Thursday, January 26, 2017

SHILINGI 15,614.372 MILIONI KUTENGENEZA BARABARA IRINGA



Na Ofisi ya Mkuu wa Mkoa
Mkoa wa Iringa umepangiwa shilingi 15,614.372 milioni kwa ajili ya matengenezo ya barabara kwa mwaka wa fedha 2016/2017.

Akiwasilisha taarifa ya utekelezaji wa matengenezo ya barabara na miradi ya maendeleo hadi kufikia tarehe 31 Disemba, 2016 katika kikao cha Bodi ya Barabara Mkoa wa Iringa kilichofanyika katika ukumbi wa chuo Kikuu cha Mkwawa, Meneja wa Wakala wa Barabara (TANROADS) Mkoa wa Iringa, Mhandisi Daniel Kindole, alisema “jumla ya shilingi 15,614.372 milioni zimepangwa kutumika katika miradi mbalimbali ya matengenezo na ukarabati wa barabara mkoani Iringa kwa mwaka wa fedha 2016/2017.

Mhandisi Kindole alisema kuwa kati ya fedha hizo, shilingi 13,896.372 zinatoka mfuko wa barabara na shilingi 1,718.000 zinatoka mfuko wa maendeleo. 

Akielezea mchanganuo wa mpango wa matengenezo kwa fedha za mfuko wa barabaara, Meneja wa TANROADS Mkoa alisema kuwa barabara kuu zimetengewa shilingi 4,555.751 milioni kwa ajili ya matengenezo maalumu ya madaraja matano (shilingi 188.800 milioni), matengenezo ya kinga ya madaraja 140 (shilingi 140.000 milioni), matengenezo maalum kwa barabara za changarawe/ udongo km 16.6 (shulingi 502.587 milioni), matengenezo maalum barabara za lami km 3.8 (shilingi 1,683.853 milioni). Matengenezo mengine aliyataja kuw ni matengenezo ya kawaida baraabara za changarawe/ udongo km 66.8 (shilingi 422.192 milioni) na matengenezo ya kawaida barabara ya lami km 317.5 (shilingi 1,618.319 milioni).

Akiongelea barabara za mikoa, Mhandisi Kindole alisema kuwa matengenezo ya kawaida baraabara za lami, km 26.7 (shilingi 171.240 milioni), matengenezo ya kawaida barabara za chanagarawe/ udongo km 709.7 (shilingi 3,161.640 milioni), matengenezo maalum barabara za lami km 3.5 (shilingi 1,540.980). Matengenezo mengine ni matengenezo maalum barabara za changarawe/udongo km 158.3 (shilingi 3,843.528), matengenezo ya kuboresha barabara za changarawe km 18.3 (shilingi 354.833 milioni), matengenezo ya kinga ya madaraja 65 (shilingi 115.000 milioni) na matengenezo maalum ya madaraja 7 (shilingi 153.400 milioni).

Kuhusu mpango wa ukarabati wa barabara –miradi ya maendeleo, Meneja huyo alisema kuwa mpango huo utahusisha ujenzi wa kiwango cha lami kwa barabara mbili km 0.7 kwa shilingi 362.000 milioni. Mpango mwingine ni ujenzi wa daraja (Lukosi II) shilingi 100.000 milioni, ukarabati wa kiwango cha lami km 0.3 kwa shilingi 250.000 milioni na ukarabati wa kiwango cha changarawe kwa barabara nane kwa jumla ya km 52 shilingi 1006.000 milioni.
=30=

KUU IRINGA YAPONGEZWA KUDUMISHA AMANI



Na Ofisi ya Mkuu wa Mkoa
Kamati ya ulinzi na usalama mkoa wa Iringa imepongezwa kwa kusimamia amani na usalama mkoani hapa.

Pongezi hizo zilitolewa na Waziri Mkuu wa Jamhuri ya Muungano wa Tanzania, Kassim Majaliwa alipokuwa akiongea na watumishi wa shamba la mifugo la Asas na wananchi wa Iringa kwa ujumla alipofanya ziara fupi ya kukagua shamba hilo lililopo Igingilanyi wilayani Iringa.

Majaliwa alisema “leo napita kwenye shamba hili ila ziarani nitapita kiwanadani. Muhimu zaidi ni ulinzi na usalama. Pongezi kwa kamati ya ulinzi na usalama mkoa kusimamia amani na usalama. Endeleeni kuhakiki uingiaji holela wa raia wa kigeni. Uhamiaji imarisheni ulinzi katika mipaka. Tuendelee kuilinda nchi na mipaka yake”. 

Akiongelea matumizi ya ardhi, Waziri Mkuu alizitaka Halmashauri zote kusimamia matumizi bora ya ardhi. Alizitaka Halmashauri kuhakikisha kila mwenye nyumba anapewa hati. Aliziasa Halmashauari kuwa makini na utoaji wa hati mbili kwa kiwanja kimoja. “Halmashauri punguzeni migogoro hii. Wote tunaowagawia mashamba makubwa wapewe hati za umiliki kwa miaka iliyowekwa kwa mujibu wa sheria” alisisitiza Majaliwa.  

Waziri Mkuu alisema kuwa wengi wenye mifugo, hawaifugi bali wanaichunga. Alisema mifugo ni mingi ila haijaleta tija kwa wenye mifugo. Alizitaka Sekretarieti za mikoa kutoa elimu kwa wafugaji ili wafuge kisasa. Katika kuondoa migogoro baina ya wafugaji na wakulima, Waziri Mkuu aliagiza mifugo yote nchini kuwekwa alama ya utambulisho wa eneo husika. 

Kuhusu ufugaji katika shamba la mifugo la Asas, Majaliwa alisema “tunayo sababu ya kuendelea kumuunga mkono Asas kwa sababu anafuga kitaalam, katika mashamba yake ameajili watu wengi. Asas pia ananunua bidhaa za wafugaji wanaomzunguka. Endelea kupanua shamba, na serikali itakuunga mkono. Wewe unaunga mkono moja kwa moja azma ya serikali ya awamu ya tano na kuwa nchi ya viwanda”.

Waziri Mkuu alifanya ziara fupi katika shamba la mifugo mkoani Iringa wakati akiwa njiani kuelekea ziarani mkoani Njombe.
=30=

IRINGA KUSIMAMIA VIKUNDI VYA WAFUGAJI KUONGEZA THAMANI YA MAZAO



Na Ofisi ya Mkuu wa Mkoa
Serikali mkoani Iringa imeendelea kuhamasisha uundaji wa vikundi vya wafugaji ili kuongeza thamani ya mazao ya mifugo.

Kauli iyo ilitolewa na Mkuu wa Mkoa wa Iringa, Amina Masenza alipokuwa akiwasilisha taarifa fupi ya maendeleo ya mkoa wa Iringa kwa Waziri Mkuu wa Jamhuri ya Muungano wa Tanzania aliyefanya ziara fupi mkoani Iringa jana.

Masenza alisema “Halmashauri za mkoa wa Iringa zimeweza kuendelea kuhamasisha uundwaji wa vikundi vya wafugaji ili kuboresha ufugaji na kuongeza thamani ya mazao ya mifugo. Kwa sasa mkoa una vyama vitatu vya ushirika vya wafugaji. Vyama hivi vinasaidia wanachama kuwa na vituo maalum vya kukusanya maziwa na kuuza kiwandani pamoja na kusaidia wanachama kwa pamoja kupata elimu ya ufugaji wa kisasa ili kuongeza uzalishaji wa maziwa”.

Aliongeza kuwa idara ya Magereza mkoani hapa inaendelea na mradi wa ufugaji ng’ombe wa maziwa na serikali imeunganisha idara hiyo na kampuni ya ASAS ili kuweza kuzalisha ng’ombe wa maziwa kwa njia ya kisasa zaidi.

Mkuu huyo wa mkoa alisema kuwa uzalishaji wa maziwa umeongezeka kutoka lita 23,268,437 mwaka 2015 hadi lita 29,366,559 mwaka 2016. “Uzalishaji huu bado hautoshi, lengo la mkoa ni kufikia uzalishaji wa lita 40,000,000 ifikapo Disemba, 2017” alisema Masenza. 

Mkoa umekuwa ukitoa elimu kwa wafugaji ya namna bora ya kuchanja na kuogesha mifugo yao kwa wakati. Elimu imesaidia kujikinga na magonjwa hatari kama ndigana kali na baridi, ugonjwa wa kuoza miguu na midomo na ugonjwa wa mapafu.
=30=

WATU WAPOTEZA HAKI KWA KUTOKUJUA KUSOMA NA KUANDIKA



Na Mwandishi Maalum Iringa
Serikali imesema kuwa watu wengi wamekuwa wakipoteza haki zao za msingi kutokana na kutokujua kusoma na kuandika nchini. 

Kauli hiyo ilitolewa na Naibu Waziri wa Elimu, Sayansi na Teknolojia na Mafunzo ya Ufundi, Mhandisi Stella Manyanya alipokuwa akiongea na wananchi wa kata ya Ibumu wilayani Kilolo jana.

Mhandisi Manyanya alisema “ndugu zangu, kutokujua kusoma na kuandika kumewafanya wananchi wengi kupoteza haki zao katika kupiga kura. Wapo watu wamedanganywa na kushindwa kufanya maamuzi sahihi wakati wa upigaji kura. Watu wengine kwa kutokujua kusoma na kuandika wameibiwa katika kufanya miamala ya fedha. 

Aidha, siri za watu zimewekwa hadharani na watu ambao waliwaamini. Hivyo, kujua kusoma na kuandika ni jambo la msingi sana”.

Aidha, aliutaka uongozi wa wilaya ya Kilolo kuhakikisha kila mtoto mwenye umri wa kwenda shule anapelekwa ili kuondoa tatizo la ucheleweshaji watoto kuanza shule. Alisema kuwa kuwachelewesha watoto kuanza shule kunapelekea baadhi yao kulazimika kuanza kujifunza elimu kupitia mfumo usio rasmi na Memkwa. 

Kupitia mfumo usio rasmi baadhi yao wamekuwa wakiishia njiani kutokana na kukata tamaa. “Katika hili la kupeleka mtoto shule, mzazi au mlezi yeyote atakayekaidi achukuliwe hatua. Wazazi na walezi wameacha kupeleka watoto wao shule, kutwa wanawapeleka mkoani Dar es Salaam kufanya kazi za ndani. Kama ni kufanya kazi waende baada ya kumaliza shule. Watoto wadogo hata maana ya kazi na mshahara hawajafahamu” alisisitiza Mhandisi Manyanya.

Naibu Waziri alisema kuwa suala la kusoma na kuandika katika jamii ni la muhimu sana na halitakiwi kuonewa aibu. “Tusilionee aibu suala hili. Wabunge kama kweli tunawapenda wananchi wetu, lazima tuwahimize kusoma na kuandika. Jambo hili litafanya tuache kumbukumbu na historia nzuri kwenye majimbo yetu” alisisitiza Mhandisi Manyanya. Katika kuhakikisha jamii inajua kusoma na kuandika, aliagiza kuanzishwa kwa madarasa ya watu wazima katika maeneo mbalimbali ili watu waliokosa fursa hiyo waweze kuipata nje ya mfumo rasmi na elimu hiyo ipewe uzito mkubwa.

Ikumbukwe kuwa mkoa wa Iringa una kiwango cha asilimia 18 cha watu wasiojua kusoma na kuandika. 
=30=    

            

IRINGA KUSIMAMIA UPIMAJI VIWANJA



Na Ofisi ya Mkuu wa Mkoa
Mkoa wa Iringa umeendelea kusimamia upimaji wa viwanja na uandaaji wa michoro ya mipango miji ili kuwa na miji iliyopangwa vizuri. 

Kauli hiyo ilitolewa na Mkuu wa Mkoa wa Iringa, Amina Masenza alipokuwa akiwasilisha taarifa ya sekta ya ardhi mkoa wa Iringa kwa Naibu Waziri wa Ardhi, Nyumba na Maendeleo ya Makazi, Dr. Angelina Mabula ofisini kwake hivi karibuni.

Masenza alisema “usimamizi wa miji na uandaaji wa mipango ya matumizi bora ya ardhi umeendelea kufanyika na kusimamiwa katika Halmashauri zote za Mkoa. Ili kuhakikisha kunakuwepo na miji iliyopangwa, mkoa umeendelea kusimamia uandaaji wa michoro ya mipango miji na upimaji wa viwanja kwa ajili ya matumizi mbalimbali katika Halmashaauri zote za Mkoa”

Alisema kuwa jumla ya viwanja 37,463 vimepimwa mkoani Iringa. Aliongeza kuwa katika Halmashauri ya Manispaa viwanja 21,230, Halmashauri ya mji wa Mafinga viwanja 11,950, Halmashauri ya wilaya ya Iringa viwanja 1,500, Halmashauri ya wilaya ya Kilolo viwanja 2,020 na Halmashauri ya wilaya ya Mufindi viwanja 763.

Alisema kuwa mkoa umeendelea kusimamia na kuhakikisha makazi holela na ujenzi wa milimani unapungua na kuisha kabisa kwa kuchukua hatua madhubuti. Hatua hizo ni kusimamia ukamilishaji wa mpango kabambe wa mji wa Iringa (Iringa Master Plan) ili kuhakikisha maeneo yote yanakuwa na matumizi na kurahisisha usimamizi wake. Hatua nyingine ni kuendelea kusimamia zoezi la kurasimisha makazi ya wananchi. .  
=30=