Tuesday, November 17, 2015

HOTUBA YA MKUU WA MKOA WA IRINGA MHE. AMINA MASENZA KATIKA UZINDUZI WA MAADHIMISHO YA SIKU YA KUNAWA MIKONO DUNIANI, SIKU YA CHOO DUNIANI NA WIKI YA USAFI TANZANIA KATIKA KIJIJI CHA UHAMBINGETO, HALMASHAURI YA WILAYA YA KILOLO MKOANI IRINGA NOVEMBA 14, 2015




Katibu Tawala Mkoa,
Wakurugenzi wa Halmashauri,
Viongozi wa Serikali na Taasisi mbalimbali
Waandishi wa Habari,
Wageni waalikwa,
Mabibi na Mabwana.

Awali ya yote napenda kuchukua nafasi hii kumshukuru Mwenyezi Mungu kwa kutuwezesha kujumuika na kushiriki kikamilifu katika Siku ya  Uzinduzi wa Wiki ya Usafi wa Mazingira Kimkoa inayofanyika hapa kijiji cha Uhambingeto.

Napenda kutoa pongezi maalum kwa wananchi wa Uhambingeto kwa kufika hapa kwa wingi kushiriki katika uzinduzi huu wa maadhimisho haya kimkoa. Kufika kwenu ndiyo ufanisi wa shughuli hii na mafanikio yake. Nitakuwa mwizi wa fadhila kama sitawashukuru washirika wetu wa maendeleo kwa michango na misaada yao adhimu. Marafiki zetu wametuunga mkono katika juhudi zetu za kuboresha huduma za usafi wa mazingira mijini na vijijini. Ninawaomba, wawakilishi wa mashirika waliopo hapa, wazipokee na kuzifikisha shukrani zetu za dhati, kwa wakuu wa mashirika yao.

 
Mkuu wa Mkoa wa Iringa, Mhe. Amina Masenza

Umuhimu wa Maadhimisho

Ndugu Wananchi;
Maadhimisho ya Siku ya kunawa mikono Duniani, Siku ya choo Duniani na wiki ya Usafi Tanzania, ambayo yameanza rasmi mwaka 2013, ni ushahidi wa umuhimu ambao Serikali na wananchi wanaoutoa katika kuboresha usafi wa mazingira nchini. Kwa miaka mingi tarehe 19 Novemba dunia imekuwa ikiadhimisha  siku ya choo duniani na 15 oktoba siku ya kunawa mikono kwa sabuni Duniani. Mwaka 2013 Umoja wa Mataifa ulipitisha tarehe 19 Novemba kuwa ni siku rasmi ya maadhimisho ya Choo Duniani kutokana na ukweli kuwa kati ya malengo yote ya maendeleo ya milenia ndio lengo pekee ambalo liko nyuma kiutekelezaji. Katika mwaka huo huo Tanzania ilipitisha rasmi wiki ya tarehe 13 hadi 19 Novemba kuwa ni wiki ya Usafi Tanzania. Tanzania huadhimisha kwa pamoja katika wiki hii Siku ya Kunawa Mikono Duniani na Siku ya Choo Duniani. Kwa mwaka huu Maadhimisho haya Kitaifa yanafanyika Mkoani Njombe.

Lengo kuu la maadhimisho haya ni kuhamasisha jamii ili iweze kuchukua hatua katika kukabiliana na changamoto za kukosa huduma za choo bora na uboreshaji wa usafi wa mazingira kwa ujumla, ambapo mkazo huwekwa katika uhamasishaji wa matumizi ya vyoo bora, unawaji wa mikono kwa sabuni, njia sahihi za kutibu na kutunza maji ya kunywa majumbani, na usafishaji wa maeneo yanayotuzunguka.

Maadhimisho haya pia yanatoa nafasi kwa wadau kujadili mafanikio yaliyopatikana na matatizo yaliyopo katika kuendeleza usafi wa mazingira ikiwa ni pamoja na ujenzi wa vyoo bora na kuyatafutia ufumbuzi. Kwa pamoja, kama taifa, tunapata fursa ya kufanya tathmini ya tulikotoka, tulipo sasa na kuainisha malengo na mipango yetu kwa siku zijazo.

Kauli Mbiu ya Maadhimisho

Ndugu Wananchi; Kauli mbiu ya Maadhimisho ya mwaka huu ina ujumbe mzito sana: Kipindupindu  Hakikubaliki, Zuia Maambukizi Mapya, Zingatia Usafi wa Mazingira”. Ni ukweli ulio wazi kuwa bila kuchukua jitihada za makusudi za kuboresha usafi wa mazingira yetu janga hili la kipindupindu litaendelea kuwepo na watu wataoendelea kupoteza maisha na kupunguza nguvu kazi.

Kwa kutambua ukweli huo kuhusu usafi wa mazingira, katika siku ya leo na katika wiki yote hii tafakuri zetu tuzielekeze kwenye kutafuta mikakati na mbinu za kuhakikisha kuwa tunaboresha usafi wa mazingira katika maeneo yetu. Naomba tutambue kuwa mkakati wowote kwa ajili hiyo hauna budi ujielekeze katika kufanya mambo yafuatayo:
1.  Kujenga vyoo bora na kuvitumia
2.  Kunawa mikono kwa maji safi na sabuni katika nyakati tano muhimu,
3.  Kusafisha maeneo yanayotuzunguka,
4.  Kuboresha usafi binafsi na kuaacha tabia ya kutupa taka ovyo.


Ndugu Wananchi;
Huduma duni za usafi wa mazingira zinachangia kwa kiasi kikubwa kutokea kwa milipuko ya magonjwa ya kuhara ikiwemo kipindupindu na kusababisha vifo ambavyo vingeweza kuzuilika. Katika mlipuko wa Kipindupindu unaoendelea nchini takriban watu 106 wameshapoteza maisha.   Idadi hii ni kubwa na pengo kubwa kwa familia zao na Taifa kwa ujumla.
Aidha, Kwa mujibu wa Shirika la UNICEF na Wizara ya Afya na Ustawi wa Jamii, Ugonjwa wa kuhara bado ni miongoni mwa magonjwa makuu matano yanayochangia katika vifo kwa watoto wadogo wenye umri chini ya miaka mitano nchini Tanzania. Takwimu zinaonyesha kwamba moja ya tatu ya vifo vya watoto vinavyotokea ndani ya mwezi wa kwanza wa maisha ya watoto vinatokana na maambukizi au magonjwa ya kuhara yanayosababishwa na:
·        Ukosefu wa maji safi na salama,
·        Mazingira machafu na kutozingatia tabia za usafi.
·        Madhara mengine yatokanayo na ukosefu wa maji safi na salama,
·        Mazingira machafu na kutozingatia tabia za usafi ni kudumaa (mtoto kuwa na kimo kifupi kisichoendana na umri na kuathiri ukuaji)
Takwimu zinaonesha kuwa asilimia 53 ya watoto chini ya miaka mitano mkoani Iringa wamedumaa.
Kunawa mikono kwa sabuni ni mojawapo ya njia rahisi na yenye gharama nafuu kuzuia maambukizi. Njia hii hupunguza uwezekano wa kupata maambukizi kwa 50% na matumizi ya choo bora hupunguza kwa 32%. Takwimu za utafiti uliofanywa na shirika la UNICEF katika mikoa ya Iringa, Njombe na Mbeya zinaonyesha kuwa kaya zenye vyoo bora ni 23%, kaya ambazo zina vyombo vya kunawia mikono na sabuni ni 9%, uoshaji wa mikono baada ya kumhudumia mtoto ni 56%, uoshaji wa mikono kabla ya kuandaa chakula ni 2% na uoshaji wa mikono kabla ya kumlisha mtoto ni 18%.
Ndugu Wananchi;
Uboreshaji wa usafi wa mazingira na kuzingatia kanuni zake ndio ngao pekee ya kujikinga na janga hili kubwa la ugonjwa wa kipindupindu. 

Hatua Zilizochukuliwa na Serikali kukabiliana na changamoto

Ndugu Wananchi;

Baadhi ya jitihada zinazofanywa na Serikali kukabili changamoto za usafi wa mazingira nchini ni:

(i) Utekelezaji wa Kampeni ya Kitaifa ya Usafi wa Mazingira ambayo inalenga kuongeza idadi ya watu wenye vyoo bora na kuboresha usafi wa mazingira katika maeneo ya mikusanyiko, maeneo ya barabara kuu na kwenye Taasisi. Kwa mkoa wa Iringa kupitia Kampeni hii jumla ya mafundi 156 kutoka vijiji 156 wamefundishwa jinsi ya kujenga vyoo bora kwa gharama nafuu. Nawaomba tuwatumie mafundi hawa ili tuweze kujenga vyoo bora vijijini kwetu.

Nimesikia kuwa Mkoa wa Iringa tayari kuna kata 33 zinatekeleza Kampeni hii, naomba Wakurugenzi wa Halmashauri wapanue utekelezaji huu katika kata nyengine kwa kutumia vyanzo vya ndani vya mapato. Aidha, utekelezaji wa Kampeni hii kwa mkoa wetu hauridhishi kulingana na malengo kama tulivyosikia katika Taarifa ya Mganga Mkuu wa Mkoa. Hivyo nawaagiza Wakurugenzi wa Halmashauri kuhakikisha kila Halmashauri inafikia malengo kwa kusimamia kwa karibu utekelezaji wa Kampeni hii na kuwachukulia hatua watendaji wasio wajibika.  Katika utekelezaji wa Kampeni hii ili mwisho wa siku kila wananchi awe na Choo bora.


(ii) Kusimamia sheria zilizopo za usafi wa mazingira na kuwachukulia hatua wale wote wanaoenda kinyume na sheria hizi zikiwemo sheria ndogo za Halmashauri na vijiji.

Hivyo nachukua nafasi hii kuaagiza Wakurugenzi wa Halmashauri kusimamia kikamilifu Sheria hizo ikiwa ni pamoja na kuwachukulia hatua wale wote watakaokiuka na kuifanya Kampeni hii isifanikiwe.


Ndugu  Wananchi;
Usafi wa Mazingira ni jukumu letu sote , na ni jukumu endelevu rai yangu kwenu ni kuendelea kufanya usafi katika maeneo yote yanayotuzunguka na kuhamasisha ujenzi na matumizi ya vyoo bora ya vyoo kwa afya ya kaya na Taifa kwa ujumla.  Lazima tuzingatie Kanuni zote za Usafi kama tunavyoelekezwa na wataalamu wa Afya. 

Baada ya kusema haya natamka kuwa uzinduzi wa maadhimisho siku ya kunawa Mikono Duniani, Siku ya Choo Duniani, na wiki ya Usafi wa Mazingira Tanzania imezinduliwa rasmi,

Aksanteni kwa kunisikiliza.



HAPA KAZI TU!!

Sunday, November 1, 2015

IRINGA TAYARI KWA MTIHANI WA KIDATO CHA NNE 2015



Na. Ofisi ya Mkuu wa Mkoa
Mkoa wa Iringa umekamilisha maandalizi ya mtihani wa kumaliza kidato cha nne mwaka 2015 na mitihani yote imefikishwa vituoni.

Kauli hiyo ilitolewa na kaimu afisa elimu mkoa wa Iringa, Mwalimu Euzebio Mtavangu alipokuwa akiongelea maandalizi ya mitihani ya kumaliza kidato cha nne kwa mkoa wa Iringa ulionza leo nchini kote ofisini kwake.

Mwalimu Mtavangu alisema kuwa mkoa wa Iringa una jumla ya vituo 196 vya kufanyia mtihani huo. Alivitaja vituo hivyo kwa kila halmashauri kuwa ni halmashauri ya Manispaa ya Iringa (44), halmashauri ya wilaya ya Iringa (33), halmashauri ya wilaya ya Kilolo (49), halmashauri ya wilaya ya Mufindi (70) na mitihani yote imefikishwa katika vituo husika.

Akiongelea idadi ya wasimamizi, alisema kuwa mkoa unao jumla ya wasimamizi 527. Alisema kuwa kwa mujibu wa muongozo wa mitihani hiyo msimamizi mmoja anatakiwa kusimamia wastani wa watahiniwa 40. Aliongeza kuwa wasimamizi hao miongoni mwao ni walimu kutoka katika shule za mkoa wa Iringa. Utaratibu wa kuwapata wasimamizi hao ni pamoja na kuwafanyia upekuzi wa kina na kula kiapo cha kutunza siri kwa mujibu wa sheria Namba 3 ya mwaka 1970. Alisema kuwa semina kwa wasimamizi wa mitihni hiyo zilianza kutolewa kwa halmashauri zote kuanzia tarehe 28-30/10/2015.

Kaimu afisa elimu mkoa wa Iringa alisema kuwa jumla ya watahiniwa 15,818 wanatarajiwa kufanya mtihani wa kumaliza elimu ya sekondari mwaka huu. Mgawanyo wa watahiniwa hao katika halmashauri ni halmashauri ya Manispaa (4,785), halmashauri ya wilaya ya Iringa (3,368), halmashauri ya wilaya ya Kilolo (2,784) na halmashauri ya wilaya ya Mufindi (4,881).
Akiongelea matarajio ya ufaulu katika mkoa, Mwl Mtavangu alisema kuwa mkoa unatarajia kufanya vizuri na kupindukia matarajio ya BRN ya 80%. Alisema kuwa matarajio hayo yanatokana na mkoa kuwa uliboresha mazingira ya kufundishia na kujifunzia. Sababu nyingine alizitaja kuwa ni wanafunzi wa masomo ya sayansi kufanya majaribio halisi baada ya kuwa na maabara za kutosha na kufanya ufaulu kwa masomo ya sayansi kuwa mzuri. Aidha, wingi wa walimu wenye shahada umeongeza chachu ya mafanikio katika sekta ya elimu mkoani Iringa.
=30= 


Saturday, October 24, 2015

KUELEKEA SIKU YA KUPIGA KURA MKOANI IRINGA


Mwenyekiti wa Kamati ya Ulinzi na Usalama, Mhe. Amina Masenza



"Jeshi la Polisi limejipanga vizuri kuwalinda wananchi wote, hivyo, rai yangu kwa Wananchi ni kuwa jitokezeni kwa wingi siku ya kupiga kura mapema na baada ya kupiga kura rudini kwenye maeneo yenu kuendelea na shughuli nyingine. Wananchi wasibaki kwenye vituo vya kupigia kura baada ya kupiga kura'

Tuesday, October 20, 2015

MATUKIO WAKATI WA KUAPISHWA MKUU WA WILAYA MTEULE YA IRINGA RICHARD KASESELAm

Mhe. Richard Kasesela akisaini kitabu cha wageni

Kamati ya Ulinzi na Usalama Mkoa

Mkuu wa Utawala Ofisi ya Mkuu wa Mkoa, Scolastica Mlawi (kulia)

Mhe. Richard Kasesela akiapa

Mkuu wa Mkoa wa Iringa Mhe. Amina Masenza (kulia) akimkabidhi Katiba ya Jamhurir ya Muungano wa Tanzania Mkuu wa wilaya ya Iringa Richard Kasesela

Katibu Tawala Mkoa wa Iringa, Wamoja Ayubu (kushoto)

DC IRINGA SIMAMIA ULINZI NA USALAMA



Na. Ofisi ya Mkuu wa Mkoa
Mkuu wa wilaya ya Iringa Richard Kasesela ametakiwa kusimamia ulinzi na usalama katika wilaya ya Iringa ili mkoa uwe salama katika kipindi cha kampeni kuelekea uchaguzi mkuu.

Kauli hiyo ilitolewa na mkuu wa mkoa wa Iringa, Amina Masenza muda mfupi baada ya kumuapisha mkuu wa wilaya mteule wa Iringa katika ofisi ya mkuu wa mkoa leo.
 
Mwenyekiti wa Kamati ya Ulinzi na Usalama Mkoa wa Iringa Amina Masenza
Masenza alisema “suala la ulinzi na usalama ni muhimu sana katika wilaya ya Iringa ili mkoa uwe salama. Hivyo, lazima ulisimamie ipasavyo. Binafsi nina imani na wewe na utendaji wako wa kazi hivyo hautashindwa katika kutekeleza majukumu yako”. Alisema kuwa wilaya ya Iringa ikiwa salama wananchi wataendelea kushiriki katika mampeni za kisiasa kwa uhuru na amani na hatimae kupiga kura salama.

Mkuu wa mkoa alimtaarifu masuala ya kipaumbele kwa mkoa wa Iringa kuwa ni lishe, ukimwi na usafi wa mazingira. Alimtaarifu kuwa katika ratiba yake ya kazi lazima ijikite katika utekelezaji wa mpango mkakati wa mkoa unaolenga kukabiliana na changamoto za lishe, hali ya maambukizi ya ukimwi na usafi wa mazingira.

Katika salamu za mkuu wa wilaya ya Iringa mteule Richard Kasesela alimshukuru Rais wa Jamhuri kwa imani aliyonayo kwake. Aidha, alisema kuwa katika kipindi hiki suala la amani ni agenda yake ya mwanzo kuelekea uchaguzi mkuu wa tarehe 25 Oktoba, 2015. Alisema kuwa yeyote katika wilaya ya Iringa atakayetishia watu kwenda kupiga kura hasa wanawake atashughulikiwa. Alisema kuwa lazima wananchi wote katika wilaya ya Iringa washiriki katika zoezi la kupiga kura kikamilifu pasipo woga ili wafurahie haki yao ya kupiga kura kikatiba.

Akiongelea masuala ya kimkakati katika mkoa, mkuu wa wilaya mteule alisema “nitajitahidi kuhakikisha suala la lishe bora kwa wananchi hasa wanawake wajawazito na watoto wachanga linaboreka katika wilaya ya Iringa na mkoa kwa ujumla. Tatizo hili lazima liishe”.
 
Mkuu wa wilaya ya Iringa, Mhe. Richard Kasesela
Aidha, suala la ukimwi aliahidi kukabiliana nalo ipasavyo. Alisema kuwa ngono zembe ni jambo linalohitaji kuangaliwa kwa umakini zaidi. Wilaya itaangalia upya viashiria vya ukimwi na mitego ili kuangalia jinsi ya kuitegua mitego hiyo hatimae kupunguza maambukizi mapya. Akiongelea usafi wa mazingira alisema “mtu ni afya hivyo usafi wa mazingira ni afya pia. Lazima usafi wa mazingira uanzie kwa mtu mwenyewe katika mazingira ya nyumbani kwake na mazingira yanayomzunguka”.

Mkuu wa wilaya ya Iringa aliapishwa leo mjini Iringa kufuatia uteuzi wa Rais wa wakuu wapya wa wilaya 13 na kuhamishwa kwa wakuu saba wa wilaya tarehe 4/10/2015.
=30=

NEC YAVITAKA VYAMA KUELIMISHA WANANCHI TARATIBU ZA UCHAGUZI



Na. Ofisi ya Mkuu wa Mkoa
Tume ya Taifa ya Uchaguzi imevitaka vyama vya siasa nchini kuwaelimisha wananchi kufuata taratibu ili kufanikisha uchaguzi huru na salama nchini.

Kauli hiyo ilitolewa na Kamishna wa Tume hiyo Jaji Mary Longway alipokuwa akifungua mkutano wa Tume ya Taifa ya Uchaguzi na viongozi wa vyama vya siasa mkoani Iringa.
 
Kamishna wa Tume ya Taifa ya Uchaguzi, Jaji (Mstaafu) Mary Longway akifungua mkutano
Jaji Longway alisema “vyama vya siasa vina nafasi kubwa katika kuelimisha na kuhamasisha jamii, Tume inaamini kwamba ili mpiga kura aweze kufanya maamuzi sahihi ni muhimu kwake kupata elimu sahihi. Hivyo basi, Tume inatarajia kuona mkitumia majukwaa yenu vema katika kuhamasisha na kuelimisha si tu wananchi wenu bali jamii ya watanzania”. 

Alisema kuwa kuelekea uchaguzi mkuu, Tume imeandaa vituo vya kupigia kura 64,736. Tanzania bara vituo 63,156 na Zanzibar vituo 1,580. Aliongeza kuwa kila kituo kitakuwa na uwezo wa kuhudumia wapiga kura 450 na wasizidi 500. “Hata hivyo kituo kinapokuwa na wapiga kura zaidi ya 500 kinabidi kigawanywe ili viwe viwili yaani kituo “A” na “B” na namba ya wapiga kura itakuwa nusu kwa nusu. Mnaombwa kuwahamasisha wapiga kura wanashauriwa kwenda katika vituo walivyojiandikishia kupiga kura siku nane kabla ya siku ya kupiga kura ili kuweza kujua vituo vyao halisi vya kupigia kura” alisisitiza Jaji Longway.

Kamishna Longway alisema kuwa Tume imekuwa ikisikitishwa na baadhi ya vyama vya siasa kutumia majukwaa vibaya wakati wa kampeni. “Tume kwa namna ya pekee inawaomba katika kipindi hiki kifupi kilichobaki kutumia nafasi zenu majukwaani kuelezea sera za vyama vyenu ili kuweza kuwasaidia wananchi kufanya maamuzi sahihi baada ya kuwa na taarifa sahihi”. 

Tume imekuwa ikisikia katika vyombo vya habari malalamiko juu ya uvunjifu wa maadili ya uchaguzi katika kipindi hiki cha kampeni, “nitumie nafasi hii kuwaasa viongozi wa vyama vya siasa kupeleka malalamiko yenu katika kamati za maadili na si kukimbilia katika vyombo vya habarir kama ambavyo baadhi ya vyama vya siasa na wagombea mmekuwa mkifanya”.
Viongozi wa Vyama vya Siasa Mkoa wa Iringa

Ndani ya ukumbi wa Siasa ni Kilimo

Aidha, aliwataka kuepuka kutoa taarifa na shutuma zisizo sahihi kuhusu Tume ya Taifa ya Uchaguzi na kujikita katika kufikisha taarifa zilizo sahihi na zilizokusudiwa kwa wafuasi na wananchi kwa ujumla na kuwahamasisha wananchi kujitokeza kushiriki katika uchaguzi mkuu tarehe 25 Oktoba, 2015.
=30=