Saturday, January 1, 2011

HOSPITALI YA MKOA IRINGA YAPONGEZWA

Hospitali ya Mkoa wa Iringa imepongezwa kwa kutoa huduma nzuri kwa wagonjwa wanaohudhuria hospitali hiyo kwa matibabu.

Pongezi hizo zimetolewa na Mbunge wa viti maalum kupitia Chama Cha Mapinduzi (CCM) wa Mkoa wa Iringa, Mhe. Ritta Semotto Kabati alipofanya ziara fupi ya kuwatembelea wagonjwa waliolazwa katika wodi ya akina mama na wodi ya watoto leo kwa lengo la kuwapa pole, na kuwatakia heri ya mwaka mpya 2011.
Mhe. Ritta Kabati, Mbunge wa CCM viti maalum (kulia) akimkabidhi baadhi ya zawadi
Mganga Mfawidhi wa Hospitali ya Mkoa wa Iringa, Dkt. Oscar Gabone
katika viwanja vya Hospitali hiyo leo

Mhe. Kabati amesema “naipongeza hospitali ya mkoa wa Iringa kwa kutoa huduma nzuri na bora jambo linalowafanya wagonjwa kuridhika na huduma inayotolewa”. Ameongeza kuwa ametembelea hospitali mbalimbali lakini katika suala la usafi hospitali ya mkoa ipo juu.

Mhe. Kabati amesema lengo la kufanya ziara hiyo fupi ni kuwafariji na kuwatia moyo akina mama na watoto na kuwapa zawadi mbalimbali ikiwa ni pongezi zake kwa kufanikiwa kuuona mwaka mpya wa 2011.  “Nawapa pole sana wagonjwa wote na nawatakia afya njema kwani kuugua si kufa na pia naomba wote tuuanze huu mwaka mpya kwa furaha na uwajibikaji ili kuweza kujiletea maendeleo”.

Sikujua Filango, mama aliyejifungua mtoto saa tisa usiku wa tarehe 01.01.2011 ameelezea kurithishwa na huduma za hospitalini hapo tangu alipowasili hadi alipojifungua.

Akielezea changamoto zinazoikabili hospitali ya mkoa, Katibu wa Hospitali, Dotto Zambalesi amesema kuwa hospitali hiyo inakabiliwa na upungufu wa watumishi wenye taaluma stahiki akidai waliopo kuwa ni wachache hatimae kuwa na jukumu zito kidogo kwa wataalamu waliopo kuweza kuziba pengo la watumishi wanaopungua. Aidha changamoto nyingine ameiongelea kuwa ni ufinyu wa bajeti jambo linalokwamisha ufanisi katika baadhi ya shughuli.

Mhe. Rita Kabati Mbunge viti maalum CCM (katikati) akiwa na
mama Felisha (kushoto) na mama ambaye mtoto hajampatia jina (kulia)
baada ya kuwakabidhi zawadi alipotembelea wodi ya akina mama leo

Akitoa shukrani zake kwa ziara hiyo mganga mfawidhi wa hospitali hiyo Dkt. Oscar Gabone amemshukuru Mhe. Mbunge na msafara wake na zawadi walizozitoa katika wodi ya akina mama na wodi ya watoto na kueleza matumaini yake kuwa ziara ijayo itahusisha zawadi za akina baba pia.

Katika ziara hiyo Mbunge huyo aliambatana na akina mamawa UWT mkoa na wilaya na baadhi ya waheshimiwa madiwani na kutoa zawadi za sabuni, maziwa, juice na biskuti pamoja na vitu vingine.


Baadhi ya wajumbe katika ziara ya Mhe. Kabati wakibadilishana mawazo na viongozi wa Hospitali ya Mkoa
WANANCHI WATAKIWA KUTAFAKARI CHANGAMOTO ZA KIJAMII

Serikali mkoani Iringa imetoa wito kwa waumini na wananchi kutafakari changamoto zilizojitokeza katika jamii na kusababisha uvunjaji wa amani na mshikamano katika kuukaribisha mwaka mpya 2011.

Kauli hiyo imetolewa na kaimu Mkuu wa Mkoa wa Iringa, Kanali Issa Machibya katika hotuba yake iliyosomwa na Mkuu wa Wilaya ya Mufindi, Bibi. Evarista Kalalu katika mkesha mkubwa wa kitaifa uliofanyika katika uwanja wa Samora uliopo katika Manispaa ya Iringa.



       Askofu Dkt. Oderdenburg Mdegela akiteta jambo la Mwakilishi wa
Mkuu wa Mkoa wa Iringa ambaye ni Mkuu wa Wilaya ya Mufindi, Bibi. Evarista Kalalu. 
Bibi Kalalu amesema “natoa wito kwa waumini na wananchi wote kwamba tunapoukaribisha mwaka mpya, kila mmoja wetu atafakari ni mambo gain au changamoto zipi zilizojitokeza katika jamii na kusababisha uvunjifu wa amani na mshikamano wetu”. Amezitaja changamoto hizo kuwa ni pamoja na rushwa, mauaji ya walemavu wa ngozi (Albino), ubakaji, utoaji mamba, mauaji ya vikongwe na mauaji ya watu yanayoendelea kujitokeza.

Aidha, amesema kuwa changamoto hizo zimesababishwa na mmomonyoko wa maadili katika jamii na kusisitiza kuwa waumini wa dini zote na madhehebu yote kuweka nguvu katika kuliombea taifa liepukane na mmomonyoko wa maadili. Amewataka kila mmoja kuwa mwalimu wa kutenda matendo mema yenye kumpendeza Mungu na kuendelea kudumisha amani iliyopo.

Vilevile amewataka waumini wote kuwaombea viongozi wa taifa kwa Mungu ili hekima, busara na ujasiri wa kutawala kwa moyo wa uadilifu. Ameongeza kuwa kila mwanajamii kwa nafasi yake awajibike katika kuleta maendeleo yake binafsi, kudumisha amani, mshikamano na maadili mema katika jami nzima.

Katika neno la utangulizi lililotolewa na Mhashamu Baba Askofu Dr.Oderdenburg Mdegela amesema dhumuni la mkesha huo ni kuiombea nchi ili iwe na amani, “tumekuja kuomba na kutembea pamoja ili nchi iwe na amani”. Amesema kuwa toba ni msingi wa kumkaribia Mungu na Mungu huleta mabadiliko katika familia, kazi, biashara na Taifa. Amesema kuwa mkesha huo ni mafuriko na utamfunika kila mtu katika kutenda mema. Aidha, aliwashukuru wale wote waliohusika kuruhusu uhuru wa kuabudu nchini pasipo kuvunja sheria.

Baadhi ya wakazi wa Manispaa ya Iringa wakipokea
baraka kavika uwanja wa Samora mkesha wa mwaka 2011



...MAISHA BORA YANATOKANA NA KUFANYA KAZI KWA JUHUDI NA MAARIFA!

Wananchi wamekumbushwa kufanya kazi kwa juhudi na maarifa ili kujiletea maisha bora na si kutegemea kuwa maisha mazuri yanateremka kutoka juu.

Rai hiyo imetolewa na Kaimu Mkuu wa Wilaya ya Iringa, Bibi Evarista Kalalu katika hafla fupi ya kukabidhi mkopo wa zana za kilimo trekta kubwa manane na ndogo 25 uliotolewa na Idodi SACCOS iliyofanyika katika viwanja vya ofisi ya Idodi SACCOS zilizopo katika Kata ya Idodi, Tarafa ya Idodi katika  Halmashauri ya Iringa.
Mkuu wa Wilaya ya Mufindi, Bibi. Evarista Kalalu akikabidhi mkopo wa Trekta

Bibi Kalalu amesema kuwa maisha rahasi kwa jamii yanatengenezwa kwa kufanya kazi kwa juhudi na maarifa na si kukaa na kusubiri muujiza kutoka juu. Ameongeza kuwa vijana wengi wamekimbilia maisha wanayodhani ni rahisi hasa mijini na kujikuta wanaharibikiwa na kupoteza muelekeo hivyo kuagiza vijana washawishiwe kutokimbilia maisha hayo na wajiingize katika kilimo na vyama vya ushirika wa akiba na mikopo (SACCOS). Ametanabaisha kuwa usalama wa Tarafa ya Idodi na Mkoa wa Iringa utatokana na kushawishiwa huko kwa vijana kufanya kazi mbalimbali na si kupoteza muda na muelekeo katika maisha.

Kaimu Mkuu wa Wilaya ya Iringa ambaye pia ni Mkuu wa Wilaya ya Mufindi amefafanua madhumuni ya kuanzisha vyama vya ushirika vya akiba na mikopo (SACCOS) mwanzoni mwa miaka ya 2000 kuwa ni mkakati wa serikali kuwakomboa wananchi wake. Amesema “nguvu za wananchi zikiwekwa pamoja kwa malengo mahususi unakuwa ni mtaji mkubwa sana” hivyo kuwataka wananchi wengi zaidi kujiunga katika vyama vya akiba na mikopo ili kuunganisha nguvu zao. Amesema “wanaidodi wengine wasio wanachama wawe tayari kujifunza na kujiunga kutoka SACCOS”.

Alichukua nafasi hiyo kuzitaka kata nyingine kubuni bidhaa nyingine isiyopatikana katika Kata ya Idodi ili kuongeza wigo wa utoaji huduma katika Tarafa mzima ya Idodi jambo litakalodumisha ushirikiano na udugu.  

Afisa Kilimo, Mifugo na Ushirika wa Halmashauri ya Wilaya ya Iringa, Lucy Nyallu amesema kuwa kilimo cha kisasa hakitegemei kubahatisha bali kinategemea matumizi sahihi ya mbolea, uchaguzi wa mbegu bora na ushauri wa kitaalamu kutoka kwa wataalamu wa kilimo.

Mwenyekiti wa SACCOS hiyo Ngoola Mwangosi amezitaja changamoto zinazoikabili SACCOS hiyo kuwa ni pamoja na wadau wa mikopo ya stakabadhi mazao kutotoa mikopo ya kukopesha kwa wakati, na baadhi ya wanancha kutorejesha mikopo kwa wakati. Ameitaja changamoto nyingine kuwa ni wananchama kutokuwa na zana za kisasa za kilimo na kusababisha uzalishaji duni.

Chama cha ushirika wa akiba na mikopo (Idodi SACCOS DYK) kilisajiliwa rasmi Disemba, 2004 kikiwa na wanachama 178 na vikundi vya wajasiliamali sita kikiwa na hisa zenye thamani ya Tsh. 3,600,000, akiba Tsh. 107,286,400 na amana Tsh. 7,200,000.

Thursday, December 30, 2010

...Bibi Mpaka awapongeza walimu wa shule ya Msingi Ikonda

Walimu wa shule ya msingi Ikonda wamepongezwa kwa kuwafundisha na kufaulu mtihani wa darasa la saba mapacha walioungana kwa moyo wa huruma, upendo na kujituma.

Pongezi hizo zimetolewa na Katibu Tawala Mkoa wa Iringa, Bibi Gertrude Mpaka jana katika hafla fupi ya kuwapongeza na kuwapa zawadi mapacha walioungana Maria Mwakikuti na Consolata Mwakikuti baada ya kufaulu mtihani wa darasa la saba iliyofanyika katika ukumbi wa hospitali ya Consolata iliyopo katika kijiji cha Ikonda wilayani Makete.
 Mkuu wa Wilaya ya Makete, Bibi. Zainabu Kwikwega, Katibu Tawala Mkoa wa Iringa,
Bibi Gertrude Mpaka na Dr. Allesandro Nava

Katibu Tawala wa Mkoa wa Iringa amesema “nawapongeza sana walimu wa shule ya msingi Ikonda kwa kuwafundisha watoto hawa kwa moyo wa huruma, upendo na kujituma hadi kuhakikisha wanafaulu vizuri mtihani wao wa darasa la saba”. Kufaulu vizuri kwa mapacha hawa ni mchanganyiko wa juhudi za ufundishaji makini wa walimu na jitihada zao wenyewe za kujisomea kwa bidii. Ameongeza kuwa kufaulu vizuri pia kumetokana na ushirikiano wa wanafunzi wenzao kwa kuwaonesha upendo na kuwachangamsha na hatimae kujiona ni sehemu ya jamii inayowazunguka.

Bibi Mpaka ambaye pia ni mwenyekiti wa Kamati ya uchaguzi wa wanafunzi waliofauli ya Mkoa wa Iringa amesema kuwa “nimekuja hapa kuwapongeza kwa kufaulu vizuri katika mtihani wenu wa darasa la saba na kuwapa zawadi”. Aidha alitoa wito kwa jamii kuwasaidia mapacha hao ili wasione kama jamii imewapa kisogo. Amewataka Maria na Consolata kusoma kwa bidii zaidi na kuongeza maarifa ili kulitumikia taifa katika kuliletea maendeleo.

 Bibi Gertrude Mpaka, Katibu Tawala Mkoa wa Iringa akikabidhi
zawadi za vitabu vya sekondari kwa Consolata na Maria

Afisa Elimu Taaluma Mkoa wa Iringa, Mwl. Leonard Msigwa akiwa katika picha ya pamoja na
Consolata na Maria mara baada ya kukabidhi zawadi za Mkoa

Mapacha hao kwa pamoja wanamatarajio ya kusomea sayansi ya kompyuta. Aidha walisema kuwa wanaridhika sana na jamii jinsi inavyowachukulia na kutoa wito kwa viongozi wengine kuwa wanakwenda kuwatembelea.

Mkuu wa Hospitali ya Consolata- Ikonda walipozaliwa mapacha hao na muangalizi wao Padre Dr. Allesandro Nava amesema kuwa “sikushangaa kwa kufaulu kwao sababu ni wajanja sana”.

Mapacha hao walioungana walizaliwa Disemba 1997 na wamefaulu mtihani wa darasa la saba kwa alama 151 kila mmoja lakini katika masomo tofauti tofauti na Wizara ya Elimu na Mafunzo ya Ufundi imewapangia kujiunga na kidato cha kwanza katika shule ya sekondari ya wasichana ya Jangwani iliyopo Dar es Salaam.



Cheers

Monday, December 27, 2010

WATOTO YATIMA WANAHITAJI UPENDO NA HURUMA …!
Jamii imekumbushwa kuwa watoto yatima wanahitaji upendo, huruma na kutimiziwa mahitaji yao ya msingi kama watoto wengine.

Kauli hiyo imetolewa na Mheshimiwa Ritta Kabati, Mbunge wa viti maalumu (CCM) kupitia mkoa wa Iringa jana katika chakula maalumu alichokiandaa kwa ajili ya watoto yatima wa kituo cha Daily Bread Life Ministries kilichopo Mkimbizi nje kidogo ya Manispaa ya Iringa.

Mhe. Ritta Kabati, Mbunge viti Maalumu (CCM) akiwa na mtoto yatima
ambaye jina lake halikufahamika mara moja katika chakula cha mchana
alichowaandalia watoto yatima wa kituo cha Daily Bread Life Ministries cha
Mkimbizi, Manispaa ya Iringa

Mheshimiwa Kabati amesema kuwa jamii lazima ikumbuke kuwa watoto yatima na wenye mahitaji maalumu ni wanajamii kama walivyo watoto wengine na wanahitaji upendo, huruma na kutimiziwa mahitaji yao ya msingi ya kila siku kama chakula, malazi, mavazi, matibabu na elimu. Jamii haiwezi kujivua jukumu hili lenye pande mbili; upande wa kiroho kama tendo la huruma na mapendo na upande wa kimwili kama kuhakikisha unatunzwa na kuuwezesha kutimiza majikumu yake ya kibinadamu.

Mheshimiwa Kabati ameelezea madhumuni ya kuandaa chakula hicho cha mchana kwa watoto yatima kuwa ni kukaa na kufurahi pamoja na watoto hao akiamini ni jambo jema hasa katika majira haya ya sikukuu. Amesema ‘kukaa na kufurahi pamoja ni jambo jema, na sisi ndiyo baba zenu na mama zenu”.

Watoto wa kituo cha makao ya watoto yatima wakijichana vilivyo

Mheshimiwa Kabati pamoja na mengine ametoa zawadi mbalimbali za Noeli kwa watoto yatima kama mablanketi, nguo, masweta, sabuni, dawa za meno, miswaki, biskuti pia aliahidi kukinunulia seti ya Luninga kituo hicho ili watoto waweze kujifunza na kufuatilia mambo yanavyokwenda ndani na nje ya nchi.

Nae Naibu Meya wa Manispaa ya Iringa, Gervas Ndaki alisema kuwa suala la elimu kwa watoto yatima ni suala la msingi sana hivyo jamii inalazimika kuliangalia kwa jicho la karibu. Aidha aliahidi kuwalipia ada watoto wawili (2) waliofaulu kujiunga na kidato cha kwanza hadi watakapomaliza kidato cha nne (4).

Mhe. Ritta Kabati akikabidhi zawadi ya ndoo ya sabuni miongoni mwa zawadi nyingine

Mhe. Ritta Kabati akiwa amembeba mtoto mchanga aliyeokotwa muda jalalani muda mfupi baada ya kuzaliwa
Katika risala ya kituo hicho iliyosomwa na Kaimu Mkurugenzi wa kituo, Swiga James amesema kuwa kituo chake kinakabiliwa na changamoto kadhaa ikiwemo michango ya shule, gharama za matibabu kuwa kubwa kwa watoto na ubovu wa miundombinu hususani barabara kufikia kituo hicho. Aidha, alishauri iandaliwe sheria kali ya kuwadhibiti wazazi wanaokwepa majukumu yao kwa watoto.

Kituo cha Daily Bread Life Ministries kilianzishwa mwaka 2002 na kilianza rasmi kupokea watoto Aprili 2004 kutoka ustawi wa jamii na kina watoto 36, wakike 20 na wakiume 16.




 Mkurugenzi wa Idara ya Habari -MAELEZO, Clement Mshana
akiongea na Maafisa Habari, Elimu na Mawasiliano wa Umma walipotembelea 
kituo cha makao ya watoto yatima cha NURU, nje kidogo ya Jiji la Mbeya


 Mkurugenzi wa Idara ya Habari -MAELEZO, Clement Mshana
akikabidhi zawadi mbalimbali kutoka kwa Maafisa Habari, Elimu na Mawasiliano wa
Umma katika kituo cha makao ya watoto yatima cha NURU, nje kidogo ya Jiji la Mbeya

 Mkurugenzi wa Idara ya Habari -MAELEZO, Clement Mshana
akikabidhi zawadi mbalimbali kutoka kwa Maafisa Habari, Elimu na Mawasiliano wa
Umma katika kituo cha makao ya watoto yatima cha NURU, nje kidogo ya Jiji la Mbeya

 Mkurugenzi wa Idara ya Habari -MAELEZO, Clement Mshana
akikabidhi zawadi mbalimbali kutoka kwa Maafisa Habari, Elimu na Mawasiliano wa
Umma katika kituo cha makao ya watoto yatima cha NURU, nje kidogo ya Jiji la Mbeya

 Neema Mbuja, Afisa Habari wa Shirika la Maendeleo la Taifa
akiwa na mtoto yatima Neema NURU


 Maafisa Habari, Elimu na Mawasiliano wa Umma wakiwa katika
picha na watoto yatima wa kituo cha NURU



 Maafisa Habari, Elimu na Mawasiliano wa Umma wakiwa katika
picha na watoto yatima wa kituo cha NURU



 Maafisa Habari, Elimu na Mawasiliano wa Umma wakiwa katika
picha na watoto yatima wa kituo cha NURU
 Kituo cha Kamao ya watoto yatima cha NURU
kilichopo nje kidogo ya Jiji la Mbeya

Mkurugenzi wa Idara ya Habari -MAELEZO, Clement Mshana
akifafanua jambo katika kituo cha makao ya watoto yatima cha NURU

Monday, December 20, 2010

Zamaradi Kawawa, Afisa Habari Mkuu, Ofisi ya Rais-UTUMISHI, 
 Mhe. Dr. Emmanuel Nchimbi (Waziri wa Habari, Utamaduni, Vijana na Michezo)
na Clement Mshana, (Mkurugenzi wa Habari Maelezo) wakibadilishana mawazo
baada ya picha ya pamoja na Maafisa Habari wa Serikali katika Hoteli ya Mbeya Forest Hill
MADIWANI WAWEZESHWA KIMAFUNZO

Serikali imeamua kuwawezesha Waheshimiwa Madiwani na watendaji ili waweze kutoa huduma bora kwa wakazi wa mamlaka za serikali za mitaa kwa kubadili mtindo wa utendaji kazi kwa mamlaka za serikali za mitaa imeelezwa.

Kauli hiyo imetolewa na mwenyekiti wa mafunzo ya awali kwa Waheshimiwa Madiwani wa Halmashauri ya Manispaa ya Iringa Gertrude K. Mpaka.

Mpaka amesema Serikali imedhamilia kubadili mtindo wa utendaji kazi wa mamlaka za Serikali za Mitaa, chini ya Waheshimiwa Madiwani ili madhumuni ya kuanzishwa mamlaka za Serikali za Mitaa na sera ya ugatuaji madaraka kwenda katika mamlaka za Serikali za Mitaa iweze kutimizwa kwa vitendo kwa kuwawezesha Waheshimiwa Madiwani na watendaji kutoa huduma ipasavyo kwa wakazi wa mamlaka za serikali za mitaa.

Amefahamisha kuwa mada zitakazofundishwa katika mafunzo hayo zitajikita katika sheria ambayo ndiyo msingi wa kuongoza utekelezaji wa shughuli za Halmashauri. Ameyataja maeneo mengine kuwa ni kanuni za maadili ya Waheshimiwa Madiwani na kanuni za kudumu za Halmashauri. Ameongeza maeneo mengine kuwa ni mahusiano ya utendaji kati ya Serikali kuu na Serikali za Mitaa na sheria zinazoongoza mahusiano hayo, sheria ya fedha za Serikali za Mitaa na kazi na wajibu wa diwani kwa Halmashauri yake na kwa wananchi anaowawakilisha.

Gertrude Mpaka ambaye pia ni Katibu Tawala wa Mkoa wa Iringa akisisitiza umuhimu wa mafunzo hayo kwa wahusika amesema kuwa mafunzo hayo yanawahusu Waheshimiwa Madiwani wote hata kama walikuwepo katika baraza la kipindi kilichopita na kusisitiza kuwa mafunzo hayo yatawawezesha wote kupata uelewa wa wajibu kama wawakilishi wa wananchi ndani ya ya chombo cha wananchi.

Nae mtoa mada Katibu Tawala Msaidizi, Sehemu ya Menejimenti ya Serikali za Mitaa katika Sekretarieti ya mkoa wa Iringa, Wamoja Ayubu katika mahojiano maalumu amesema kuwa baada ya mafunzo hayo mabadiliko ya kifikra yataonekana dhahiri katika utendaji wa Waheshimiwa Madiwani na kuongeza mahusino baina yao na watendaji katika Halmashari yao na wananchi wanaowawakilisha.

Mafunzo hayo maalumu ya Waheshimiwa Madiwani yameandaliwa na Ofisi ya Waziri Mkuu, Tawala za Mikoa na Serikali za Mitaa na kuendeshwa na kuratibiwa na Sekretarieti ya Mkoa wa Iringa.


Sunday, December 19, 2010

...MADIWANI UNGANISHENI NGUVU KUWALETEA WANANCHI MAENDELEO

Waheshimiwa Madiwani wa Halmashauri ya Wilaya ya Mufindi wamekumbushwa kuwa wanalo jukumu la msingi la kuunganisha nguvu na kuwaletea maendelea wananchi wao kupitia Ilani ya chama kilichopo madarakani na kuacha siasa za chuki na kupakana matope.

Rai hiyo imetolewa na Mkuu wa Wilaya ya Mufindi, Evarista Kalalu wakati wa kufungua mafunzo ya awali kwa Waheshimiwa Madiwani wa Halmashauri ya Mufindi kilichofanyika katika ukumbi wa Halmashauri ya Wilaya ya Mufindi.

Kalalu amesema kuwa jukumu lililo mbele yao ni ni kuitekeleza Ilani ya uchaguzi ya chama kilichopo madarakani ili kuweza kuunganisha nguvu katika kuwaletea maendeleo wananchi waliowachagua. Aidha amesisitiza kuwa kipindi cha kampeni na ushindani wa vyama vya siasa kimemalizika baada ya uchaguzi mkuu, na kuwataka kuacha siasa za kupakana matope, chuki na fitina.

Mkuu huyo wa Wilaya ya Mufindi amewakumbusha Waheshimiwa Madiwani kuzingatia kuwa baada ya miaka mitano ya kuwawakilisha wananchi katika Kata zao watawajibishwa kutokana na kazi moja ya jinsi gani alisshiriki kuwaongoza wananchi wake katika kujiletea maendeleo.

Akielezea umuhimu wa mafunzo hayo amesema kuwa yatasaidia kuondoa migogoro inayotokana na muingiliano wa majukumu katika mipaka ya kiutendaji baina yao na Halmashauri wanayoiongoza. Ameongeza pia kuwa mafunzo hayo yataondoa migogoro baina ya wananchi wanaowakilishwa na Halmashauri husika.

Mafunzo hayo ya Waheshimiwa Madiwani yameandaliwa na Ofisi ya Waziri Mkuu, Tawala za Mikoa na Serikali za Mitaa na kusimamiwa na kuendeshwa na wataalamu wa Sekretarieti ya Mkoa wa Iringa.