Thursday, September 12, 2013

IRINGA WATAKIWA KUFANYA KAZI KWA JUHUDI




W
atumishi mkoani Iringa wametakiwa kufanya kazi kwa kujituma ili kufikia malengo ya serikali ya kuwaletea wananchi maendeleo na matokeo makubwa yanayoonekana.

Kauli hiyo imetolewa na Muu wa Mkoa wa Iringa, Dkt. Christine Ishengoma alipokuwa akiongea na wafanyakazi wa serikali wilayani Mufindi katika ukumbi wa Halmashauri ya wilaya ya Mufindi kupitia utaratibu wake wa kuongea na kusikiliza changamoto zinazowakabili wafanyakazi wa serikali mkoani Iringa.
Mkuu wa Mkoa wa Iringa, Dkt. Christine Ishengoma

Dkt. Christine amesema kuwa kila mfanyakazi wa serikali lazima afanye kazi kwa nafasi yake na kwa kujituma ili kazi yake iweze kwenda vizuri na kufikia malengo ya serikali ya kuwaletea maendeleo wananchi wake. “Kazi hii ni yetu ya kumuendeleza mwana Mufindi na Iringa kwa ujumla. Hivyo, kila mmoja asipende kufanya kazi kwa kuchungwa ni vizuri kujichunga mwenyewe. Lazima muwe na ratiba zenu za kazi na zenye malengo” alisisitiza Dkt. Christine.

Amesema katika kuhakikisha matokeo makubwa yanapatikana na kuonekana kwa wananchi ni vizuri utaratibu wa matokeo makubwa sasa (BRN) ukaanzia nyumbani ili uweze kufahamika vizuri kuanzia ngazi ya familia. Amesema kuwa kabla ya kufikiria kutoa matokeo makubwa kwa ujumla wake ni vizuri kila mfanyakazi akajiangalia yeye mwenyewe. “Lazima uangalie wewe mwenyewe unaendaje na BRN” alisisitiza Dkt. Christine.

Mkuu wa Mkoa wa Iringa ameyataja maeneo ya vipaumbele katika utaratibu wa matokeo makubwa sasa kuwa ni maji, kilimo, elimu, uchukuzi, nishati na mapato.

Akiongelea upande wa mapato, amesema kuwa ni lazima halmashauri ya wilaya ya Mufindi ikajipanga vizuri kuhakikisha inaongeza ukusanyaji wa mapato ya ndani ili iweze kutoa huduma bora kwa wananchi. Amesema “halmashauri hii inasikifa kwa uchapa kazi na ukusanyaji wa mapato hivyo hakikisheni mnaitendea haki halmashauri hii isirudi nyuma”alisisitiza Mkuu wa Mkoa.

Mkuu wa Mkoa amekemea vikali siasa katika utekelezaji wa utaratibu wa matokeo makubwa sasa (BRN). Amesema “kwenye utaratibu wa BRN msiweke siasa, mpo hapa kwa ajili ya kutekeleza Ilani ya uchaguzi ya chama cha mapinduzi ya mwaka 2010-2015.siaka kazini ni marufuku, fanyeni kazi za serikali kwa mujibu wa taratibu zilizopo” aling’aka Mkuu wa Mkoa wa Iringa.

Akiongelea maandalizi ya kilele cha mbio za Mwenge wa Uhuru, Kumbukumbu ya Baba wa Taifa Mwl. Julius Nyerere na Wiki ya Vijana, Mkuu wa Mkoa amewataka wafanyakazi hao kushirikiana na viongozi katika kufanikisha sherehe hizo kubwa mkoani hapa. “Amesema shirikianeni na viongozi wenu ikiwa ni pamoja na kutoa ushauri wa kuboresha maandalizi na maadhimisho ya sherehe hizi muhimu katika mkoa na taifa letu kwa ujumla”.

Akiongelea miradiitakayotembelewa na Mwenge wa Uhuru mkoani Iringa, Mkuu wa Mkoa amezitaka wilaya kuhakikisha kuwa miradi ya Mwenye inakamilika kwa wakati na kwa ubora unaokubalika.
Mkoa wa Iringa umepewa heshima ya kuwa mwenyeji wa kilele cha mbio za Mwenge wa Uhuru, Kumbukumbu ya Baba wa Taifa Mwl. Julius Nyerere na wikiya Vijana kitaifa kwa mwaka 2013.
=30=


IRINGA YAKOMESHA UDANGANYIFU KATIKA MITIHANI




Na. Bruno Machary
Serikali Mkoani Iringa imejidhatiti kufanikisha mtihani wa kuhitimu elimu ya msingi unafanyika pasipo kuwepo na vitendo vya udanyanyifu.

Kauli hiyo imetolewa na Afisa Elimu wa Mkoa wa Iringa, Mwl. Joseph Mnyikambi alipokuwa akiongea na waandishi wa habari waliomtembelea ofisini kwake ili kujua jitihada zilizochukuliwa na Mkoa katika kukabiliana na vitendo vya udanganyifu kwa walimu na wanafunzi wakati wa mtihani huo.

Akitoa ufafanuzi, Mnyikambi amesema kuwa wamejitahidi kutoa semina kwa walimu ili kuhakikisha  kuwa mtihani huo unafanyika kwa haki na amani pasipo kuwepo kwa vitendo vyovyote vya udanganyifu kwa wanafunzi wala walimu watakaosimamia mtihani huo. Kwa upande wa wanafunzi, amesema kuwa kila mwanafunzi atatumia dawati lake ili kuondoa mianya inayoweza kushawishi udanganyifu.

Akiongelea upande wa maandalizi ya mtihani huo, amesema kuwa maandalizi yote yamekamilika na  vifaa vyote vimeshafika Mkoani na vimeshapelekwa kila Halmashauri. “Vifaa vyote vinavyohusu masuala ya mtihani huo vimeshafika Mkoani hapa na vimeshapelekwa katika wilaya zote” amesema Mnyikambi.

Afisa Elimu huyo amesema kuwa katika mwaka wa masomo 2013  idadi ya wanafunzi wanaotarajiwa kufanya mtihani huo imepungua kwa jumla ya wanafunzi 1194 ikilinganishwa na mwaka wa masomo 2012. Kwa mwaka 2012 kulikuwa na watahiniwa 24,342 wakati mwaka huu wapo watahiniwa 23,148.

Mtihani huo unaotarajiwa kuanza kufanyika siku ya jumatano ya tarehe 11/9/2013 kitaifa, utajumuisha shule za msingi 466 za  Mkoa wa Iringa. Mkoa wa Iringa una jumla ya wilaya tatu ambazo ni Iringa, Mufindi na Kilolo, zenye jumla ya Halmashauri nne.
=30=

WATAHINIWA DARASA LA SABA WAPUNGUA IRINGA




Na Charles Amulike
Idadi ya watahiniwa wanaotarajia kufanya mtihani wa darasa la Saba mkoani Iringa imepungua kwa mwaka huu ikilinganishwa na mwaka jana 2012 kutoka wanafunzi 24,342 mpaka kufikia 23,148 kwa mwaka huu.

Hayo yamesemwa na Afisa Elimu wa Mkoa wa Iringa, Joseph Mnyikambi, alipokuwa akiongea na waandishi wa habari ofisini kwake kuhusu maandalizi ya mtihani wa kuhitimu elimu ya msingi kwa mwaka 2013.

Mnyikambi amesema kuwa jumla ya wanafunzi 23,148 tayari wamesajiliwa kufanya mtihani huo wa darasa la saba kwa mwaka huu 2013. Ameongeza kuwa kati ya watahiniwa hao wavulana 10,752 na wasichana 12,396. Akiongelea idadi ya watahiniwa hao kwa ulinganifu na mwaka jana, amesema “idadi ya watahiniwa waliofanya mtihani mwaka jana 2012 ni kubwa kuliko ya mwaka huu 2013”. Amefafanua kuwa mwaka jana jumla ya watahiniwa ilikuwa 24,342 waliofanya mtihani wa kumaliza darasa la saba. Kati yao wavulana walikuwa 11,484 na wasichana walikuwa 12,858.

Mnyikambi amesema kuwa idadi ya wanafunzi waliopungua kwa mwaka huu wa 2013 ni 1194 kiwango ambacho ni kikubwa ikilinganishwa na mwaka jana 2012.

Akiongelea maandalizi ya kufanyika kwa mtihani huo, Mnyikambi amesema “maandalizi yamekamilika, ikiwa ni pamoja vyumba vya kufanyia mtihani huo na madawati ya kutosha wanafunzi wote wanaotarajiwa kufanya mtihani huo”. Amesema katika kukomesha vitendo vya udandanganyifu katika mitihani ya kumaliza elimu ya msingi, Mkoa umejipanga vizuri kuhakikisha kila mtahiniwa anakaa kwenye dawati lake peke yake. Ameongeza kuwa  wasimamizi wa mitihani wamepatiwa semina ili kuhakikisha wanadhibiti udanganyifu wa aina yoyote unaoweza kujitokeza katika mitihani hiyo.

Afisa Elimu Mkoa amesema kuwa tayari vifaa vya mitihani vimefika na vimepelekwa katika Halmashauri zote za Mkoa wa Iringa. Aidha, amewahakikishia wananchi kuwa hakuna changamoto yoyote iliyojitokeza Mkoani hapa.
=30=ᘖ

Wednesday, August 28, 2013

MATUKIO KATIKA PICHA YA SIKU YA FAMILIA NA MAPAMBANO DHIDI YA UKIMWI MAHALA PA KAZI

                                          Wadau wakiwa wanafuatilia semina

                             Wadau wa semina wakifuatilia mafunzo

                                                    Wasanii nao hawakuwa nyuma

                                         Wafuatiliaji wakifuatilia wa Senina

                                                             Muda wa maakuli

                                                        Dkt. Paul Luvanda akitoa mada

                          Scolastica Mlawi akihamasisha watumishi kujimwaga katika muziki

                                                               Muda wa muziki


                                     Ndani ya ukumbi wa SIASA ni KILIMO




                 Washiriki wa siku ya Familia na Mapambano dhidi ya Ukimwi Mahala Pa kazi


                                                 Ndani ya ukumbi muda wa maakuli


                                 Mtoa mada akiwasilisha mada yake


        Katibu Tawala Msaidizi, Sehemu ya Mipango na Uratibu- Nuhu Mwasumilwe akifunga Semina



RS IRINGA PIMENI AFYA




Watumishi wa Ofisi ya Mkuu wa Mkoa wa Iringa wametakiwa kupima afya zao ili kujitambua na kuchukua hatua dhidi ya maambukizi ya VVU na ukimwi kwa lengo la kuwa na afya njema na kuongeza ufanisi wa kazi.
                            Katibu Tawala Msaidizi, Sehemu ya Utawala, Scolastica Mlawi

Kauli hiyo imetolewa na Mkuu wa Mkoa wa Iringa, Dkt. Christine Ishengoma katika hotuba yake iliyosomwa kwa niaba yake na Katibu Tawala Msaidizi, Sehemu ya Utawala na Rasilimali watu, Scolastica Mlawi wakati wa kufungua semina ya siku ya familia na mapambano dhidi ya ukimwi mahala pa kazi kwa watumishi wa Ofisi ya Mkuu wa Mkoa wa Iringa iliyofanyika katika ukumbi wa mikutano wa Siasa ni Kilimo wilayani Iringa. 

Dkt. Christine amesema “ni vema kila mtumishi apime afya yake ili ajitambue na kuchukua hatua zinazostahili kwa kuwa huduma za kuzuia maambukizi mapya kwa watu ambao hawana maambukizi pia wale wenye maambukizi wasipate maambukizi mengine zinatolewa katika zahanati, vituo vya afya na hospitali za serikali, taasisi na mashirika binafsi”. Amesema kuwa wateja wanaotembelea vituo vya kutolea huduma za afya wakiwa wanaumwa magonjwa mengine aukusindikiza wagonjwa wanashauriwa kupima VVU. Amesema kuwa huduma hiyo imesaidia sana kuwafanya watu wengi kujua hali za afya zao kuhusiana na maambukizi ya VVU na kuchukua hatua.

Mkuu wa Mkoa wa Iringa amesema kuwa Serikali ya Jamhuri ya Muungano wa Tanzania inawajali sana watumishi wake hasa wanaoishi na VVU. Amesema “serikali ya Jamhuri ya Muungano wa Tanzania katika kuwajali watumishi wake inatekeleza Waraka Na. 6 wa Mwaka 2006 kutoka Ofisi ya Rais, Menejimenti ya Utumishi wa Umma ambao unamtaka kila mwajiri katika Wizara, Taasisi, Mashirika na Idara za Serikali  kuwasaidia watumishi wanaoishi na V.V.U. kwa kuwapa fedha kidogo kwa ajili chakula na nauli wakati wa kwenda kupata huduma za matibabu”.

Ameendelea kusema kuwa watumishi wamekuwa wakishauriwa kupima afya zao na kutoa elimu ya kuzuia maambukizi mapya. Katika kuonesha msisitizo, ametoa rai tena kwa watumishi kupima afya zao ili wanapogundulika kuwa na maambukizi ya V.V.U. waweze kupata huduma ya ushauri, vipimo, dawa, matibabu kwa magonjwa nyemelezi na mlo kamili.

Akiongelea malengo ya semina hiyo kwa watumishi, Afisa Tawala mwandamizi katika ofisi ya Mkuu wa Mkoa wa Iringa, Neema Mwaipopo amesema kuwa lengo ni kuelimishana na kukumbushana kujikinga na maambukizi mapya ya ukimwi kwa ambao bado hawajapata na kwa ambao wamepata kujikinga na maambukizi mapya. Amesema kuwa lengo jingine ni kuwahamasisha watumishi kwenda kupima na watakaokutwa wameathirika watoe taarifa kwa mwajiri ili waweze kunufaika na msaada wa huduma kwa mujibu wa Waraka Na. 6 wa Mwaka 2006 kutoka Ofisi ya Rais, Menejimenti ya Utumishi wa Umma ambao unamtaka kila mwajiri kuwasaidia watumishi wanaoishi na V.V.U.

Neema amesema kuwa suala la unyanyapaa halipo kutokana na watumishi kupatiwa elimu ya mara kwa mara. Amesema kuwa utaratibu wa kutoa elimu kupitia semina, vikao na mikutano mbalimbali ni endelevu katika ofisi ya Mkuu wa Mkoa wa Iringa.

Siku ya familia na mapambano dhidi ya ukumwi katika ofisi ya mkuu wa mkoa imeongozwa na kaulimbiu isemayo Iringa bila maambukizi mapya, unyanyapaa na vifo vitokanavyo na ukimwi inawezekana. 
=30=