KAMPENI TAMBUZI TB KUTOA ELIMU NA KUPIMA WANANCHI IRINGA

Na. Dennis Gondwe, Ofisi ya Mkuu wa Mkoa- IRINGA

Kampeni tambuzi za kifua kikuu na magonjwa yasiyoambukiza inalenga kutoa elimu kwa jamii na kupima vimelea vya ugonjwa wa kifua kikuu ili matibabu yaweze kuanza mapema.

Kauli hiyo ilitolewa na daktari bingwa wa kifua kikuu cha kawaida na kifua kikuu sugu kutoka hospitali ya Kibong’oto Dr. Isaya Jelly alipokuwa akiongea na wanahabari mkoani Iringa kuhusu kampeni tambuzi za kifua kikuu na magonjwa yasiyoambukiza katika bustani ya Manispaa ya Iringa.

 

Dr Isaya Jelly

Dr. Jelly ambae pia anaratibu shughuli za shiriki la Save the Children kupitia mpango wa Taifa wa kifua kikuu na ukoma (NTLP) alisema kuwa kampeni hiyo imelenga kuwasogeza wananchi karibu na huduma za upimaji na tiba. 

“Kampeni hii imelenga kuwasogeza karibu wananchi kupata habari na kupima kama wanavimelea vya ugonjwa wa kifua kikuu na kuanza dawa” alisema Dr. Jelly.

Dr. Jelly alisema kuwa muitikio wa wananchi katika kampeni hiyo ni mzuri. “Hali ya kimaisha inafanya watu wasizifuate huduma katika vituo vya afya, kwa kuongopa mlolongo uliopo katika vituo vya huduma. Huduma za hapa uwanjani ni za haraka haraka” alisema Dr. Jelly. 

Alisema kuwa wananchi watakao pima vimelea vya ugonjwa wa kifua kikuu baada ya uchunguzi majibu yao watatumiwa kupitia simu zao za mkononi. Aidha, kwa wananchi watakaopima virusi vya ukimwi majibu watapewa baada ya kupewa somo la kuwekwa sawa kisaikilojia.

Katika kampeni tambuzi za kifua kikuu na magonjwa yasiyoambukiza, imelenga kuwafikia wagonjwa 100 katika Manispaa ya Iringa na zoezi hilo litaelekea katika gereza la Iringa kesho kwa ajili ya kuwapima na kuwaanzishia tiba wanaorekebishwa tabia watakaogundulika na vimelea vya kifua kikuu.

=30=

IRINGA KUIBUA WAGONJWA WA TB NA KUWATIBU

Na Mwandishi Maalum Ofisi ya Mkuu wa Mkoa-IRINGA

Mkoa wa Iringa imejizatiti kuwaibua wagonjwa wa kifua kikuu ili waanze matibabu mapema na kuzuia ugonjwa huo kuambukiza wengine.

Kauli hiyo ilitolewa na mkuu wa mkoa wa Iringa, mheshimiwa Amina Masenza alipokuwa alizindua kampeni tambuzi za kifua kikuu na magonjwa yasiyoambukiza katika uwanja wa kumbukumbu ya Samora mjini Iringa jana.

 

Mkuu wa Mkoa wa Iringa mhe Amina Masenza

Katibu Tawala Mkoa, Bibi Wamoja Ayubu

Mheshimiwa Masenza alisema “njia kuu ya kuzuia kuenea kwa kifua kikuu ni mgonjwa kugunduliwa mapema pale anapoanza kuonyesha dalili za awali na kuwekwa katika matibabu bila kuchelewa. Mgonjwa mmoja anaweza kuwaambukiza watu wasiopungua 20 kwa mwaka. Bila ya kuweka juhudi za kuwapata wagonjwa mapema na kuwatibu, kifua kikuu kitaendelea kuenea na kuwamaliza watu wengi nchini”. 

Alisema kuwa kwa kipindi cha Januari 2016-Juni 2017, mkoa wa Iringa umeweza kugundua wagonjwa wapatao 455. Alisema kuwa kwa lengo la Manispaa ya Iringa ni kupima na kugundua watu 528 kwa kila watu 100,000. Alisema kuwa hali hiyo, inadhihirisha uhiotaji wa kupima na kugundua watu wengi zaidi.

Mkuu wa mkoa alisema kuwa ni rahisi kujikinga na ugonjwa wa kifua kikuu. Alizitaja dalili za kifua kikuu kuwa ni kukohoa kwa wiki mbili au zaidi na homa za mara kwa mara hasa nyakati za jioni. Dalili nyingine ni kutokwa na jasho lisilo la kawaida wakati wa usiku hata kama kuna baridi. Kutoa makohozi yaliyochanganyika na damu na kupungua uzito ni miongoni mwa dalili hizo. 

“Nawashukuru sana wenzetu wa shirika la Save the Children kwa kuunga juhudi za Serikali za kuwatambua na kuwapima wale watakaobainika kuwa na dalili za kifua kikuu katika jamii yetu” alisema mheshimiwa Masenza.

Alishauri kuwa mtu anapoona mojawapo ya dalili hizi kuwahi katika kituo cha huduma za afya kwa uchunguzi na tiba. “Serikali bado inaendelea kutoa dawa za kifua kikuu bila ya malipo yoyote. Dawa zinapatikana katika vituo vyote vya umma na vile vya binafsi” alisisitiza mheshimiwa Masenza.

=30=

IRINGA WATAHADHARISHWA MAJI YA MTO RUAHA

Na. Dennis Gondwe, Ofisi ya Mkuu wa Mkoa-IRINGA

Wananchi wa mkoa wa Iringa wametahadharishwa kutumia maji ya mto Ruaha kutokana na vipimo kuonesha kuwa maji hayo yanavimelea vya ugonjwa wa Kipindupindu.

Tahadhari hiyo ilitolewa na mkuu wa mkoa wa Iringa, mheshimiwa Amina Masenza alipokuwa akiongea mahojiano ya moja kwa moja kwenye kipindi cha nyota ya asubuhi kinachorushwa na kituo cha redio Furaha cha mjini Iringa leo.

Mheshimiwa Masenza alisema “maji ya mto Ruaha siyo safi na salama. Baada ya kuyapima imegundulika yana vimelea vya ugonjwa wa Kipindupindu”. Hivyo, amewataka wananchi kuchukua tahadhari katika matumizi ya maji hayo.

Wakati huohuo, aliwataka wananchi wa mkoa wa Iringa kuongeza kasi ya ujenzi wa vyoo bora. Alisema kuwa choo bora ni kile kisichomruhusu mtumiaji kukutna na kile anachokitoa ili kisimsababishie maradhi. 

Alisema kuwa choo ni sehemu ya kupumzika hivyo, kinatakiwa kutayarishwa vizuri ili kumstiri anayekitumia kwa kuwa na nafasi ya kutosha na kuruhusu hewa ya kutosha kupita. Aliwataka wananchi kuunga mkono juhudi za Serikali zinazohamasisha kujenga jamii yenye afya njema.

=30=

WABABA IRINGA WATAKIWA KUSHIRIKI MAKUZI NA MAENDELEO YA WATOTO

Na. Ofisi ya Mkuu wa Mkoa, Iringa

Wakina baba mkoani Iringa watakiwa kushiriki kikamilifu katika makuzi na maendeleo ya watoto ili kujenga jamii familia imara isiyokuwa na utapiamlo.

Kauli hiyo ilitolewa na mkuu wa mkoa wa Iringa, Mheshimiwa Amina Masenza akipokuwa akizindua kampeni ya Mama Msosi Lishe katika bustani ya Manispaa ya Iringa jana.

 

Mkuu wa Mkoa wa Iringa, Mhe Amina Masenza alimpatia uji mtoto Pricila Mgaya katika uzinduzi wa Kampeni ya Mama Msosi Lishe

Mheshimiwa Masenza alisema kuwa Serikali ya awamu ya tano chini ya Rais Dr John Magufuli inatambua umuhimu na kuwekeza katika masuala ya lishe nchini. 

“Huo ni mojawapo ya mkakati wa kufanikisha azma ya Serikali kufikia uchumi wa kipato cha kati na viwanda ifikapo 2025. Baraza la Umoja wa Mataifa liliweka azimio la kuwa kati ya mwaka 2016 hadi mwaka 2025 ni miaka ya kuchukua Hatua katika kutekeleza masuala ya lishe” alisema mheshimiwa Masenza. 

Aliwataka wananchi wa mkoa wa Iringa kuunga mkono juhudi zinazofanywa na Serikali katika kupambana na tatizo la utapiamlo.

Aidha, aliwataka kina baba kushiriki kikamilifu katika ufuatiliaji wa makuzi na maendeleo ya watoto pasipo kuwaachia kina mama peke yao. 

Alisema kuwa hiyo ni njia ya kukabiliana na tatizo la utapiamlo mkoani Iringa. Njia nyingine aliitaja kuwa ni uandaaji wa chakula vizuri kutokana na maeneo mengi huloweka mahindi muda mrefu na kupoteza madini na vitamin. Aliongeza kuwa ulishaji wa watoto wadogo uzingatie vyakula mchanganyiko, idadi ya milo na kiasi cha chakula cha kumpa mtoto kulingana na umri kuanzia kipindi mtoto anapotimiza miezi 6 mpaka miaka miwili. 

Vilevile, aliwataka kina mama wajawazito kuanza mapema kliniki ya uzazi ili kupata huduma muhimu. Alizitaja huduma hizo muhimu kuwa ni kupata vidonge vya kuongeza damu, kusaidia ukuaji bora wa mtoto, dawa za minyoo, kuzuia Malaria na VVU.

Katika maelezo ya awali ya Katibu Tawala Mkoa wa Iringa, yaliyotolewa na Katibu Tawala msaidizi, Sehemu ya Mipango na Uratibu, Nuhu Mwasumilwe alisema kuwa changamoto kubwa katika Mkoa wa Iringa ni uelewa mdogo katika jamii wa masuala ya lishe. Changamoto hizo alizitaja kuwa ani uandaaji wa chakula hasa ugali kwa kutumia mahindi yaliolowekwa kwa muda mrefu  maarufu kama ‘kiverege’ husababisha madini na vitamini zote kupotea. 

Changamoto nyingine ni watoto wadogo kulishwa milo ya watu wazima isiyozingatia vyakula mchanganyiko na ushiriki mdogo wa akinababa katika ufuatiliaji wa makuzi na maendeleo ya mtoto hivyo kumwachia mama majukumu yote. Na wakina mama wajawazito kuanza kliniki ya uzazi kwa kuchelewa.

Alisema kuwa changamoto hizo ziliifanya Ofisi ya Mkoa wa Iringa kwa kushirikiana na wadau kuandaa shindano la Mama Msosi Lishe litakalohusisha wanawake watakao andaa chakula bora cha familia. Aliongeza kuwa katika uandaaji huo, watapimwa uelewa wao juu ya umuhimu wa lishe bora, usafi wa mazingira yanayomzunguka na matumizi ya nishati mbadala ili kupunguza uharibifu wa mazingira.

Kampeni ya Mama Msosi Lishe mwaka 2017 inaongozwa na kaulimbiu isemayo ‘Mama Msosi lishe’. Chimbuko lake ni kupambana na utapiamlo hasa udumavu kutokana na Mkoa wa Iringa kuwa miongoni mwa Mikoa 5 ya Tanzania yenye kiwango kikubwa cha udumavu, kwa mujibu wa utafiti wa viashiria vya afya (TDHS, 2015/2016) ukiwa na asilimia 42 ya udumavu.

=30=

MKOA WA IRINGA WAADHIMISHA SIKU YA KISUKARI KWA MAZOEZI YA VIUNGO

Na. Ofisi ya Mkuu wa Mkoa- Iringa

Wananchi wa mkoa wa Iringa wametakiwa kujenga utamaduni wa kufanya mazoezi ya viungo mara kwa mara ili kuondokana na hatari ya kupatwa na ugonjwa wa kisukari.

Kauli hiyo ilitolewa na mratibu wa Mkoa kwa magonjwa yasiyoambukizwa Dr. Tatu Mbotoni alipokuwa akielezea umuhimu wa mazoezi katika uwanja wa kumbukumbu ya Samora mjini Iringa katika mazoezi maalum ya viungo katika maadhimisho ya siku ya kisukari duniani jana.

Dr. Mbotoni alisema “mazoezi ya leo tarehe 11 Novemba, 2017 yamefanyika ngazi ya mkoa kuadhimisha siku ya kisukari duniani kwa mkoa wetu wa Iringa. Nichukue nafasi hii kuwataarifu kuwa tarehe 18 Novemba, 2017 tutafanya zoezi la upimaji wa afya hasa ugonjwa wa kisukari ikiwa ni maadhimisho ya siku ya kisukari duniani”. 

Alisema kuwa wananchi watatangaziwa eneo zoezi hili litakapofanyika baada ya taratibu za kiutawala kukamilika.

Alisema kuwa ugonjwa wa kisukari ni kati ya magonjwa yasiyoambukiza unaosababishwa na mfumo wa maisha usio wa kiafya. Mifumo hiyo aliitaja kuwa ni unene uliopitiliza na uzito mkubwa. 

“Ni muhimu kufanya mazoezi ili kupunguza uzito na mafuta hatarishi mwilini vitu ambavyo visipothibitiwa vinaweza kusababisha ugonjwa wa kisukari” alisisitiza Dr. Mbotoni.

Mazoezi maalum ya viungo kwa mkoa wa Iringa yamefanyika kuadhimisha siku ya kisukari dunuani yakiongozwa na kaulimbiu isemayo ‘Wanawake na kisukari, haki yetu ya afya bora ya baadae’. 

Mazoezi hayo yamehudhuriwa na mamia ya wakazi wa Manispaa ya Iringa na viunga vyake pamoja na watumishi kutoka taasisi mbalimbali za umma na binafsi wakiongozwa na Katibu Tawala Mkoa wa Iringa.

=30=