ZIARA YA RAIS WA TUCTA KUTEMBELEA MABANDA YA MAONESHO YA MEI MOSI 2018 KICHANGANI

Rushwa Yatakiwa Kuwa Historia Iringa -Prof Kahyarara

Na. Ofisi ya Mkuu wa Mkoa, Iringa

Taasisi ya kuzuia na kupambana na rushwa nchini (TAKUKURU) mkoa wa Iringa imetakiwa kuhakikisha rushwa inakuwa historia mkoani hapa kwa kushughulikia taarifa za malalamiko ya rushwa kutoka kwa wananchi ili waendelee kuwa na Imani na taasisi hiyo.

Rai hiyo imetolewa na mkurugenzi mkuu wa NSSF, Prof. Godius Kahyararavalipotembelea banda la TAKUKURU katika maonesho ya shughuli na huduma za wafanyakazi yanayoendelea katika uwanja wa Kichangani mjini Iringa jana.

Mkurugenzi Mkuu wa NSSF Prof. Kahyarara alipotembelea banda la TAKUKURU Iringa

Prof. Kahyarara alisema kuwa TAKUKURU ina wajibu wa kuhakikisha rushwa inakomeshwa mkoani Iringa ili wananchi waweze watekeleza majukumu yao. Alisema kuwa rushwa imekuwa ikikwamisha maendeleo ya wananchi na kuwanyima haki ya kupata huduma. 

“TAKUKURU mnawajibu wa kuifanya Iringa kuwa eneo huru dhidi ya rushwa. Na huu ndiyo wajibu wenu wa msingi” alisema Prof. Kahyarara.

Awali afisa muelimishaji wa TAKUKURU mkoa wa Iringa, Aneth Mwakatobe alieleza kuwa hali ya rushwa mkoani Iringa imeendelea kushuka katika miaka ya hivi karibuni. Alisema kuwa hali ya rushwa imeendelea kushuka mkoani hapa kutokana na uelewa wa wananchi kuwa mkubwa. 

“TAKUKURU mkoa wa Iringa imekuwa ikitoa elimu kwa wananchi kuhusiana na jinsi ya kukabiliana na rushwa. Katika kuonesha uelewa mkubwa kwa wananchi, wananchi wameendelea kutoa taarifa kwetu na kusaidia uchunguzi kufanyika na kutoa matokea chanya” alisema Mwakatobe.

Afisa huyo aliyataja maeneo yanayolalamikiwa kuwa na vitendo vingi vya rushwa ni yale ambayo watoa huduma wake wanakutana na wananchi moja kwa moja. Alitolea mfano wa maeneo hayo kuwa ni halmashauri, polisi, mahakama, ardhi, na afya.

TAKUKURU ni moja ya waoneshaji wa huduma katika mabanda ya maonesho ya Mei Mosi kitaifa yanayofanyika katika viwanja vya kichangani mjini Iringa yakitangulia sherehe ya Mei Mosi kitaifa itakayohudhuriwa na Rais wa Jamhuri ya Muungano wa Tanzania, Dkt. John Pombe Magufuli.

=30=    

ZAIRA YA WAZIRI MWIJAGE KUTEMBELEA MABANDA YA MAONESHO YA MEI MOSI 2018

Wafanyakazi Rasilimali Muhimu Uchumi wa Viwanda- Waziri Mwijage

Na. Ofisi ya Mkuu wa Mkoa, Iringa

Wafanyakazi ni rasilimali muhimu katika kuleta mabadiliko ya kiuchumi na kukuza pato la nchi ikilinganishwa na rasirimali nyingine zote.

Kauli hiyo ilitolewa na waziri wa viwanda na biashara, Charles Mwijage alipokuwa akifungua kongamano la Tanzania ya viwanda lililofanyika katika ukumbi wa Kichangani mjini Iringa jana.

Waziri wa viwanda na biashara, Charles Mwijage

Waziri Mwijage alisema kuwa nchi ina rasilimali nyingi sana. Rasilimali muhimu aliitaja kuwa ni rasilimali wafanyakazi. Alisema kuwa wafanyakazi ni muhimu katika kuleta mabadiliko ya kiuchumi na kukuza pato la taifa.

Akiongelea uchumi wa kati, waziri huyo alisema kuwa uchumi wa kati unategemea shughuli za watu katika kujenga viwanda vinavyochakata na kusindika malighafi za mazao ya shamba. 

Dhamira ya serikali ni kuhakikisha nchi inakuwa na sekta ya viwanda iliyo imara, shindani na endelevu. Alisema kuwa viwanda vinavyoongelewa siyo viwanda vya kufa kama binadamu, bali ikitokea vikafa, vinazaliwa vingine na kuendeleza nyororo wa thamani. Alisema kuwa watu wengi wamekuwa na mtazamo tofauti wa dhana ya kiwanda, alisisitiza kuwa mtu akiwa na cherehani nne hicho tayari ni kiwanda kidogo. Viwanda vidogo vinasaidia kupunguza kusafirisha mazao na hatari ya mazao hayo kuharibika wakati wa usafirishaji wake.

Waziri Mwijage alitoa wito kwa jamii kuwashawishi wafanyakazi kuanzisha viwanda tofauti na utaratibu wa sasa wa kukopa kwa ajili ya kununua magari. Aidha, alizitaka mamlaka za serikali za mitaa kutenga maeneo kwa ajili ya uanzishwaji wa viwanda. Alishauri viwanda vinavyoanzishwa viwe vinavyoongeza thamani.

Waziri Mwijage, alisema kuwa mipango iliyopo ni kuufanya uchumi ujikite katika maendeleo ya watu. “Uchumi tulionao ni wa maendeleo ya vitu zaidi kuliko maendeleo ya watu, hivyo tunataka kufanya mageuzi ya maendeleo ya watu ambayo yanapimwa kwa vitu vitatu”. Alivitaja vitu hivyo kuwa ni elimu, afya na kipato kitakachopatikana kutokana na uchumi wa viwanda.

Alisema kuwa serikali inajukumu la kutengeneza mazingira mazuri ya uwekezaji.

=30=

ZIARA YA MKUU WA MKOA WA IRINGA KUTEMBELEA MABANDA YA MAONESHO YA MEI MOSI 2018 KICHANGANI

RC MASENZA IRINGA ARIDHISHWA NA MAANDALIZI YA MAONESHO YA MEI MOSI 2018

Na. Ofisi ya Mkuu wa Mkoa, Iringa

Mkuu wa mkoa wa Iringa,  Amina Masenza ameridhishwa na hali ya maandalizi ya mabanda ya maonesho ya shughuli na huduma zinazofanywa na wafanyazi nchini.

Akitoa hali ya tathmini ya mabanda ya maonesho baada ya kuyatembelea jana jioni mbele ya waandishi wa habari katika uwanja wa maonesho wa Kichangani, Masenza alisema kuwa ameridhishwa na hali ya mabanda. 

Mkuu wa Mkoa wa Iringa, akipokelewa na Meneja wa TTCL Iringa

“Hadi sasa mabanda yamekwisha pambwa vizuri na huduma na bidhaa mbalimbali zimeanza kuoneshwa mezani na wananchi wakitembelea mabanda hayo makumi kwa mamia”. Aidha, alitoa rai kwa wajasiriamali wa mkoa wa Iringa kuendelea kujitokeza kuonesha bidhaa zao kwa sababu nafasi za mabanda bado zipo. Alisema maonesho ya bidhaa na huduma za wanafanyakazi ni fursa nzuri kujitangaza na kutangaza huduma na bidhaa zinazofanywa na wafanyakazi ndani na nje ya mkoa.

Mkuu wa mkoa amewataka wananchi wote katika Manispaa ya Iringa na vitongoji vyake kujitokeza kwa wingi kutembelea mabanda na kujionea bidhaa na huduma zinazooneshwa pamoja na kujifunza mambo mbalimbali yanayohusu masuala afya na usalama mahala pa kazi. Alisema kuwa maonesho hayo yatafunguliwa rasmi tarehe 27/4/2018.

Awali mkuu wa mkoa alitembelea uwanja wa michezo wa Samora kuangalia ukarabati kwa ajili ya maadhimisho ya sherehe za Mei Mosi, 2018.

Mkoa wa Iringa ni mwenyeji wa maadhimisho ya siku ya wafanyakazi (Mei Mosi) kitaifa na mgeni rasmi atakuwa Rais wa Jamhuri ya Muungano wa Tanzania, Dkt John Pombe Magufuli.

=30=

WASICHANA MIAKA 14 KUCHANJWA DHIDI YA SARATANI YA KIZAZI IRINGA

Na. Ofisi ya Mkuu wa Mkoa, Iringa

Wasichana wenye umri wa miaka 14 mkoani Iringa wametakiwa kujitokeza kwa wingi katika vituo vya kutolea huduma za chanjo ili kupata chanjo ya saratani ya mlango wa kizazi.

Rai hiyo ilitolewa na mkuu wa mkoa wa Iringa, Amina Masenza alipokuwa akizindua chanjo mpya ya saratani ya mlango wa kizazi mkoani Iringa iliyofanyika katika uwanja wa mashujaa mjini Mafinga jana.

Mkuu wa Mkoa wa Iringa, Amina Masenza akikata utepe kuzindua utoaji wa chanjo ya saratani ya mlango wa kizazi mjini Mafinga

Masenza alisema kuwa serikali imeanzisha chanjo mpya ya saratani ya mlango wa kizazi kwa wasichana wenye umri wa miaka 14 nchini. Alisema kuwa chanjo hiyo ina lenga kuwakinga wasichana hao dhidi ya ugonjwa wa saratani ya mlango wa kizazi.

“Serikali inawaomba wananchi wetu wawahimize walengwa wote kufika katika kituo cha kutolea huduma za chanjo na akina mama nao wajitokeze kwa wingi ili waweze kufanyiwa uchunguzi dhidi ya ugonjwa wa saratani. Kwa kufanya hivyo kutasaidia kuwakinga na magonjwa na vifo, hii itaiwezesha serikali kutumia fedha ambazo zingetumika kugharamia matibabu zitumike katika miradi mingine ya maendeleo” alisema Masenza.

Alisema kuwa, chanjo ni uwekezaji katika uchumi wa taifa, serikali inatoa chanjo bila malipo katika vituo vya serikali, binafsi na mashirika ya dini na yasiyo ya kiserikali.

Kwa kuwa chanjo ni uwekezaji katika uchumi wa Taifa, serikali hutoa chanjo hizi bila malipo katika vituo vyote vinavyotoa huduma za chanjo vikiwemo vya serikali, binafsi, mashirika ya dini na yasiyo ya kiserikali.

=30=

RAS Iringa Netboli yaibugiza Ngorongoro Magoli 54-3

Timu ya Netiboli ya RAS Iringa imeiduwaza timu ya netiboli ya mamlaka ya hifadhi ya taifa ya Ngorongoro kwa kuibugiza magoli 54-3.

Katika mchezo ulioanza kwa kasi kubwa ilionekana dhahiri kabisa kuwa timu ya RAS Iringa imedhamiria kuibuka na ushindi ambapo dakika za mwanzo walionekana kuwapeleka kasi Ngorongoro jambo lilitotafsiriwa na wengi kuwa timu hiyo toka kaskazini mwa nchi ilipata hofu hata kabla ya mchezo.

Mchezo huo uliochezwa katika uwanja wa chuo kikuu cha kikatoliki cha Ruaha (RUCU) ulishuhuriwa na mamia ya wananchi wapenda michezo.

Baada ya mchezo huo, mratibu wa timu zote za RAS Iringa, Issa Matea alisema kuwa ushindi huo ni salamu za awali kwa timu pinzani. Akiongelea ushindi huo, alisema kuwa ni ushindi huo ni chachu na hamasa aliyoitoa katibu tawala mkoa wa Iringa, Wamoja Ayubu kwa timu hiyo yenye wanadada mahiri.

=30=

RAS Iringa yaiburuza 2-0 MUHAS Kamba

Timu ya kuvuta kamba ya RAS Iringa wanawake imeishinda timu ya kuvuta kamba ya MUHAS wanawake kwa mivuto 2-0. Katika mvutano wa aina yake uliofanyika katika uwanja wa shule ya msingi Mlandege na kushuhudiwa na mamia ya wapenda michezo wa mkoa wa Iringa na wageni kutoka sehemu mbalimbali waliofika mkoani hapa kwa ajili ya sherehe za Mei Mosi, 2018. 

Akiongea baada ya mvutano huo, Mratibu wa timu zote za RAS Iringa, Issa Matea alisema kuwa timu ya RAS Iringa maarufu kama Kisiki imepata ushindi huo kutokana na mshikamano na kujituma. Alitoa rai kwa timu washindani kuwa chonjo kwa sababu timu hiyo inalojukumu moja tu katika michezo hiyo. 

Alilitaja jukumu hilo kuwa ni kulinda heshima ya mkoa wa Iringa kwa kuibuka na ushindi katika mivuto yote katika michezo ya Mei Mosi, 2018.

=30=