wateja mahala pa kazi kwa watumishi wa TANAPA kutoka hifadhi za kusini. 
=30=

Friday, September 13, 2013

KISIWA CHA SAANANE CHATANGAZWA RASMI HIFADHI YA TAIFA



HIFADHI ZA TAIFA TANZANIA

TAARIFA KWA UMMA


Kisiwa cha Saanane kimetangazwa rasmi kuwa Hifadhi ya Taifa kufuatia Tangazo la Serikali  Namba 227 lililotolewa hivi karibuni.

Kutangazwa kwa Hifadhi ya Taifa ya Kisiwa cha Saanane kunafuatia kupitishwa kwa Azimio la Bunge mwezi Oktoba mwaka jana lililoridhia kupandishwa hadhi kwa kisiwa hicho kutoka Pori la Akiba na kuwa Hifadhi ya Taifa.

Hifadhi ya Taifa ya Kisiwa cha Saanane itakuwa na ukubwa wa kilomita za mraba 2.18 na itajumuisha maeneo ya lililokuwa Pori la Akiba , Visiwa vya Chankende kubwa na ndogo pamoja na eneo la maji ya Ziwa Victoria linalozunguka visiwa hivyo.

Kuanzishwa kwa Hifadhi mpya ya Taifa ya Saanane kutawezesha haja ya kuongeza spishi mbalimbali za wanyamapori na hivyo kuongeza utalii wa mjini, utalii wa ndani, utafiti na kutoa elimu kwa vitendo kwa wanafunzi na wananchi watakaotembelea hifadhi hii mpya.

Aidha, uamuzi huu utasaidia kutunza hali ya bioanuwai, uhifadhi wa mazalia na makuzio ya samaki na uendelezaji wa utalii wa mjini kuendelea kuimarika.

Kabla ya kupandishwa hadhi, Kisiwa cha Saanane kilikuwa Bustani ya wanyama mwaka 1964 kabla ya kupandishwa hadhi kuwa Pori la Akiba mwaka 1991. Ilipofika mwaka 2006, Serikali ilikikabidhi kisiwa hicho kwa Shirika la Hifadhi za Taifa kwa ajili ya kukiendesha na kusimamia mchakato wa kukipandisha hadhi kuwa Hifadhi ya Taifa.

Kufuatia uamuzi huu, Shirika la Hifadhi za Taifa (TANAPA) sasa litakuwa na jumla ya Hifadhi 16 nchi nzima ambazo nyingine ni pamoja na Serengeti; Ziwa Manyara; Tarangire na Arusha.

Nyingine ni pamoja na Kilimanjaro; Mkomazi; Saadani; Mikumi; Milima ya Udzungwa; Ruaha; Kitulo; Katavi; Gombe; Milima ya Mahale na Kisiwa cha Rubondo.

Wakati huohuo, eneo la Hifadhi ya Taifa Gombe limeongezwa ukubwa kutoka Kilometa za mraba 33.74 hadi kufikia kilometa za mraba 56. Uamuzi huu unatokana na Tangazo la Serikali Namba 228 lililotolewa hivi karibuni ambalo linafuatia Azimio la Bunge la Jamhuri ya Muungano wa Tanzania lililotolewa mwaka jana  linalohusu kuridhiwa kwa uamuzi wa kurekebisha mipaka ya Hifadhi ya Taifa Gombe kwa kuondoa eneo la makaburi na kuliacha kwa wananchi pamoja na kujumuisha eneo la ufukwe wa maji ya Ziwa Victoria na eneo la ukanda wa maji.

Kuongezeka kwa eneo la ufukwe wa ziwa na ukanda wa maji kwenye eneo la hifadhi kutaongeza wigo wa shughuli za utalii katika Hifadhi kama vile kuogelea, utalii wa boti, mitumbwi na uvuvi wa kitalii.

Imetolewa na Idara ya Uhusiano
Hifadhi za Taifa Tanzania
S. L. P 3134
ARUSHA