WATU WAPOTEZA HAKI KWA KUTOKUJUA KUSOMA NA KUANDIKA

Na Mwandishi Maalum Iringa

Serikali imesema kuwa watu wengi wamekuwa wakipoteza haki zao za msingi kutokana na kutokujua kusoma na kuandika nchini. 

Kauli hiyo ilitolewa na Naibu Waziri wa Elimu, Sayansi na Teknolojia na Mafunzo ya Ufundi, Mhandisi Stella Manyanya alipokuwa akiongea na wananchi wa kata ya Ibumu wilayani Kilolo jana.

Mhandisi Manyanya alisema “ndugu zangu, kutokujua kusoma na kuandika kumewafanya wananchi wengi kupoteza haki zao katika kupiga kura. Wapo watu wamedanganywa na kushindwa kufanya maamuzi sahihi wakati wa upigaji kura. Watu wengine kwa kutokujua kusoma na kuandika wameibiwa katika kufanya miamala ya fedha. 

Aidha, siri za watu zimewekwa hadharani na watu ambao waliwaamini. Hivyo, kujua kusoma na kuandika ni jambo la msingi sana”.

Aidha, aliutaka uongozi wa wilaya ya Kilolo kuhakikisha kila mtoto mwenye umri wa kwenda shule anapelekwa ili kuondoa tatizo la ucheleweshaji watoto kuanza shule. Alisema kuwa kuwachelewesha watoto kuanza shule kunapelekea baadhi yao kulazimika kuanza kujifunza elimu kupitia mfumo usio rasmi na Memkwa. 

Kupitia mfumo usio rasmi baadhi yao wamekuwa wakiishia njiani kutokana na kukata tamaa. “Katika hili la kupeleka mtoto shule, mzazi au mlezi yeyote atakayekaidi achukuliwe hatua. Wazazi na walezi wameacha kupeleka watoto wao shule, kutwa wanawapeleka mkoani Dar es Salaam kufanya kazi za ndani. Kama ni kufanya kazi waende baada ya kumaliza shule. Watoto wadogo hata maana ya kazi na mshahara hawajafahamu” alisisitiza Mhandisi Manyanya.

Naibu Waziri alisema kuwa suala la kusoma na kuandika katika jamii ni la muhimu sana na halitakiwi kuonewa aibu. “Tusilionee aibu suala hili. Wabunge kama kweli tunawapenda wananchi wetu, lazima tuwahimize kusoma na kuandika. Jambo hili litafanya tuache kumbukumbu na historia nzuri kwenye majimbo yetu” alisisitiza Mhandisi Manyanya. Katika kuhakikisha jamii inajua kusoma na kuandika, aliagiza kuanzishwa kwa madarasa ya watu wazima katika maeneo mbalimbali ili watu waliokosa fursa hiyo waweze kuipata nje ya mfumo rasmi na elimu hiyo ipewe uzito mkubwa.

Ikumbukwe kuwa mkoa wa Iringa una kiwango cha asilimia 18 cha watu wasiojua kusoma na kuandika. 

=30=    

            

IRINGA KUSIMAMIA UPIMAJI VIWANJA

Na Ofisi ya Mkuu wa Mkoa

Mkoa wa Iringa umeendelea kusimamia upimaji wa viwanja na uandaaji wa michoro ya mipango miji ili kuwa na miji iliyopangwa vizuri. 

Kauli hiyo ilitolewa na Mkuu wa Mkoa wa Iringa, Amina Masenza alipokuwa akiwasilisha taarifa ya sekta ya ardhi mkoa wa Iringa kwa Naibu Waziri wa Ardhi, Nyumba na Maendeleo ya Makazi, Dr. Angelina Mabula ofisini kwake hivi karibuni.

Masenza alisema “usimamizi wa miji na uandaaji wa mipango ya matumizi bora ya ardhi umeendelea kufanyika na kusimamiwa katika Halmashauri zote za Mkoa. Ili kuhakikisha kunakuwepo na miji iliyopangwa, mkoa umeendelea kusimamia uandaaji wa michoro ya mipango miji na upimaji wa viwanja kwa ajili ya matumizi mbalimbali katika Halmashaauri zote za Mkoa”

Alisema kuwa jumla ya viwanja 37,463 vimepimwa mkoani Iringa. Aliongeza kuwa katika Halmashauri ya Manispaa viwanja 21,230, Halmashauri ya mji wa Mafinga viwanja 11,950, Halmashauri ya wilaya ya Iringa viwanja 1,500, Halmashauri ya wilaya ya Kilolo viwanja 2,020 na Halmashauri ya wilaya ya Mufindi viwanja 763.

Alisema kuwa mkoa umeendelea kusimamia na kuhakikisha makazi holela na ujenzi wa milimani unapungua na kuisha kabisa kwa kuchukua hatua madhubuti. Hatua hizo ni kusimamia ukamilishaji wa mpango kabambe wa mji wa Iringa (Iringa Master Plan) ili kuhakikisha maeneo yote yanakuwa na matumizi na kurahisisha usimamizi wake. Hatua nyingine ni kuendelea kusimamia zoezi la kurasimisha makazi ya wananchi. .  

=30=

MUFINDI DC YAANDAA HATI 500

Na Ofisi ya Mkuu wa Mkoa

Halmashauri ya wilaya ya Mufindi imefanikiwa kuandaa hati zaidi ya 500 kwa mujibu wa sheria.

Akiwasilisha taarifa ya Wilaya ya Mufindi kwa Naibu Waziri wa Ardhi, Nyumba na Maendeleo ya Makazi, Mkuu wa Wilaya ya Mufindi, Jamhuri William alisema kuwa katika kipindi cha mwaka wa fedha 2015/2016 na 2016/2017, Wilaya ya Mufindi inaendelea kutekeleza kazi mbalimbali ikiwemo uandaaji wa hati chini ya sheria namba 4 ya mwaka 1999. “Jumla ya hati 533 (Mji Mafinga 474 na Wilaya ya Mufindi 59) zimeandaliwa na hati chini ya sheria namba 5 ya mwaka 1999 zimeandaliwa jumla ya hati 512 kwa Halmashauri ya Wilaya ya Mufindi” alisema William.

Akiongelea ukusanyaji wa mapato ya ardhi, Mkuu wa Wilaya ya Mufindi alisema kuwa katika kutekeleza ukusanyaji wa mapato ya ardhi, kwa mwaka wa fedha 2015/2016 na mwaka 2016/2017 makusanyo ya kodi za ardhi Wilaya ya Mufindi yalikuwa 1053427600. Aliongeza kuwa katika Halmashauri ya Mji wa Mafinga kodi ilikuwa shilingi 457,430,426 na Halmashauri ya Wilaya ya Mufindi shilingi 595,997,174.

Akiongelea Mipango miji na vijiji, William alisema kuwa katika kipindi cha mwaka wa fedha 2015/2016 na 2016/2017, wilaya yake iliandaa michoro ya mipango miji 17 (michoro 12 katika Mji wa Mafinga na michoro mitano katika Halmashauri ya wilaya ya Mufindi). Aliongeza kuwa vijiji 47 vina mipango ya matumizi bora ya ardhi wilayani hapo. Alisema kuwa jitihada zinafanywa na wilaya yake kuhakikisha vijiji vilivyobaki kwa kushirikiana na mashirika yasiyo ya kiserikali vinakuwa na mpango wa matumizi bora ya ardhi.  

Mkuu huyo wa wilaya alisema kuwa wilaya yake katika kipindi cha mwaka 2015/2016 na 2016/2017 ilifanikiwa kupima viwanja 782 (Halmashauri ya Mji wa Mafinga 749 na Halmashauri ya Wilaya ya Mufindi 33).

Kwa upande wa uthamini wa mali, alisema kuwa wilaya yake inaendelea na zoezi la uthamini wa nyumba za wananchi ambapo nyumba 710 zimekwisha thaminiwa. Aliongeza kuwa Halmashauri ya Mji wa Mafinga ilikamilisha zoezi la uthamini na taarifa ilishawasilishwa kwa mthamini mkuu wa serikali kwa ajili ya kupata idhini.

=30=

 

HALMASHAURI ZATAKIWA KUINGIZA WATEJA KWENYE MFUMO WA MALIPO YA KODI

Na Ofisi ya Mkuu wa Mkoa

Halmashauri za mkoa wa Iringa zimetakiwa kuingiza wateja wote wa ardhi katika mfumo wa ukusanyaji mapato ya ardhi wa kieletroniki ili serikali iweze kupata mapato yake na kutoa huduza za kijamii.

Agizo hilo lilitolewa na Naibu Waziri wa Ardhi, Nyumba na Maendeleo ya Makazi, Dr. Angelina Mabula mjini Mafinga alipokuwa akifanya majumuisho ya ziara yake ya kikazi mkoani Iringa ya kukagua mifumo wa ukusanyaji mapayo ya ardhi mkoani Iringa.

Dr. Mabula alisema “Halmashauri zote zimefungiwa mfumo wa ukusanyaji mapato, ila takwimu zao hazijakaa sawa. Halmashauri hazijaweka utaratibu mzuri wa kuweka kumbukumbu. Hivyo, naagiza kuwa ifikapo tarehe 30 Juni, 2017, Halmashauri zote lazima wateja wake wote wawe wameingizwa katika mfuko wa ukusanyaji mapato ya ardhi”. 

Alisema kuwa utaratibu wa kutoingiza wateja wote katika mfumo, unaikosesha serikali mapato kwa sababu Halmashauri zinashindwa kuwatambua wateja wote wanaodaiwa. “Kutokana na kushindwa kuwafahamu wateja wote, hata malengo yanayokadiliwa katika bajeti yanakuwa chini sana ikilinganishwa na uhalisia” alisema Dr. Mabula. Aliongeza kuwa, Afisa Ardhi yeyote mteule, atakayeshindwa kufikia malengo ya kuingiza wateja wote katika mfuko wa ukusanayaji mapato atatenguliwa nafasi yake na nafasi hiyo kupewa mtu mwingine.

Naibu Waziri alizishauri Halmashauri kuweka utaratibu wa kutoa notisi za kuwakumbusha wateja wadaiwa wa kodi ya ardhi mara kwa mara ili kuwakumbusha kulipa tofauti na utaratibu uliopo sasa.

Alisema kuwa changamoto ya mfuko kushindwa kuwapata wateja wote wadaiwa kwa mara moja imechukuliwa na wizara yake na itaenda kufaanyiwa kazi. Vilevile, alizitaka Halmashauri kukusanya madeni yote ya ardhi kwa wateja ili fedha hizo ziweze kutumika katika utaratibu wa serikali.

Akiongelea ngogoro wa mpaka kati ya wilaya za Iringa na Kilolo, katika vijiji vya Ilole na Ilambilole, Dr. Mabula alisemaa kuwa vijiji vyote vina GN jambo ambalo si la kawaida. Aliagiza kuwa GN hizo zipitiwe upya ili kupatiwa suluhisho. Aliwataka wakuu wa wilaya kuendelea kutatua migogoro iliyopo katika maeneo yao kwa kuwafuata wananchi katika maeneo yao ili kusikiliza na kutatua kero zao.

Akiongelea sababu za migogoro ya ardhi, Naibu Waziri alisema kuwa migogoro mingi ya ardhi inachangiwa na kutokuwa na mpango wa matumizi bora ya ardhi kati ya wakuma na wafugaji. “Nazitaka Halmashauri kutambua idadi ya wafugaji na mifugo waliyonayo ili kupanga matumizi bora ya ardhi” aliagiza Naibu Waziri. Pia aliwataka wakuu wa wilaya kushiriki katika mikutano ya ugawaji ardhi ili kusimamia taratibu zilizopo kufuatwa.     

=30=

WATAALAM IRINGA WATAKIWA KUBUNI JINSI YA KUWASAIDIA WANUFAIKA WA TASAF

Na. Mwandishi Maalumu, Iringa

Wataalam mkoani hapa wametakiwa kujikita katika kutafuta mbinu za kuwasaidia wanufaika wa mpango wa kunusuru kaya masikini Tasaf III ili wajikwamue katika lindi la umasikini.

Agizo hilo lilitolewa na Katibu Tawala Mkoa wa Iringa, Wamoja Ayubu alipokuwa akifungua kikao kazi cha wataalam wa wilaya na mkoa wa Iringa cha kupanga mikakati ya jinsi ya kuzisaidia kaya masikini zinazonufaika na ruzuku ya Tasaf kilichofanyika katika ukumbi wa mikutano wa Bonde la Rufiji mjini Iringa.

Ayubu alisema “lengo la kikao kazi hiki ni kuwashirikisha ninyi wataalam wa sekta za afya, elimu, kilimo, mifugo, maendeleo ya jamii na ushirika ambazo kwa kiasi kikubwa zimeguswa na walengwa wa mpango huu wa Tasaf. Mnafahamu kuwa walengwa wengi wa Tasaf wapo vijijini na wameanzisha miradi midogomidogo ya ufugaji wa kuku, bata, simbilisi, nguruwe, mbuzi na kondoo. 

Aidha, wengine wanaboresha makazi yao, wote hawa wanahitaji msaada na ushauri wa kitaalam na ufuatiliaji wa karibu”. Aliongeza kuwa wataalam wa serikali wanawajibu wa kuwasaidia na kuwaelekeza wanufaika hao kuweza kufikia malengo yao. Aliwataka kuona kuwa kuwasaidia wanufaika hao ni jukumu lao na kuwataka kuweka katika mpango kazi wao na ratiba ya kazi ya kila mwezi.

Akiongelea wanufaika wanaopata ruzuku yenye masharti ya elimu na afya, Katibu Tawala Mkoa aliwataka kuwasimamia walengwa ili watimize masharti hayo. “Mfano, upande wa afya mlengwa atapata ruzuku kama ametimiza sharti la kupeleka mtoto kliniki aliye chini ya umri wa miaka mitano. Kwa upande wa elimu mlengwa atapata ruzuku kama atahakikisha mtoto wake anahudhuria shuleni siyo chini ya asilimia 80 ya mahudhurio yanayohitajika” alisisitiza Ayubu. Ni jukumu la kikao kazi hiki kujadili na kupanga namna bora ya kufanya ufuatiliaji wa karibu na kutoa ushauri kwa walengwa ili malengo ya serikali ya kupunguza umasikini yaweze kutimia. 

Awali Mratibu wa Tasaf Mkoa wa Iringa, William Kingazi alimtaarifu Katibu Tawala Mkoa kuwa mkoa wa Iringa ulipata fedha kupitia mpango wa Tasaf III kwa ajili ya kuziwezesha kaya masikini sana ili ziweze kujikimu. Mpango huo ulianza mwezi Januari, 2015 ambapo kaya 26,321 zilitambuliwa kuwa masikini sana. Hadi kufikia mwezi Septemba, 2016 mkoa ulipokea shilingi 6,525,080,001.

=30=