Thursday, January 26, 2017

MUFINDI DC YAANDAA HATI 500



Na Ofisi ya Mkuu wa Mkoa
Halmashauri ya wilaya ya Mufindi imefanikiwa kuandaa hati zaidi ya 500 kwa mujibu wa sheria.

Akiwasilisha taarifa ya Wilaya ya Mufindi kwa Naibu Waziri wa Ardhi, Nyumba na Maendeleo ya Makazi, Mkuu wa Wilaya ya Mufindi, Jamhuri William alisema kuwa katika kipindi cha mwaka wa fedha 2015/2016 na 2016/2017, Wilaya ya Mufindi inaendelea kutekeleza kazi mbalimbali ikiwemo uandaaji wa hati chini ya sheria namba 4 ya mwaka 1999. “Jumla ya hati 533 (Mji Mafinga 474 na Wilaya ya Mufindi 59) zimeandaliwa na hati chini ya sheria namba 5 ya mwaka 1999 zimeandaliwa jumla ya hati 512 kwa Halmashauri ya Wilaya ya Mufindi” alisema William.

Akiongelea ukusanyaji wa mapato ya ardhi, Mkuu wa Wilaya ya Mufindi alisema kuwa katika kutekeleza ukusanyaji wa mapato ya ardhi, kwa mwaka wa fedha 2015/2016 na mwaka 2016/2017 makusanyo ya kodi za ardhi Wilaya ya Mufindi yalikuwa 1053427600. Aliongeza kuwa katika Halmashauri ya Mji wa Mafinga kodi ilikuwa shilingi 457,430,426 na Halmashauri ya Wilaya ya Mufindi shilingi 595,997,174.

Akiongelea Mipango miji na vijiji, William alisema kuwa katika kipindi cha mwaka wa fedha 2015/2016 na 2016/2017, wilaya yake iliandaa michoro ya mipango miji 17 (michoro 12 katika Mji wa Mafinga na michoro mitano katika Halmashauri ya wilaya ya Mufindi). Aliongeza kuwa vijiji 47 vina mipango ya matumizi bora ya ardhi wilayani hapo. Alisema kuwa jitihada zinafanywa na wilaya yake kuhakikisha vijiji vilivyobaki kwa kushirikiana na mashirika yasiyo ya kiserikali vinakuwa na mpango wa matumizi bora ya ardhi.  

Mkuu huyo wa wilaya alisema kuwa wilaya yake katika kipindi cha mwaka 2015/2016 na 2016/2017 ilifanikiwa kupima viwanja 782 (Halmashauri ya Mji wa Mafinga 749 na Halmashauri ya Wilaya ya Mufindi 33).

Kwa upande wa uthamini wa mali, alisema kuwa wilaya yake inaendelea na zoezi la uthamini wa nyumba za wananchi ambapo nyumba 710 zimekwisha thaminiwa. Aliongeza kuwa Halmashauri ya Mji wa Mafinga ilikamilisha zoezi la uthamini na taarifa ilishawasilishwa kwa mthamini mkuu wa serikali kwa ajili ya kupata idhini.
=30=
 

HALMASHAURI ZATAKIWA KUINGIZA WATEJA KWENYE MFUMO WA MALIPO YA KODI



Na Ofisi ya Mkuu wa Mkoa
Halmashauri za mkoa wa Iringa zimetakiwa kuingiza wateja wote wa ardhi katika mfumo wa ukusanyaji mapato ya ardhi wa kieletroniki ili serikali iweze kupata mapato yake na kutoa huduza za kijamii.

Agizo hilo lilitolewa na Naibu Waziri wa Ardhi, Nyumba na Maendeleo ya Makazi, Dr. Angelina Mabula mjini Mafinga alipokuwa akifanya majumuisho ya ziara yake ya kikazi mkoani Iringa ya kukagua mifumo wa ukusanyaji mapayo ya ardhi mkoani Iringa.

Dr. Mabula alisema “Halmashauri zote zimefungiwa mfumo wa ukusanyaji mapato, ila takwimu zao hazijakaa sawa. Halmashauri hazijaweka utaratibu mzuri wa kuweka kumbukumbu. Hivyo, naagiza kuwa ifikapo tarehe 30 Juni, 2017, Halmashauri zote lazima wateja wake wote wawe wameingizwa katika mfuko wa ukusanyaji mapato ya ardhi”. 

Alisema kuwa utaratibu wa kutoingiza wateja wote katika mfumo, unaikosesha serikali mapato kwa sababu Halmashauri zinashindwa kuwatambua wateja wote wanaodaiwa. “Kutokana na kushindwa kuwafahamu wateja wote, hata malengo yanayokadiliwa katika bajeti yanakuwa chini sana ikilinganishwa na uhalisia” alisema Dr. Mabula. Aliongeza kuwa, Afisa Ardhi yeyote mteule, atakayeshindwa kufikia malengo ya kuingiza wateja wote katika mfuko wa ukusanayaji mapato atatenguliwa nafasi yake na nafasi hiyo kupewa mtu mwingine.

Naibu Waziri alizishauri Halmashauri kuweka utaratibu wa kutoa notisi za kuwakumbusha wateja wadaiwa wa kodi ya ardhi mara kwa mara ili kuwakumbusha kulipa tofauti na utaratibu uliopo sasa.
Alisema kuwa changamoto ya mfuko kushindwa kuwapata wateja wote wadaiwa kwa mara moja imechukuliwa na wizara yake na itaenda kufaanyiwa kazi. Vilevile, alizitaka Halmashauri kukusanya madeni yote ya ardhi kwa wateja ili fedha hizo ziweze kutumika katika utaratibu wa serikali.

Akiongelea ngogoro wa mpaka kati ya wilaya za Iringa na Kilolo, katika vijiji vya Ilole na Ilambilole, Dr. Mabula alisemaa kuwa vijiji vyote vina GN jambo ambalo si la kawaida. Aliagiza kuwa GN hizo zipitiwe upya ili kupatiwa suluhisho. Aliwataka wakuu wa wilaya kuendelea kutatua migogoro iliyopo katika maeneo yao kwa kuwafuata wananchi katika maeneo yao ili kusikiliza na kutatua kero zao.

Akiongelea sababu za migogoro ya ardhi, Naibu Waziri alisema kuwa migogoro mingi ya ardhi inachangiwa na kutokuwa na mpango wa matumizi bora ya ardhi kati ya wakuma na wafugaji. “Nazitaka Halmashauri kutambua idadi ya wafugaji na mifugo waliyonayo ili kupanga matumizi bora ya ardhi” aliagiza Naibu Waziri. Pia aliwataka wakuu wa wilaya kushiriki katika mikutano ya ugawaji ardhi ili kusimamia taratibu zilizopo kufuatwa.     
=30=

Friday, November 18, 2016

WATAALAM IRINGA WATAKIWA KUBUNI JINSI YA KUWASAIDIA WANUFAIKA WA TASAF


Na. Mwandishi Maalumu, Iringa
Wataalam mkoani hapa wametakiwa kujikita katika kutafuta mbinu za kuwasaidia wanufaika wa mpango wa kunusuru kaya masikini Tasaf III ili wajikwamue katika lindi la umasikini.

Agizo hilo lilitolewa na Katibu Tawala Mkoa wa Iringa, Wamoja Ayubu alipokuwa akifungua kikao kazi cha wataalam wa wilaya na mkoa wa Iringa cha kupanga mikakati ya jinsi ya kuzisaidia kaya masikini zinazonufaika na ruzuku ya Tasaf kilichofanyika katika ukumbi wa mikutano wa Bonde la Rufiji mjini Iringa.

Ayubu alisema “lengo la kikao kazi hiki ni kuwashirikisha ninyi wataalam wa sekta za afya, elimu, kilimo, mifugo, maendeleo ya jamii na ushirika ambazo kwa kiasi kikubwa zimeguswa na walengwa wa mpango huu wa Tasaf. Mnafahamu kuwa walengwa wengi wa Tasaf wapo vijijini na wameanzisha miradi midogomidogo ya ufugaji wa kuku, bata, simbilisi, nguruwe, mbuzi na kondoo. 

Aidha, wengine wanaboresha makazi yao, wote hawa wanahitaji msaada na ushauri wa kitaalam na ufuatiliaji wa karibu”. Aliongeza kuwa wataalam wa serikali wanawajibu wa kuwasaidia na kuwaelekeza wanufaika hao kuweza kufikia malengo yao. Aliwataka kuona kuwa kuwasaidia wanufaika hao ni jukumu lao na kuwataka kuweka katika mpango kazi wao na ratiba ya kazi ya kila mwezi.

Akiongelea wanufaika wanaopata ruzuku yenye masharti ya elimu na afya, Katibu Tawala Mkoa aliwataka kuwasimamia walengwa ili watimize masharti hayo. “Mfano, upande wa afya mlengwa atapata ruzuku kama ametimiza sharti la kupeleka mtoto kliniki aliye chini ya umri wa miaka mitano. Kwa upande wa elimu mlengwa atapata ruzuku kama atahakikisha mtoto wake anahudhuria shuleni siyo chini ya asilimia 80 ya mahudhurio yanayohitajika” alisisitiza Ayubu. Ni jukumu la kikao kazi hiki kujadili na kupanga namna bora ya kufanya ufuatiliaji wa karibu na kutoa ushauri kwa walengwa ili malengo ya serikali ya kupunguza umasikini yaweze kutimia. 

Awali Mratibu wa Tasaf Mkoa wa Iringa, William Kingazi alimtaarifu Katibu Tawala Mkoa kuwa mkoa wa Iringa ulipata fedha kupitia mpango wa Tasaf III kwa ajili ya kuziwezesha kaya masikini sana ili ziweze kujikimu. Mpango huo ulianza mwezi Januari, 2015 ambapo kaya 26,321 zilitambuliwa kuwa masikini sana. Hadi kufikia mwezi Septemba, 2016 mkoa ulipokea shilingi 6,525,080,001.
=30=

HOSPITALI YA RUFAA IRINGA YAVUKA LENGO UPIMAJI SUKARI


Na Ofisi ya Mkuu wa Mkoa IRINGA
Kliniki maalumu ya kupima ugonjwa wa kisukari na shinikizo la damu mkoani Iringa imevuka lengo kwa kufanikiwa kupima wananchi zaidi ya 2,000.

Kauli hiyo ilitolewa na Mganga mkuu wa mkoa wa Iringa Dkt Robert Salim alipokuwa akiongea na waandishi wa habari katika hitimisho la siku tano za kliniki hiyo iliyofanyika katika viwanja vya bustani ya Manispaa mjini Iringa.

Dkt. Salim alisema “kliniki ya kupima ugonjwa wa kisukari na shinikizo la damu imefanikiwa kwa kiasi kikubwa. Tumefanikiwa kuwapima wananchi 2,007 na kuvuka lengo letu la kuwapima wananchi 2,000, hivyo lengo limefikiwa kwa asilimia 100.35”. Alisema kuwa mafanikio haya yanatokana na utayari wa wananchi wa mkoa wa Iringa kujitokeza kupima afya zao pindi fursa zinapojitokeza za upimaji zinapojitokeza.

Mganga mkuu wa mkoa aliwataka waratibu wa magonjwa yasiyo ya kuambukiza katika halmashauri kuanzisha kliniki za magonjwa yasiyo ya kuambukiza katika halmashauri zao na kutoa huduma za mkoba. Aidha, liwataka kufikiria kuanzisha utaratibu wa kuwapima watumishi katika taasisi mbalimbali ili kuwapa fursa ya kunufaika na huduma za afya kwa magonjwa yasiyo ya kuambukiza.
Dkt Salim aliwatka wananchi wa mkoa wa Iringa kujikita katika kufanya mazoezi kama kutembea na kukimbia ili kujikinga na kisukari. Rai nyingine alitoa kuwa wananchi kuacha tabia ya kula vyakula vyenye mafuta, kupunguza unywaji wa pombe kupita kiasi na uvutaji wa sigara.
Akiongelea ufanisi wa kliniki hiyo, Dtk Tatu Mbotoni wa hospitali ya rufaa ya mkoa wa Iringa alisema kuwa kliniki hiyo ilifanikiwa kutokana na timu yake ya wataalam kujipanga vizuri kuwahudumia wananchi wote waliojitokeza kwa muda. “Tulipanga timu ya wataalam wa kutosha kutoka hospitali ya rufaa ya mkoa na hospitali ya manispaa Frelimo.

Lengo la kuandaa wataalam wengi ni kuhakikisha kila mwananchi anayehudhuria anahudumiwa haraka sana ili aweze kuendelea na mjukumu yake tukizingatia matakwa ya serikali ya awamu ya tano ya hapa kazi tu’’ alisema Dkt Mbotoni.

Nae Elimina Sanga aliyefika katika kliniki hiyo, alisema ameridhishwa na huduma alizopata na kuomba kliniki hiyo iwe endelevu badala ya kusubiri kwenye maadhimisho ya siku ya kisukari duniani.
=30=  
 

MAKAMPUNI YA ULINZI YATAKIWA KUTUMIA WASTAAFU WA MAJESHI YA ULINZI


Na. Ofisi ya Mkuu wa Mkoa
Makampuni ya ulinzi mkoani Iringa yametakiwa kuwatumia askari wastaafu kutoka majeshi ya ulinzi kwa mujibu wa sheria ili kunufaika na ujuzi walionao na kuimarisha usalama wa nchi.

Kauli hiyo ilitolewa na mkuu wa mkoa wa Iringa, Amina Masenza alipokuwa akifungua mkutano mkuu wa chama cha makampuni binafsi ya ulinzi mkoa wa Iringa (TSIA) kilichofanyika katika bwalo la Polisi mjini Iringa jana.

Masenza alisema “wito  wangu  kwenu  ni  kwamba  hakikisheni wasimamizi wa makampuni ya ulinzi wanakuwa wastaafu kutoka majeshi ya ulinzi kwa mujibu wa sheria. Wastaafu hawa wanauzoefu na ujuzi katika kusimamia masuala yote ya kiulinzi na usalama”. Aliongeza kuwa wastaafu hao wanauwezo wa kudhibiti nidhamu na kufundisha maadili mema kwa walinzi. 

Alisema kuwa walinzi wengi katika makampuni hayo wanakabiliwa na tatizo la nidhamu na maadili hivyo kuwatumia askari wastaafu kutawasaidia kuimarisha nidhamu na maadili kwa walinzi wa makampuni hayo.

Mkuu wa mkoa wa Iringa alipongeza juhudi zinazofanywa na makampuni ya ulinzi mkoani hapa. Alisema “mimi binafsi nichukue nafasi hii kutambua juhudi mbalimbali zinazofanywa na makampuni ya ulinzi katika kuimarisha hali ya amani miongoni mwa jamii na taasisi mbalimbali. Makampuni ya ulinzi yana mchango mkubwa katika kulinda mali za raia wa Tanzania. Pasingekuwepo makampuni haya vyombo vyetu vya ulinzi haviwezi kulinda peke yao kwa kuwa watanzania ni wengi na askari ni wachache lakini pia mali za watanzania ni nyingi na ukizingatia wahalifu wanaongezeka na kubuni mbinu mpya kila kukicha”. 

Mkuu wa mkoa wa Iringa ambaye pia ni mwenyekiti wa kamati ya usalama ya mkoa aliagiza makampuni yote ya ulinzi mkoani Iringa kuhakikisha walinzi wake wote wanapitia mafunzo ya JKT au mgambo. “Walinzi wanapaswa kupitia mafunzo ya JKT au mgambo. Mafunzo haya huwajengea uwezo wa kupambana na majambazi, kuzuia matendo ya kihalifu na kulitumikia Taifa kizalendo” alisisiza mkuu wa mkoa. 

Awali afisa upelelezi mkoa wa Iringa, Deusdedit Kasindo waliwakumbusha wamiliki wa makampuni ya ulinzi kuwa ni wabia wa jeshi la Polisi kwa sababu wanafanya kazi zinazofanana za kulinda raia na mali zao. Alisisitiza kuwa viongozi wa makampuni hayo wanatakiwa kuwa na taaluma ya ulinzi na walinzi wao wanatakiwa kuwa na taaluma ya ulinzi.
Kasindo aliwakumbusha wamiliki wa makampuni ya ulinzi kuwa wanatakiwa kuwa na silaha mbili angalau tofauti na maeneo mengi ambayo walinzi wanakuwa na silaha moja jambo ambalo ni rahisi kuvamiwa. Aliwakumbusha kuwa kuazima silaha ni kosa kisheria. Aidha, aliwataka wamiliki wa makumpuni hayo kuhakikisha walinzi wao wanajua kutumia silaha kikamilifu.
=30=