MRADI WA USAID TULONGE AFYA WAPONGEZWA KWA KUTUMIA APROCHI YA ‘SBCC’

Na. Ofisi ya Mkuu wa Mkoa

USAID Tulonge Afya wapongezwa kwa kuchagua kutumia mbinu za mabadiliko ya tabia kwa wanajamii (Social Behavior Change Communication approach) katika kufanikisha malengo ya mradi huo.

Pongezi hizo zilitolewa na Katibu Tawala Mkoa wa Iringa, Wamoja Ayubu alipokuwa akifungua kikao cha kuutambulisha mradi wa USAID Tulonge Afya unaotekelezwa na shirika la FHI 360 kilichofanyika katika ukumbi wa hoteli ya Gentle Hills mjini Iringa jana.

 

Katibu Tawala Mkoa wa Iringa, Wamoja Ayubu

Ayubu alisema kuwa mradi huo umechagua kutumia mbinu za mabadiliko ya tabia kwa wanajamii (SBCC). 

“Nimefurahishwa sana kwa kutambua umuhimu wa mbinu hii mliyoichagua katika kuleta mabadiliko hasa pale inapotumika kwa ufasaha” alisema Ayubu. 

Aidha, alimtaka meneja mradi wa kanda kusimamia vizuri mradi huo ili mwisho wa utekelezaji mabadiliko chanya ya tabia za wananchi yaweze kuonekana.

Katibu Tawala Mkoa wa Iringa aliutaka mradi wa USAID Tulonge Afya kusaidia kuongeza kasi katika utekelezaji wa mkakati wa Mkoa wa kupunguza maambukizi mapya ya virusi vya Ukimwi. 

“Natambua pia mkakati wa Mkoa ni kupunguza maambukizi mapya ya Virusi vya UKIMWI, kuhakikisha wanaoishi na maambukizi ya VVU wanakuwa na ufuasi mzuri wa dawa, kupunguza vifo vya mama na mtoto, kupunguza maambukizi ya Malaria pamoja na kuongeza matumizi ya huduma za uzazi wa mpango” alisema Ayubu.

=30=

KAMATI ZA UENDESHAJI MITIHANI MKOANI IRINGA ZAPONGEZWA KUDHIBITI UDANGANYIFU

Na. Ofisi ya Mkuu wa Mkoa

Kamati za uendeshaji wa mitihani ngazi za Wilaya na Mkoa zimepongezwa kwa usimamizi madhubuti wa mtihani wa kumaliza elimu ya msingi na kudhibiti udanganyifu.

Pongezi hizo zilitolewa na mwenyekiti wa kamati ya uchaguzi wa wanafunzi wanaotarajia kujiunga na kidato cha kwanza mwaka 2018 Mkoa wa Iringa, Wamoja Ayubu alipokuwa akifungua kikao hicho kilichofanyika katika ukumbi wa Siasa ni Kilimo mjini Iringa jana.

 

Katibu Tawala Mkoa wa Iringa, Wamoja Ayubu

Ayubu alisema kuwa mwaka 2017 Mkoa wa Iringa haukukumbwa na tuhuma za udanganyifu. “Kipekee nazipongeza kwa dhati kamati za uendeshaji wa mitihani za Wilaya na ya Mkoa kwa usimamizi mzuri. Nitoe wito kuwa usimamizi huu uendelee  kwa mitihani ya kitaifa ya ngazi zote ili kuepukana na suala la udanganyifu ambalo kwa kiasi kikubwa madhara yake ni makubwa kwa mwanafunzi mwenyewe, mwalimu aliyehusika na udanganyifu na Taifa kwa ujumla” alisema Ayubu.

Akiongelea idadi ya wanafunzi waliofanya mtihani, alisema kuwa

watahiniwa 24,784 (wavulana 11,421 na wasichana 13,363) sawa na 99.5% walifanya mtihani. Aliongeza watahiniwa 20,606 (wavulana 9513 na wasichana 11,093) sawa na asilimia 83.14 wamefaulu mtihani huo. Alisema wanafunzi walioshindwa kufaulu mtihani huo ni 4,178 ikiwa wavulana 1,908 na wasichana 2,270 sawa na asilimia 16.86

“Kiwango cha ufaulu kimeongezeka kwa asilimia 0.27 ikilinganishwa na matokeo ya mwaka jana ambapo ufaulu ulikuwa ni 82.87%. Ninapenda kuchukua nafasi hii kuwapongeza wadau wote wa elimu katika Mkoa wetu ambao mchango wao ni mkubwa kwa ongezeko hili la ufaulu na kuufanya Mkoa wetu kuwa wa Nne (4) kitaifa kati ya mikoa 26 ya Tanzania bara alisema Ayubu.

Mwaka 2017 Mkoa wa Iringa ulikuwa na watahiniwa 24,905 waliosajiliwa kufanya mtihani, wakiwemo wavulana 11,490 na wasichana 13,415 katika shule 481.

=30=

MKOA WA IRINGA UMEONGEZA KIWANGO CHA UFAULU KWA 0.27%

Na. Ofisi ya Mkuu wa Mkoa, Iringa

Mkoa wa Iringa umefanikiwa kuongeza kiwango cha ufaulu kwa watahiniwa wa mtihani wa kumaliza elimu ya msingi mwaka 2017 kwa asilimia 0.27 na kushika nafasi ya nne kitaifa.

Kauli hiyo ilitolewa na mwenyekiti wa kamati ya uchaguzi wa wanafunzi wanaotarajia kujiunga na kidato cha kwanza mwaka 2018 mkoa wa Iringa, Wamoja Ayubu katika hotuba yake ya ufunguzi kwenye ukumbi wa Siasa ni Kilimo mjini Iringa.

 

Katibu Tawala Mkoa wa Iringa, Wamoja Ayubu

Ayubu alisema “watahiniwa 20,606 (wavulana 9,513 na wasichana 11,093) sawa na asilimia 83.14 wamefaulu mtihani huo. Hali kadhalika walioshindwa kufaulu mtihani huo ni 4,178 ikiwa wavulana 1,908 na wasichana 2,270 sawa na asilimia 16.86.

Kiwango hiki cha ufaulu kimeongezeka kwa asilimia 0.27 ikilinganishwa na matokeo ya mwaka jana ambapo ufaulu ulikuwa ni 82.87% ninapenda kuchukua nafasi hii kuwapongeza wadau wote wa elimu katika Mkoa wetu ambao mchango wao ni mkubwa kwa ongezeko hili la ufaulu na kuufanya Mkoa wetu kuwa wa Nne kitaifa kati ya mikoa 26 ya Tanzania bara”.

Ayubu ambaye pia ni Katibu Tawala Mkoa wa Iringa alisema kuwa ongezeko hilo la ufaulu ni jambo jema na kutahadharisha kuwa linaibua changamoto ya uhitaji mkubwa wa vyumba vya madarasa katika shule za sekondari. “Ongezeko la ufaulu ni jambo jema kwetu lakini linaibua changamoto ya uhitaji mkubwa wa vyumba vya madarasa katika shule zetu za sekondari au ujenzi wa shule mpya za Sekondari ili kuweza kuwachukua wanafunzi wote waliofaulu kujiunga na kidato cha kwanza” alisema Ayubu.

Aidha, aliwataka wajumbe kuangalia jinsi ya kuongeza vyumba vya madarasa au kujenga shule za sekondari maeneo ambayo yamekuwa na wanafunzi wengi wanaofaulu hasa mijini. Aliongeza kuwa ongezeko la ujenzi wa vyumba vya madarasa liambatane na uongezaji wa meza na viti ili kuhakikisha wanafunzi wote wanapata meza na viti.

Mkoa wa Iringa ulikuwa na watahiniwa 24,905 waliosajiliwa kufanya mtihani wa kumaliza elimu ya msingi mwaka 2017, kati yao wavulana 11,490 na wasichana 13,415 katika shule 481.

=30=

MUFINDI YABAINI WATEJA 31 WALIOJIUNGANISHIA UMEME KINYUME NA TARATIBU

Na. Ofisi ya Mkuu wa Mkoa

Wilaya ya Mufindi imefanikiwa kuwabaini wateja 31 waliojiunganishia umeme kinyume na taratibu na kuchukuliwa hatua za kisheria katika jitihada za kudhibiti upotevu wa umeme na mapato ya serikali.

Kauli hiyo ilitolewa na Katibu Tawala Wilaya ya Mufindi, Allan Benard alipokuwa akisoma taarifa fupi ya Wilaya ya Mufindi kwa waziri wa Nishati aliyefanya ziara ya kukagua viwanda vya kuzalisha nguzo wilayani Mufindi hivi karibuni.

Benard alisema kuwa jumla ya wateja 9,382 walihakikiwa na kukaguliwa na kati yao, wateja 31 walibainika kuwa wamejiunganishia umeme kinyume na taratibu. Alisema kuwa wateja hao wamechukuliwa hatua za kisheria kwa kulisababishia shirika la ugavi wa umeme kukosa mapato. 

Alisema kuwa Wilaya ya Mufindi imefanikiwa kubadilisha mita zote za kawaida za umeme (convection) na kufunga mita la Luku ambazo zimesaidia kuongeza wigo wa ukusanyaji mapato.

Akiongelea viwanda wilayani Mufindi, Benard alisema kuwa Wilaya hiyo ina fursa mbalimbali za uwezeshaji wananchi kiuchumi. Alivitaja viwanda vilivyopo kwa mchanganuo kuwa, viwanda vikubwa 14, viwanda vya kati 27 na viwanda vidogo 43. Alisema kuwa viwanda hivyo vimetoa ajira kwa watu 9,171. Aliongeza kuwa kati ya hivyo, viwanda vitano vinazalisha nguzo. Alivitaja kuwa ni Sao Hill Industries, Qwihaya General Enterprises, Sheda General Supply, Leshea na Mufindi Wood Poles and Timber.

Wilaya ya Mufindi ina ukubwa wa eneo la kimometa za mraba 7,123, halmashauri mbili na majimbo matatu ya uchaguzi.    

=30=

UMEME WAKWMISHA UJENZI WA VIWANDA

Na. Ofisi ya Mkuu wa Mkoa

Upungufu wa upatikanaji wa umeme umekuwa kikwazo katika juhudi za uanzishaji wa miradi ya kiuchumi na ujenzi wa viwanda mkoani Iringa.

Kauli hiyo ilitolewa na mkuu wa Mkoa wa Iringa, Amina Masenza alipokuwa akiwasilisha taarifa fupi ya Mkoa wa Iringa kwa waziri wa Nishati ofisini kwake jana.

Masenza alisema “mheshimiwa waziri, pamoja na utekelezaji huu wa kusukuma maendeleo ya wananchi, kumekuwa na changamoto kadhaa zinazochelewesha juhudi hizi. Baada ya wananchi kuitikia wito wa uanzishaji miradi ya kiuchumi ikiwemo ujenzi wa viwanda, pamekuwa na upungufu katika kupatikana kwa umeme wa uhakika. Maeneo yanayokumbwa na tatizo hili ni pamoja na Iringa mjini na wilaya ya Mufindi”. 

Changamoto nyingine ni miradi mikubwa ya kufua umeme inahitaji uwekezaji mkubwa na fedha nyingi, hivyo kuwa kikwazo kwa wananchi wazalendo na kushauri serikali kuwa na udhamini kwa miradi hiyo. 

Mkuu wa Mkoa alisema kuwa Mkoa utaendelea kukabiliana na changamoto hizo kwa kushirikiana na wadau kwa kuwa na ramani itakayoonesha maeneo ya viwanda. “Ramani hii ikikamilika itawasilishwa kwenye mamlaka zinazosimamia miundombinu kama umeme, maji, barabara ili kuhakikisha Mkoa unakuwa na mazingira bora na wezeshi kwa ujenzi na uendelezaji wa viwanda” alisema mkuu wa Mkoa.

Waziri wa Nishati alifanya ziara ya siku moja kukagua viwanda vinavyozalisha nguzo mkoani Iringa ili kujiridhisha na uwezo wa viwanda hivyo kuzalisha nguzo nchini.

=30=