Thursday, May 28, 2015

IRINGA WATAKIWA KUJIANDIKISHA DAFTARI LA WAPIGA KURA




Na. Ofisi ya Mkuu wa Mkoa
Wananchi wa Mkoa wa Iringa wametakiwa kujitokeza kwa wingi katika wiki ya mwisho ya uboreshaji wa daftari la kudumu la wapiga kura.

Kauli hiyo imetolewa na Mratibu wa Mkoa wa zoezi la uboreshaji wa daftari la kudumu la wapiga kura, Bw. Wilfred Myuyu katika mahojiano maalumu ya hali halisi ya zoezi hilo katika mkoa wa Iringa yakiyofanyika ofisini kwake leo.
 
Mratibu wa zoezi la uboreshaji daftari la wapiga kura mkoa wa Iringa, Bw. Wilfred Myuyu
Bw. Myuyu amesema kuwa lengo la Tume ya Taifa ya uchaguzi ni kuhakikisha kila mtanzania mwenye sifa anaandikishwa katika Daftari hilo la kudumu. Amesema kuwa Mkoa wa Iringa pia umedhamilia kuandikisha wananchi wote wenye sifa katika daftari hilo. Ametoa wito kwa wananchi wote wenye sifa kujitokeza mapema katika zoezi hilo ili waweze kuandikishwa. Amewataka wananchi kujiandikisha mapema na kuacha tabia ya kusubiri siku ya mwisho ambapo watu huwa wengi katika mistari ya uandikishaji. 

Akiongelea hamasa ya wananchi katika mkoa wa Iringa, Mratibu wa Mkoa amesema kuwa hamasa ni kubwa kwa wananchi wa Mkoa wa Iringa. Amesema kuwa mkoa umepanga awamu nne za uandikishaji. Amezitaja awamu hizo kuwa ni awamu ya kwanza iliyoanza tarehe 30/4/2015-6/05/2015, awamu ya pili 8/5/2015-14/5/2015, awamu ya tatu 16/5/2015-22/5/2015 na awamu ya nne 24/5/2015-30/5/2015. Amesema kuwa katika awamu tatu zilizopita hamasa ya wananchi imekuwa ni kubwa. “Hadi kufikia tarehe 22/5/2015 jumla ya wapiga kura 391,579 sawa na asilimia 79.3 ya lengo la uandikishaji mkoa walikuwa wamejiandikisha”.
 
Bw. Myuyu amesema kuwa changamoto kubwa ni wingi wa watu wanaopenda kujiandikisha siku ya mwisho na vituo kulazimika kuongeza muda wa uandikishaji. Amesema kuwa awamu ya mwisho itatoa matokeo mazuri.
Bw. Myuyu ametoa wito kwa wananchi kuendelea kudumisha amani na utulivu katika zoezi hilo ili liwe la mafanikio na kuwataka kuwaibua wale wote wasio na sifa za kujiandikisha katika daftari la kudumu la wapiga kura.

Awali Bibi. Rehema Mohamed Sadiki, mkazi wa mtaa wa Maliwa amepongeza zoezi la uandikishaji katika mtaa wake na kusema kuwa waandikishaji wapo makini na wana kasi ya kulidhisha. Aidha, ametoa rai kwa wananchi wote kujitokeza mapema kuboresha taarifa zao kabla ya siku ya mwisho ili kuweza kutumia fursa na haki yao kikatiba ya kuchagua viongozi wanaofaa.

Zoezi la uboreshaji wa daftari la kudumu la wapiga kura limeanza tarehe 30/4/2015 Mkoani Iringa na linatarajiwa kumalizika tarehe 30/5/2015 wakati mkoa ukitarajia kuandikisha wapiga kura 493,277.
=30=

Wednesday, May 6, 2015

VIONGOZI WA DINI IRINGA ISAIDIENI SERIKALI



Na. Ofisi ya Mkuu wa Mkoa
Viongozi wa dini mkoani Iringa wametakiwa kuunga mkono juhudi zinazofanywa na serikali kuhakikisha maisha bora kwa wananchi yanawezekana.

Kauli hiyo imetolewa na Mkuu wa Mkoa wa Iringa, Bibi. Amina Masenza alipokuwa akiongea na viongozi wa dini katika kikao maalumu kilichofanyika katika ukumbi wa mikutano wa Ofisi ya Mkuu wa Mkoa.
 
Mkuu wa Mkoa wa Iringa, Bibi. Amina Masenza
Bibi. Masenza amesema kuwa viongozi wa dini ni muhimu sana katika kuunga mkono juhudi zinazofanywa na serikali na kufikisha ujumbe kwa watu wengi. Amesema “viongozi wa dini mnao watu wengi nyuma yenu ambao ni waumini na wanawasikiliza hivyo mnawajibu wa kusaidia juhudi zinazofanywa na serikali za kuboresha maisha ya wananchi wake”. 

Akiongelea zoezi linaloendelea la uboreshaji daftari la wapiga kura, Mkuu wa Mkoa wa Iringa amesema kuwa zoezi la uboreshaji daftari la wapiga kura linaendelea katika mkoa wa Iringa. Amesema kuwa changamoto ni kuwa mashine zinatumia umeme hivyo zinahitaji kuchajiwa na sehemu za vijijini hazina umeme. Amesema kuwa mkoa unakabiliana na changamoto hiyo ili kuhakikisha zoezi zima linakuwa na mafanikio. Amesema changamoto ya matumizi ya kopyuta limechukuliwa kwa uzito unaostahili na watu wenye uelewa wa kompyuta wamechukuliwa katika kufanya zoezi la uboreshaji daftari hilo ili liende vizuri na haraka.

Wakati huohuo, bibi. Masenza amewataka viongozi wa dini kuendelea kuwahamasisha waumini na wananchi kwa ujumla kuipitia na kuifahamu Katiba inayopendekezwa ili mwisho waweze kufanya maamuzi sahihi wananchi wenyewe pasipo kushurutishwa. Amesema kuwa Katiba hiyo imegusa maeneo na makundi yote ya kijamii hivyo ikisomwa kwa umakini itawasaidia wananchi ufanya maamuzi sahihi.

Katika kikao hicho mada juu ya hali ya lishe katika mkoa, hali ya maambukizi ya ukimwi na hali ya elimu ziliwasilishwa na kujadiliwa kwa kina. Viongozi hao wamekubaliana kukutana kila baada ya miezi nne na kujadili mambo muhimu katika mkoa wa Iringa.
=30=

SHULE ZA IGOWOLE NA KAWAWA ZAPONGEZWA



Na. Ofisi ya Mkuu wa Mkoa
Shule za sekondari za Igowole na Kawawa zimepongezwa kwa kufanya vizuri katika mitihani ya kidato cha sita mwaka 2014 na kuung’arisha mkoa wa Iringa kitaifa.

Kauli hiyo imetolewa na Mwenyekiti wa Kamati ya mitihani wa Mkoa wa Iringa, bibi. Wamoja Ayubu alipokuwa akiongea na waandishi wa habari kuhusu mitihani inayoendelea ya kidato cha sita nchini ofisini kwake.

Wamoja amesema “nichukue nafasi hii kipekee kuzipongeza shule za sekondari za Igowole na Kawawa zote zipo katika halmashauri ya wilaya ya Mufindi kwa kufanya vizuri katika mitihani ya kidato cha sita mwaka 2014, ambapo Igowole iliahika nafasi ya kwanza kitaifa na Kawawa ilishika nafasi ya kumi. Hongereni sana kwa matokeo hayo yaliyoufanya mkoa wetu kung’ara.” “Aidha, nichukue nafasi hii pia kuzipongeza shule zote za mkoa wa Iringa kwa kuwa kwa ujumla wake zilifanya vizuri katika matokeo hayo kati ya shule 22 zilizokuwa na watahiniwa wa kidato cha sita mwaka 2014 shule 18 zilifaulisha kwa asilimia 100 kwa maana hakukuwa na mwanafunzi aliyepata daraja la 0”, aliongeza bibi. Wamoja.

Akiongelea mitihani inayoendelea ya kidato cha sita, Mwenyekiti wa Kamati ya Mitihani wa Mkoa wa Iringa amesema kuwa mkoa unavyo vituo 23 vya mtihani wa kidato cha sita vyenye jumla watahiniwa 2,162. Amesema kuwa vituo hivyo vitasimamiwa na wasimamizi 73 kati yao wasimamizi wakuu 23 na wasimamizi wasaidizi kutoka nje wapatao 50. 

Kwa mitihani ya ualimu, amesema vipo vituo 4 vyenye jumla ya watahiniwa 324 kati yao 122 ni ngazi ya Cheti na 202 ngazi ya Diploma. Ameongeza kuwa vituo hivyo vitasimamiwa na wasimamizi wakuu wanne na wasimamizi wasaidizi saba kutoka nje.
Mwenyekiti huyo ambaye pia ni Katibu Tawala Mkoa wa Iringa amewataka wasimamizi kutokuwa na tamaa ya fedha itakayowasababishia kujiingiza katika vitendo vya uvujishaji mitihani. Aidha, amewataka kuzingatia ratiba zilizotolewa ili kila mtihani ufanyike kwa wakati uliopangwa na kuwepo katika chumba cha mtihani kipindi chote ili kutotoa mwanya kwa watahiniwa kutazamiana.

Wakati huohuo Mkuu wa Mkoa wa Iringa, bibi. Amina Masenza amewatakia heri watahiniwa wote wa mitihani ya kidato cha sita mkoani Iringa na kuwataka kutokuwa na hofu na kufanya mitihani hiyo kwa kujiamini kwa kuzingatia yale yote waliyojifunza.

Mitihani wa kumaliza kidato cha sita na ualimu imeanza tarehe 04 Mei na itaendelea hadi tarehe 27 nchini kote.
=30=

Friday, May 1, 2015

HONGERA WAFANYAKAZI WOTE NCHINI


MTANDAO WA MAKTABA YA HABARI UNAWAPONGEZA WAFANYAKAZI WOTE KATIKA SIKUKUU YA WAFANYAKAZI DUNIANI.

MTANDAO HUU UNAENDELEA KUWATAKIA HERI WAFANYAKAZI WOTE KWA KIPINDI CHOTE KINACHOENDELEA ILI WAWEZE KUJILETEA MAENDELEO.

MTANDAO HUU UNAAMINI KUWA UWAJIBIKAJI NA NIDHAMU NI MSINGI WA MAENDELEO YA KIUCHUMI NA KIMKAKATI KWA KILA MFANYAKAZI

Thursday, March 26, 2015

MYUYU AWATAKA WATENDAJI WA KATA KUOMARISHA MAWASILIANO IRINGA



Na. Ofisi ya Mkuu wa Mkoa
Uimarishaji wa mawasiliano baina ya watendaji wa kata na maafisa tarafa umeelezwa kuwa ni nyenzo muhimu katika utekelezaji wa kazi za serikali.

Kauli hiyo imetolewa na Katibu Tawala Msaidizi, Sehemu ya Menejimenti ya Serikali za Mitaa, Ofisi ya Mkuu wa Mkoa wa Iringa, Bw. Wilfred Myuyu alipokuwa akiwasilisha mada kuhusu majukumu ya watendaji wa kata katika usimamizi wa shughuli mbalimbali za maendeleo wilayani Kilolo.

Bw. Myuyu amesema kuwa katika kutekeleza majukumu, mtendaji wa kata anatakiwa kuwasiliana mara kwa mara na afisa tarafa. Amesema kuwa kwa mujibu wa miongozo ya mawasiliano serikalini, afisa tarafa anajukumu la kusimamia watendaji wa kata ili watekeleze majukumu yao ipasavyo. Amesema kuwa kwa mujibu wa sheria ya Tawala za Mikoa Na. 19 ya mwaka 1997 iliyofanyiwa marekebisho mwaka 2006 inaweka wazi kuwa majukumu ya afisa tafara ni kusimamia shughuli za watendaji wa kata, vijiji na mitaa katika eneo lake.

Akiongelea majukumu ya watendaji wa kata katika ujenzi wa maabara unaoendelea, Bw. Myuyu amesema kuwa watendaji wa kata wanawajibu wa kuwatambua wadau mbalimbali wa maendeleo wanaoweza kuchangia na kuwahamasisha kwenye shughuli za ujenzi wa maabara ikiwa ni pamoja na wananchi. Ameongeza kuwa wanalo jukumu la kufanya ufuatiliaji na tathmini ya ujenzi unaoendelea ili kujiridhisha na uzingatiwaji wa viwango kusudiwa pamoja na kasi ya ujenzi. Amesema kuwa katika ufuatiliaji huo wanalojukumu la kufahamu changamoto zilizopo kushauri na kuzipatia ufumbuzi.

Jukumu linguine amelitaja kuwa ni kuhakikisha michango inayotolewa na wananchi na wadau inatumika kwa kuzingatia taratibu zinazoongoza matumizi ya fedha za umma na kutoa taarifa ya matumizi ya fedha hizo kwa wananchi.    

Bw. Myuyu ameongeza kuwa jukumu lingine ni kutoa taarifa za maendeleo ya ujenzi wa maabara juu ya hatua za utekelezaji zilizofikiwa, changamoto zilizopo na hatua za utatuzi wa changamoto.
=30=

MAJI MBEYA KUTOA LITA ZA UJAZO 51,000



Na. Mamlaka ya Majisafi na Usafi wa Mazingira Jiji la Mbeya
Mamlaka ya Majisafi na usafi wa mazingira Jiji la Mbeya ina uwezo wa kutoa maji lita za ujazo 51,000 kupitia vyanzo vyake 13 vya maji.

Katika risala ya wafanyakazi wa Mamlaka ya Majisafi na usafi wa mazingira Jiji la Mbeya iliyosomwa kwa mgeni rasmi na Fundi Mkuu, Kanda namba 1 Amiri Abdallah Sapi Mkwawa amesema kuwa mahitaji halisi ya maji katika Jiji la Mbeya ni mita za ujazo 38,000 kwa siku. Amesema kuwa mahitaji hayo hupanda wakati wa kiangazi kufikia mita za ujazo 43,000 kwa siku katika miezi ya Septemba hadi Novemba. Amesema kuwa Mamlaka ina jumla ya vyanzo 13 vya maji vyenye uwezo wa kutoa mita za ujazo 49,000-51,000 kwa siku. Amevitaja vyanzo hivyo kuwa ni Ivumwe I na Ivumwe II, Nzovwe, Imeta, Sisimba, Hanzya, Mfwizimo. Vyanzo vingine ni Nsalaga, Lunji, Mwatezi, Mkwanana, Iduda na Halewa. Amesema kuwa baadhi ya vyanzo vinapungukiwa maji wakati wa kiangazi kutokana na ukame na shughuli za kibinadamu kama uchomaji wa moto, kilimo na ukataji wa miti kwa ajili ya kuni na mkaa.

Mkwawa amesema kuwa katika kuhakikisha rasilimali maji inaendelea kuwepo, Mamlaka kwa kushirikiana na wadau imeendelea na jitihada za kuhakikisha kuwa vyanzo vya maji vinahifadhiwa. Amesema kuwa Mamlaka yake inahakikisha kuwa miundombinu ya majisafi na majitaka iliyopo inatunzwa. “Ili kulipa uzito suala hili Mamlaka kwa kushirikiana na wadau mbalimbali wakiwemo Jeshi la Polisi, Jeshi la kujenga Taifa, JWTZ, Wakala wa Misitu Tanzania (TFS), Baraza la Taifa la Hifadhi na Usimamizi wa Mazingira (NEMC) imeunda kamati ya mazingira kwa lengo la kuhifadhi vyanzo vya maji vilivyomo kwenye safu za mlima Mbeya ambapo leo hii utaikabidhi kamati sehemu ya vitendea kazi” Mkwawa. 

Mkuu, Kanda namba 1 amesema kuwa Mamlaka imeweza kuzalisha majisafi na salama na kuyasambaza kwa asilimia 96 ya wakazi wa Jiji la Mbeya. Amesema katika kuboresha miundombinu ya majisafi na majitaka katika Jiji la Mbeya fedha za ndani na fedha za wafadhili zimeendelea kutumika. Mradi wa awamu ya pili na mradi wa kupeleka maji uwanja wa Ndege wa Songwe ni miongoni mwa maboresho yaliyofanyika. 

Amesema katika kukabiliana na uharibifu wa miundombinu dira za maji, Mamlaka imeendelea kuwabaini na kuwachukulia hatua za kisheria baadhi ya wezi wa maji. Hatua nyingine ni kuhifadhi vyanzo vya maji kwa kushirikiana na wadau mbalimbali. 

Akiongelea changamoto zinazoikabili Mamlaka ya Maji, Mkwawa amezitaja kuwa ni baadhi ya wateja hasa taasisi za umma kutokulipa ankara za maji kwa wakati au kutokulipa kabisa. Changamoto nyingine ni baadhi ya vyanzo vya maji vimeendelea kupungukiwa na maji, kutokana na uharibifu wa mazingira na mabadiliko ya tabia nchi akitolea mfano chanzo cha mto Lunji na Mfwizimo na Iduda.