VP AWATAKA WANAWAKE KUHUDHURIA KLINIKI

Makete

Makamu wa Rais wa Jamhuri ya Muungano wa Tanzania, Dk. Mohamed Gharib Bilal amewataka wanawake Mkoani Iringa kuhakikisha wanahudhuria kliniki tokea hatua za awali za ujauzito ili waweze kutapa huduma za kitaalamu mapema.

Kauli hiyo ameitoa katika eneo la Mfumbi wilayani Makete alipokuwa akisalimia wananchi wa wilaya ya hiyo baada ya kuweka jiwe la msingi soko lililojengwa kwa nguvu za wananchi na kupokea taarifa ya Mkoa na wilaya ya Makete alipowasili mkoani Iringa kuanza ziara yake ya siku tatu mkoani hapa akitokea mkoani Mbeya.

Dk. Bilal amewata mkoani hapa kuhudhuria kliniki ili kunufaika na huduma za afya na ushauri kwa wajawazito kutokana na serikali kuwekeza sana katika afya ya mama na mtoto.

Akiongelea maambukizi ya Ukimwi, Makamu wa Rais amesema kuwa taifa bado linakabiliwa na changamoto mbalimbali ikiwemo idadi ya maambukizi ya Ukimwi na kuitaka jamii kuwa makini zaidi na kujilinda. Vilevile, ameitaka jamii kuendelea kushirikiana na juhudi za serikali kupambana na maambukizi ili kupunguza idadi ya vifo nchini.

Katika taarifa ya maendeleo ya mkoa wa Iringa, iliyowasilishwa kwa Makamu wa Rais na Mkuu wa Mkoa wa Iringa, Dk. Christine Ishengoma, amesema kuwa mkoa umeongeza vituo vya kutolea huduma za Afya hadi kufikia 420  kwa lengo la kutoa huduma bora za afya kwa kuzingatia mahitaji ya makundi maalumuhasa watoto wachanga na walio na umri chini ya miaka mitano, wazee na wanawake walio katika uzazi.

Mkuu wa Mkoa wa Iringa amesema kuwa katika kutekeleza sera ya zahanati kwa kila kijiji, mkoa umefikia asilimia asilimia 57 ya vijiji vyote kuwa na zahanati wakati asilimia 23 ya kata zote zina vituo vya afya.

Akiongelea huduma za mama wajawazito na watoto, Dk. Ishengoma amesema kuwa katika mwaka 2011 akina mama waliojifungulia kliniki walikuwa ni 54,356 sawa na asilimia 57.3 ya akina mama wajawazito waliotarajiwa kuhudhuria huduma za kliniki.

Amesema kuwa kiwango cha akina mama wajawazito waliojifungulia katika vituo vya tiba imefikia asilimia 76.2.

Amesema kuwa vifo vya wazazi vimepungua kutoka 162/100,000 mwaka 2010 hadi kufikia 138/100,000. Aidha, vifo vya watoto vimepungua kutoka 21/1,000 hadi 17/1,000.

Makamu wa Rais yupo katika ziara ya kikazi ya siku tatu mkoani Iringa.

 =30=

 MAKETE WATAKIWA KUKITUMIA CHUO CHA VETA

Makete

Wananchi wa Wilaya ya Makete wametakiwa kuonesha kuwa wapo tayari kukitumia chuo cha ufundi stadi VETA kwa kujipanga vizuri kukitumia na kukiendeleza chuo hicho ili kiweze kuwanufaisha wakazi wa wilaya ya Makete na taifa kwa ujumla.

Rai hiyo imetolewa na Makamu wa Rais, Dk. Mohamed Gharib Bilal wakati akizungumza na wakazi wa wilaya ya Makete baada ya kuweka jiwe la msingi ujenzi wa chuo cha ufundi stadi VETA wilayani hapa.

Dk. Bilal amesema kuwa “wilaya ya Makete tumepata fursa kubwa kuwa na VETA Makete” na kuutaka uongozi wa wilaya hiyo kujipanga vizuri kuonesha kuwa wao ni namba moja kwa kujenga uhusiano mzuri kati ya VETA Makete na mamlaka ya ufundi stadi nchini.

Amesema kuwa siku zote VETA lazima iwe karibu na jamii inayoihudumia kwa kutokuweka mwanya kati yake ili jamii inufaike na VETA na kinyume chake.

Makamu wa Rais ameutaka uongozi wa VETA wilaya ya Iringa kutafakari kwa kina kile kinachoitajika katika jamii hasa wakati uliopo sasa na kutoka na masuluhisho ya matatizo yaliyopo katika jamii.

Amesema kuwa ili wananchi wapige hatua hawana budi kukifahamu chuo cha VETA na matarajio yake katika kuihudumia jamii ili kuisaidia kupiga hatua ya kimaendeleo.

Aidha, amekitaka chuo hicho kutoa wanafunzi waliopikika na kuiva ili kukabiliana na ushindani uliopo katika soko na kuleta picha nzuri katika jamii. Amesema wakati mambo mengi yanakua kwa haraka, elimu ya ufundi stadi inatakiwa kupanuliwa zaidi kwa kuhusisha teknolojia ya habari kuwafikia watu wengine wali mbali zaidi na kuwafanya wanufaike na huduma hizo.

Katika taarifa ya Naibu Waziri wa Elimu na Mafunzo ya Ufundi, Philipo Mulugu amesema kuwa hivi karibuni nchi za afrika Masharki zitafungua milango yake itakayomtaka mtu mmoja kwenda kusaka ajira katika nchi nyingine. Amesema kwa muktadha huo “hatuna budi kuwaandaa vijana wetu katika elimu ya ufundi stadi ili wasiwe watazamaji”. Amesema kuwa serikali inaendelea na upanuaji wa mafunzo stadi ili kuwawezesha vijana wengi kujiunga na mafunzo hayo. Ameongeza kuwa serikali itaendelea kuongeza kasi ya ujenzi wa vyuo vya ufundi na kuboresha utoaji wa elimu bora ya mafunzo stadi nchini.

Chuo cha ufundi stadi VETA wilaya ya Makete ndicho chuo cha kwanza kwa mujibu wa sera ya chama tawala ya kujenga chuo cha VETA kila wilaya nchini na kinatajia kuanza mwezi Julai 2012 kwa kuanza na wanafunzi 160 katika fani za ujenzi, uashi, uselemala, ufundi wa magari.

=30=   

KILIMO CHA MTAMA CHAHIMIZWA IRINGA

 Makete

Mkoa wa Iringa unahimiza kilimo cha mtama, mihogo na mazao mengine yanayovumilia ukame ukiwa ni mkakati wa kukabiliana na hali ya ukame wa mara kwa mara unaosababisha upungufu wa chakula kwa baadhi ya maeneo mkoani hapa.

Katika taarifa ya maendeleo ya mkoa wa Iringa iliyowasilishwa kwa Makamu wa Rais, na Mkuu wa Mkoa wa Iringa Dk. Christine Ishengoma amesema kuwa ushauri wa kilimo cha mazao yanayovumilia ukame kama mtama, mhogo na mazao mengine umetolewa kwa Halmashauri zenye maeneo ya ukame ili kukabiliana na hali ya ukame wa mara kwa mara.

Amesema viongozi na wataalamu wa wilaya ya Iringa, Kilolo pamoja na Mkoa walitembelea kilimo cha mtama wilaya ya mpwapwa mwezi Mei, 2011 ili kujifunza uzalishaji wa zao la mtama ili waweze kuhimiza kilimo hicho maeneo yote yanayokabiliwa na ukame katika wilaya hizo.

Katika kuhakikisha hamasa inakuwepo katika kilimo hicho Mkuu wa Mkoa wa Iringa alifanya ziara katika wilaya hizo kuhimiza kilimo cha mazao yanayostahimili ukame ili kuzifanya kaya zinazokabiliwa na upungufu wa chakula kuwa na uhakika wa chakula.

Amesema kuwa kila mkulima amehimizwa kulima ekari mbili za mtama kwa lengo la kuwa na uhakika wa chakula. Amesema kuwa kila shule katika maeneo hayo imetakiwa kulima ekari mbili kwa ajili ya chakula cha wanafunzi wakati wa mchana.

Amesema kuwa viongozi wote kuanzia ngazi ya wilaya hadi kijiji nao wamelima ekari mbili za mtama kila mmoja na muitikio wa agizo hilo umepokelewa vizuri.  

Akiongelea sekta ya afya, Mkuu wa Mkoa amesema kuwa hadi kufikia mwaka 2011 akina mama waliohudhuria kliniki ni 54,356 sawa na asilimia 57.3 ya akina mama wajawazito waliotarajiwa kuhudhuria huduma za kliniki. Aidha, amesema kuwa kiwango cha akina mama wajawazito waliojifungulia katika vituo vya tiba imefikia asilimia 76.2.

Amesema kuwa vifo vya wazazi vimepungua kutoka 162/100,000 katika mwaka 2010 hadi kufikia 138/100,000, wakati vifo vya watoto vimepungua kutoka 21/1,000 hadi kufikia 17/1,000.

Akiongelea hali ya maambukizi ya UKIMWI, Dk. Ishengoma amesema kuwa maambukizi yamefikia asilimia 15.7 na mkoa katika kukabiliana na hali hiyo mkoa uliandaa mpango wa miaka minne wa kupambana na maambukizi ya UKIMWI unaoendelea kutekelezwa. Amesema mpango huo ulioandaliwa na wadau wa sekta binafsi na umma ni wa kuanzia Oktoba 2008 hadi Septemba, 2012. 

Katika salamu za Makamu wa Rais, Dk. Mohamed Gharib Bilal kwa wananchi wa Mfumbi wilaya ya Makete amesema kuwa taifa bado linakabiliwa na changamoto mbalimbali pamoja na idadi ya maambukizi ya UKIMWI na kuwataka wananchi kuwa makini zaidi na kujilinda. Amewataka kuendelea kushirikiana na serikali katika kuhubiri mapambano hayo ili kupunguza maambukizi.

Dk. Bilal pia amewataka akina mama wajawazito kuhudhuria kliniki mara kwa mara pindi wanapojigundua kuwa ni wajawazito ili waweze kunufaika na huduma hizo zinazotolewa kwa ajili yao.

Makamu wa Rais, anafanya ziara ya kikazi ya siku tatu mkoani Iringa katika wilaya za Makete, Njombe, Mufindi na Iringa na akiwa wilayani makete ameweka jiwe la msingi mradi wa soko lililojengwa kwa nguvu za wananchi katika kijiji cha Mfumbi, kuzindua nyumba ya walimu  katika sekondari ya Kitulo na kuweka jiwe la msingi chuo cha VETA.

=30=

Mgodi wa Tarajali kuanza Ruvuma

Na. Revocatus Kassimba, Ruvuma

Makamu wa Rais wa Jamhuri ya Muungano wa Tanzania Dk. Mohamed Ghalib Bilal amewahakikishia wakazi wa Mkoa wa Ruvuma na Tanzania kwa ujumla kuwa  mradi wa mgodi tarajali wa Urani wilaya ya Namtumbo mkoani Ruvuma utatekelezwa kwani una umuhimu na maslahi kitaifa.

 Makamu Rais Dk. Mohamed Ghalib Bilal akihutubia mamia ya wananchi wa kijiji cha Likuyu Sekamaganga wilaya ya Namtumbo wakati alipofanya ziara katika mradi wa urani

Dk. Bilal amesema hayo wakati akiongea na wafanyakazi wa mgodi huo unaomilikiwa na kampuni ya Mantra Tanzania kuwa Serikali inafuatilia kwa makini kuona madini hayo muhimu yanalifaidisha Taifa.

Aliongeza kuwa anao uhakika kuwa taratibu zote za hifadhi ya mazingira na usalama wa maisha ya wakazi wanaozunguka eneo hilo umetiliwa mkazo na kampuni kwa kushirikiana na taasisi ya nishati ya atomiki nchini.

Aidha, kwa upande wake Mkurugenzi wa Mantra Tanzania, Asa Mwaipopo ameiomba Serikali kuharakisha taratibu za kisheria ili mgodi uweze kuanza hapo mwaka ujao kwa ujenzi na ifikiapo 2014 uzalishaji uanzae ili ajira zipatazo 1600 wakati wa ujenzi wa mgodi na nyingine 400 wakati wa uzalishaji ziweze kupatikana kwa watanzania na kusaidia kukuza uchumi.

 

Makamu wa Rais akipokewa na viongozi wa kampuni ya Mantra wakati alipowasili katika eneo litakalojengwa mgodi wa Uranium wilaya ya Namtumbo

Ruvuma na Cuba

Na. Revocatus Kassimba, Songea

Serikali mkoani Ruvuma imeihakikishia nchi ya Cuba kuendeleza ushirikiano  ili kuboresha mahusiano mema yaliyojengeka kwa miongo zaidi ya minne hususan katika kuendeleza huduma za afya nchini.

Kauli hiyo imetolewa leo mjini Songea na Kaimu Katibu Tawala  Mkoa wa Ruvuma  Dkt Anselm Tarimo alipokuwa akiongea na Balozi wa Cuba nchini Ernesto Gomez Diaz alipofanya mazungumzo na uongozi wa Sekretariati ya Mkoa wa Ruvuma.

Dkt Tarimo alielezea Uhusiano wa kiurafiki uliopo na nchi ya Cuba kuwa umesaidia sana katika jitihada za serikali ya Tanzania kuwapatia wananchi wake Huduma bora  na za uhakika za afya.

Alisema kwa kipindi kirefu nchi ya Cuba imekuwa ikisaidia Tanzania kwa kuipatia wataalam wa afya hususan madaktari wanaofanya kazi katika hospitali mbalimbali nchini ambapo katika mkoa wa Ruvuma wapo madaktari wawili kutoka nchini Cuba.

“Tunashukuru kwa ushirikiano tulionao baina ya nchiz zetu mbili kwani kuanzia miaka ya 1980 mkoa wetu umekuwa ukipokea madaktari kutoka nchini Cuba ambao wanasaidia kutoa Huduma za tiba katika hospitali yetu ya Mkoa Songea” alisema Dkt Tarimo

Aliongeza kusema kwa sasa mahitaji ya madaktari ni makubwa kutokana na hospitali ya mkoa kupandishwa hadhi na kuwa ya rufaa hivyo ni vema Cuba ikaongeza wataalam zaidi

Naye Balozi wa Cuba nchini Ernesto Gomez Diaz alishukuru serikali ya Tanzania chini ya uongozi wa Rais Jakaya Kikwete kwa kuendeleza na kudumisha ushirikiano kati ya nchi zote mbili  toka enzi za waasisi  Mwalimu Julius Nyerere wa Tanzania na Fidel Castro wa Cuba

Balozi Diaz amesema Cuba ni nchi pekee iliyobaki inayofuata mfumo wa Ukoministi  Duniani wenye lengo la kuhakikisha maisha ya kijamaa ambapo rasilimali za umma zinatumika kwa wote

Aliongeza kusema kuwa katika nchi ya Cuba kutokana na sera ya Ukoministi serikali imefanikiwa kutoa Huduma za afya na Elimu bure kwa raia wake wote na kusema kuwa nchi yake itaendelea kutoa kipaumbele kwa watanzania kwenda kusoma udaktari nchini Cuba .

Balozi Diaz yupo mkoani Ruvuma kwa ziara ya kikazi ya siku mbili ambapo amepata fursa ya kutembelea na kukagua Hospitali ya mkoa ambapo nchi yake ina madaktari wawili wanaofanya kazi.

Ameshukuru uongozi wa serikali kwa kutoa ushirikiano kwa wataalam hao wa Cuba kwa kipindi chote wanachofanya kazi kwani wameendelea kufurahi uwepo wao hapa mkoani.

...RUVUMA WATAKIWA KULIMA MAHINDI KWA WINGI

Na. Revocatus Kassimba, SONGEA

Serikali imewataka wakulima  mkoani Ruvuma kulima kwa wingi mahindi katika msimu huu kwa kuzingatia kanuni bora za kilimo licha ya changamoto za soko lililowakabiri msimu wa kilimo uliopita.

Kauli hiyo ilitolewa jana na Mkuu wa Mkoa wa Ruvuma Said Thabit Mwambungu wakati wa ziara yake katika vijiji vya Magagula, Lugagala na Muungano Zomba vilivyopo wilaya ya Songea .

Mwambungu aliwaeleza wananchi kuwa serikali inatambua kero ya ununuzi wa mahindi iliyotokea msimu wa 2011/2012 ambapo wakulima wengi walichelewa kupokea fedha zao kutoka Wakala wa Hifadhi za Chakula (NFRA).

Mkuu wa Mkoa wa Ruvuma, Said Mwambungu (mwenye kaunda suti nyeusi) akisikiliza maelezo ya kilimo kutoka kwa Mkuu wa wilaya ya Songea, Thomas Sabaya (kulia) wakati wa ziara ya kukagua usambazaji wa pembejeo za kilimo katika kijiji cha Lugagara wilaya ya Songea

Aliongeza kusema kuwa changamoto ya fedha za wakulima hazitajitokeza tena msimu ujao kwani tayari serikali imejiandaa kwa kutengwa fedha katika bajeti ili kuhakikisha mahindi yote yatanunuliwa kwa wakati.

“Limeni kuliko mwaka jana kwani serikali imejipanga kununua kwa wakati na kuhakikisha kuwa hakuna mkulima atakayecheleweshewa malipo na serikali” alisema Mwambungu na kuongeza kuwa hakuna mkulima sasa anayeidai serikali wote wamelipwa.

Mkuu wa mkoa Mwambungu alisisitiza kuwa serikali inafanya kila linalowezekana kuondoa kero ya kukopa mahindi ya wakulima hivyo ni vema wakulima wakaendelea kuunga mkono juhudi hizi za serikali kwa kuongeza uzalishaji.

Katika msimu 2011/2012 wa kilimo kwa mujibu wa taarifa za Wakala wa Hifadhi ya Chakula jumla ya tani 50,018 za mahindi zimenunuliwa kutoka kwa wakulima mkoani Ruvuma zenye thamani ya shilingi bilioni 17.5 ambapo kilo ilinunuliwa kwa shilingi 350.

Mkuu wa Mkoa alitumia fursa hiyo kuwapongeza wakulima wa vijiji hivyo alivyovitembelea kwa kutumia vema pembejeo za ruzuku kwa mfumo wa vocha kwani wameongeza uzalishaji wa mahindi na kuifanya wilaya ya Songea kuongoza katika kuzalisha mahindi mkoani.

Ziara ya Mkuu wa mkoa ilihusisha pia kukagua zoezi la ugawaji wa vocha za pembejeo ambapo kwa mujibu wa taarifa ya iliyotolewa na Mkuu wa wilaya ya Songea Thomas Sabaya alisema wilaya imepata mgao wa vocha 64,417 ambazo zimesambazwa kwa wakulima.

Wakulima wa kijiji cha Magagula Wilaya ya Songea wakimsikiliza Mkuu wa Mkoa wa Ruvuma, Said Mwambungu (hayupo pichani) jana alipofanya ziara ya kukagua shughuli za kilimo

Kuhusu mbolea ya kukuzia (UREA) mfuko unauzwa shilingi 72,000/= na mkulima anachangia shilingi 52,000/= huku serikali ikilipia zinazobaki na kwa mbegu bora mfuko unauzwa shilingi 40,000/= huku mkulima akichangia 20,000/= na serikali zinazobakia.

Kwa upande wake Afisa Mtendaji wa kijiji cha Lugagara Bi Taifa Mahundi katika risala yake alisema wakulima wana changamoto kubwa ya upungufu wa vocha za ruzuku hivyo akaiomba serikali kuongeza mgao kwa kijiji.

Mkuu wa mkoa akijibu hoja hiyo aliwafahamisha wananchi kuwa vocha zinazotolewa ni vigumu kufanana na idadi ya wakulima kwani hiyo ni ruzuku itolewayo na serikali kuwasaidia wakulima kujenga uwezo wa kujitegemea.

Katika msimu huu wa kilimo mkoa wa Ruvuma umepatiwa vocha za ruzuku ya pembejeo za kilimo 192,000 ambapo kwa mwaka uliopita ulipatiwa vocha 204,000 hivyo kuwa na upungufu wa vocha 12,000/=.

Mkoa wa Ruvuma ni kati ya mikoa sita maarufu kwa uzalishaji wa mahindi nchini ambapo mikoa mingine ni Iringa, Mbeya, Rukwa, Kigoma na Morogoro.

Sabaya alisema vocha hizo zinahusisha mbegu bora za mahindi, mbolea ya kupandia na mbolea ya kukuzia ambapo bei ya mfuko wa mbolea ya kupandia (DAP) inauzwa shilingi 80,000/=huku mkulima akichangia shilingi 52,000/=.

Na. Revocatus Kassimba, Songea

Mkuu wa Mkoa wa Ruvuma Said Mwambungu  amewaasa vijana waliohitimu mafunzo ya Jeshi la Kujenga Taifa kuwa wazalendo na wenye kuipenda nchi yao ili waweze kuitumikia ili iweze kuwa na Maendeleo  endelevu

Ametoa wito huo leo wakati akifunga mafunzo awali ya kijeshi  yaliyojulikana kama Oparesheni  miaka 50 ya Uhuru yalitolewa katika kikosi cha jeshi 842 Mlale JKT  kilichopo wilaya ya Songea mkoa wa Ruvuma

Mwambungu amewapongeza Vijana hao kwa kuonyesha moyo wa uzalendo toka wajiunge na mafunzo hayo hapo mwaka jana julai ambapo wamejifunza mambo mengi yakiwepo stadi za kazi na mafunzo ya awali ya kijeshi

Aliongeza kusema mafunzo haya yatasaidia kujenga moyo wa kuipenda nchi hususan kipindi hiki ambapo maadili miongoni mwa Vijana yanaporomoka hivyo kwa kujiunga na jeshi la kujenga Taifa Vijana hupata Elimu na maarifa ya kujitegemea na hatimaye kuwa Vijana mahili katika Utendaji kazi

Alitumia pia fursa hiyo kuwapongeza Vijana wote walioshiriki katika operesheni ya kusomba mahindi kutoka kwa wakulima kipindi cha mwisho wa mwaka uliopita ili kunusuru mazao ya wakulima kuharibika

“Nawapongeza kwa umahili wenu kipindi cha oparesheni ya kusomba mahindi kutoka kwa wakulima kwani agizo nililotoa kwa makamanda wenu lilitekelezwa vyema” sasa wakulima wana nufaika na kazi mliyoifanya huo ndoi uzalendo alisisitiza mkuu wa Mkoa

Awali akitoa taarifa ya mafunzo kwa mkuu wa mkoa Kaimu kamanda kikosi cha 842 KJ Mlale Meja T S Mpupu  alisema mafunzo hayo ya awali ya kijeshi  yalianza tarehe 26 Julai 2011 na yanahitimishwa  tarehe 20 Januari 2012 lakini yatendelea hadi kipindi cha mkataba wa miaka miwili kitakapoisha

Aliongeza kusema wakati wanaanza kulikuwa na Vijana wapatao 827 kutoka katika mikoa yote ya Tanzania na wanapohitimu leo ni Vijana 822 kati yao wavulana ni 671 na wasichana ni 152

Aliendelea kueleza kuwa Vijana watano hawakuhitimu mafunzo kutokana na watatu kufariki dunia kwa matatizo ya ugonjwa na wawili walitoroka mafunzoni

Aidha kwa upande wake mwakililishi wa Mkuu wa Jeshi la kujenga Taifa Luteni Kanali Malembo aliwakumbusha wahitimu hao juu ya kiapo walichoapa mbele ya mgeni rasmi kuwa wataeendeleza utii  na kuitumikia nchi ya Tanzania kwa  uaminifu,utii na uhodari siku zote

Alisema kuwa watakapotoka hapo(Mlale) watasambazwa katika makambi mengine nchini ili wakaendelee na mafunzo ya stadi za uzalishaji hadi kipindi cha miaka miwili kitakapoisha hivyo aliwasihi kuwa na nidhamu

“Nidhamu ni kitu cha msingi unapokuwa Ndani ya Jeshi la Kujenga Taifa” alisema Luteni Kanali Malembo

Kikosi cha jeshi Mlale JKT kilianzishwa mwaka 1970 kikiwa na Malengo ya kuwalea Vijana  kwa kuwapatia mafunzo na stadi za uzalishaji mali ili wahitimipo waeze Aidha kuajiliwa na serikali au wajitegemee katika kuendeleza Uchumi wao na taifa.

Ofisi ya Mkuu wa Mkoa wa Iringa yapata Wakili

Ofisi ya Mkuu wa Mkoa wa Iringa, imepata Wakili, baada ya Mwanasheria katika Ofisi hiyo Paulos Lekamoi, kusajiliwa na kutambuliwa na Mahakama Kuu ya Tanzania.

Wakili Paulos Lekamoi akitambuliwa na Jaji Mkuu wa Tanzania Bara

Fuatilia habari zaidi juu ya Paulos Lekamoi ni nani hasa??

YALIYOJILI MIAKA 50 YA UHURU KWA MKOA WA IRINGA KITAIFA

 Baadhi ya watendaji katika Banda la Mkoa wa Iringa

 Baadhi ya watendaji katika Banda la Mkoa wa Iringa

 Mandari ya Banda la Mkoa wa Iringa kwa nje

 Sidhani kama kuna kitu ambacho kingeweza kuwatoa viongozi hawa wa Mkoa wa Iringa katika banda hili la Mkoa wa Kagera kabla ya kutimiza hadhima yao mahususi. 

 Miaka 50 ya Uhuru na Tafakari ya hali ya juu

 ...Hii inakutosha Mhe. RC ni maneno ya mjasiriamali 'Khadija Design' akimwambia Mhe. Mkuu wa Mkoa hayupo pichani.

 Mkuu wa Wilaya ya Makete, Mhe. Zainab Kwikwega akisaini kitabu cha wageni katika Banda la Mkoa wa Iringa katika viwanja vya Mwl. J.K. Nyerere katika maadhimisho ya miaka 50 ya Uhuru wa Tanzania Bara

 Tarehe 01. Disemba, 2011 Mkuu wa Mkoa wa Iringa, Dk. Christine Ishengoma (Mb.) na Katibu Tawala Mkoa wa Iringa, Bibi. Gertrude Mpaka (katikati) na Kiongozi mwandamizi wa Banda la Mkoa wa Iringa, Shenal Nyoni wakiweka mikakati ya mapokezi ya viongozi wa kitaifa watakaotembelea banda la Mkoa wa Iringa

 Tarehe 01. Disemba, 2011 Mkuu wa Mkoa wa Iringa, Dk. Christine Ishengoma (Mb.) na Katibu Tawala Mkoa wa Iringa, Bibi. Gertrude Mpaka (kulia) wakifurahia jambo katika uwanja wa Uhuru Jijini Dar es Salaam katika sherehe za miaka 50 ya Uhuru wa Tanzania Bara

 Tarehe 01 Disemba, 2011, Mkuu wa Mkoa wa Iringa, Dk. Christine Ishengoma (Mb.) akiwa ni

miongoni mwa mamia kwa maelfu ya watanzania waliojumuika katika maadhimisho ya

Miaka 50 ya Uhuru katika uwanja wa Uhuru Dar es Salaam

Tarehe 01 Disemba, 2011, Katibu Tawala Mkoa wa Iringa, Bibi. Gertrude Mpaka akiwa ni

miongoni mwa ma mia kwa maelfu ya watanzania waliojumuika katika maadhimisho ya

Miaka 50 ya Uhuru katika uwanja wa Uhuru Dar es Salaam



TANROADS YAKUSANYA MIL 18

Ofisi ya Meneja wa Wakala wa Barabara Mkoa wa Iringa (TANROADS) imekusanya zaidi ya shilingi milioni 18 katika kipindi cha kuanzia Julai, 2011 hadi Septemba, 2011 zikiwa ni tozo kwa magari yaliyozidisha uzito.

Taarifa hiyo imetolewa na Meneja wa Wakala wa Barabara Mkoa wa iringa, Mhandisi. Paul Lyakurwa, wakati akiwasilisha taarifa ya utekelezaji kwa mwaka 2010/ 2011 na mpango wa matengenezo na ukarabati kwa mwaka 2011/2012 na taarifa ya utekelezaji hadi Septemba, 2011 ya Wakala wa Barabara Mkoa wa Iringa katika Kikao cha Bodi ya Barabara ya mkoa wa Iringa kilichofanyika katika ukumbi wa St. Dominic katika Manispaa ya Iringa,

Mhandisi. Lyakurwa amesema kuwa ofisi yake inajukumu la kudhibiti uzito wa magari barabarani kwa kutumia mizani isiyohamishika iliyopo Makambako.

Amesema katika kipindi cha Julai, 2011 hadi Septemba, 2011 magari yaliyopimwa ni 1,005 kati ya hayo magari 103 yalizidisha uzito na kulipishwa tozo la uharibifu wa barabara kama ilivyoainishwa katika Sheria ya Barabara Na. 30 ya mwaka 1973 na kanuni zake za mwaka 2001 ofisi yake imekusanya shilingi 18.175 milioni.

Akielezea utekelezaji wa ahadi za Mhe. Dk. Jakaya Kikwete wakati wa kampeni za uchaguzi mkuu wa mwaka 2010 zilizo katika Ilani ya uchaguzi ya CCM kuhusu sekta ya barabara Mkoani Iringa, hasa kukamilisha ujenzi wa barabara ya Njombe- Makete (Km. 109 kwa kiwango cha lami amesema kuwa ujenzi wa Km. 11.5 kwa kiwango cha lami kati ya Mang’oto na Tandala ndani ya Wilaya ya Makete umekamilika kwa gharama ya shilingi 4,612,654 milioni.

Amesema ujenzi wa Km. 1 umepangwa kutekelezwa mwaka wa fedha 2011/2012 maeneo ya Mang’oto kwa gharama ya shilingi 797,040 milioni pamoja na utekelezaji huo kiasi cha shilingi 1,480,644 milioni zinahitajika kulipia deni la kazi zilizofanyika kati ya mwaka 2008/ 2009 na mwaka 2010/ 2011.    

Wakati huohuo Mkuu wa Mkoa wa Iringa, Dk. Christine Ishengoma ameagiza ushirikishwaji wa jamii katika utunzaji wa miundombinu ya Mkoa wa Iringa ili iweze kuwanufaisha wananchi walio wengi.

Akifungua kikao cha Bodi ya Barabara cha Mkoa wa Iringa, amesema bado kuna mapungufu kadhaa katika ushirikishwaji wa jamii katika utunzaji wa miundombinu ya barabara katika Mkoa wa Iringa hususani shughuli zinazofanyika ndani ya hifadhi ya barabara na kuagiza jamii ihusishwe kikamilifu katika utunzaji huo wa miundombinu ya barabara.

=30=

Katibu Tawala Mkoa wa Iringa, Gertrude Mpaka ameshauri kudumisha ushirikiano wa kimkakati baina ya watumishi wa serikali na sekta binafsi ili jitihada za kumletea maendeleo mwananchi ziendelee kuzaa matunda mara dufu.

Mpaka amesema hayo katika mahojiano maalumu na gazeti la Mwananchi alipokuwa akiwasili katika viwanja vya maonesho vya Mwalimu Julius Nyerere jijini hapa.

Amesema, “mafanikio katika utumishi wa Umma yataletwa kwa kudumisha ushirikiano baina ya watumishi wa Umma na watumishi wa Umma, na watumishi wa Umma na taasisi nyingine zisizo za Umma”. Amesema, “ushirikiano katika utekelezaji wa majukumu ya kiserikali ndio msingi wa mafanikio na hasa umuhimu huo huonekana pale unapotumika katika kutatua changamoto inayoikabili taasisi na kutafutiwa ufumbuzi wake kwa kuusisha mtumishi zaidi ya mmoja kwa maana nyingine uhumihu huo kufanya kazi kwa umoja”.

Mpaka amesema kuwa Mkoa wa Iringa umefanikiwa katika miaka 50 ya Uhuru wa Tanzania Bara kutokana na dhana ya ushirikiano na umoja katika utendaji kazi.  Amesema, sekta za afya, elimu, miundombinu, maji na utawala bora katika Mkoa wa Iringa zimefanikiwa kwa kiwango kikubwa kutokana na ushirikiano huo.

Akiongelea utawala bora, amesema Mkoa umeendelea kuweka masanduku ya maoni katika sehemu zote za kutolea huduma kwa lengo la kuboresha utoaji huduma kwa kuwapa wananchi nafasi ya kutoa maoni, malalamiko na michango yao kwa lengo la kuusaidia Mkoa katika kuzitatua kero hizo. Ameongeza kuwa Ofisi yake inae Afisa anayeshughulikia pamoja na mambo mengine malalamiko ya wananchi na watumishi na utaratibu huo umeteremshwa hadi katika Ofisi za Wakuu wa Wilaya na Tarafa.

Katibu Tawala Mkoa wa Iringa, amesema utawala bora katika ngazi ya Mkoa umejikita pia katika uboreshaji wa ofisi za Tarafa ili kusogeza huduma karibu zaidi na wananchi. Amezitaja ofisi 14 za Tarafa zilizojengwa katika uboreshaji na usogezaji wa huduma karibu na wananchi kuwa ni Pawaga, Liganga, mwambao, Masasi, kalenga, Mlolo, Ifwagi, kibengu, Makambako, Magoma, Ukwama, Ikuwo, Malangali na Mahenge. Amesema zaidi ya lengo la kusogeza huduma karibu zaidi na wananchi pia Mkoa umelenga kuyaboresha mazingira ya kazi ya Maafisa Tarafa.

Amesema, Mkoa umeendelea kutumia mbinu ya fursa na vikwazo vya maendeleo (o & OD) na inayowahusisha wadau wengine wa maendeleo hutumika katika kupanga mipango ya maendeleo kuanzia ngazi ya kijiji.

Atuganile George ni miongoni mwa wananchi waliofika kutembelea mabanda ya maonesho katika viwanja vya mwalimu Julius Nyerere amesema kuwa katika miaka ya hivi karibuni sekta ya Utumishi wa Umma imeendelea kuboreka tofauti na kipindi cha nyuma. Amesema “unajua ndugu mwandishi kipindi hiki hata ukiingia katika baadhi ya ofisi za serikali unajisikia kuwa umeingia katika ofisi zinazotoa huduma kwa wananchi kiukweli hali imebadilika na kuwa bora”.

=30=

MIAKA 50 NI MAFANIKIO NA CHANGAMOTO

Mkuu wa Mkoa wa Iringa amewataka watanzania kuyatumia maadhimisho ya miaka 50 ya Uhuru wa Tanzania Bara kwa kutafakari mafanikio na changamoto kama taifa kwa kufanya ulinganifu na uchambuzi kupitia taasisi mbalimbali za kiserikali na zisizo za kiserikali nchini.

Kauli hiyo ameitoa nje ya banda la Mkoa wa Iringa, alipofanya ziara ya kujifunza mafanikio na changamoto za miaka 50 ya Uhuru katika viwanja vya maonesho ya maadhimisho ya miaka 50 ya uhuru wa Tanzania Bara vya Mwalimu Julius Nyerere.

Mkuu huyo  wa Mkoa wa Iringa, Dk. Christine Ishengoma amesema maadhimisho ya miaka 50 ya Uhuru ni maadhimisho maalumu, tofauti na sherehe za maadhimisho tulizozoea kufanya kutokana na uzito wa kimantiki kupitia madhumuni na kaulimbiu ya maadhimisho hayo isemayo “tumethubutu, tumeweza na tunazidi kusonga mbele”.

Amesema kwa upande wake anakubaliana kimsingi na hatua ya serikali ya kuamua kuhadhimisha maadhimisho hayo kwa kuzihusisha taasisi mbalimbali nchini katika viwanja vya Mwalimu Julius Nyerere ili kuwapatia wananchi fursa ya kujionea na kupata maelezo ya kina juu ya maendelea yaliyopatikana katika nyanja mbalimbali za kimaendeleo. Amesema, “zaidi ya wananchi hata watendaji wa serikali lazima wayatumie maadhimisho hayo kubadilishana uzoefu na mbinu za kukabiliana na changamoto katika baadhi ya maeneo ambayo taasisi nyingine zimefanya vizuri zaidi, na hii ndiyo maana ya maadhimisho yenyewe ya miaka 50 ya Uhuru wa Tanzania Bara”.

Akiongelea mafanikio ya miaka 50 ya Uhuru wa Tanzania Bara kwa Mkoa wake wa Iringa, Dk. Christine amesema kuwa kama Mkoa pamoja na mambo mengine, anajivunia kuongezeka kwa pato la Mkoa. Amesema, “ukirejea kipindi cha Uhuru, pato la Mkoa wa Iringa lilikuwa ni shilingi 5,693,000, wakati wastani wa pato la mkazi likiwa ni shilingi 103.  Katika mwaka 2010 pato la Mkoa wa Iringa liliongezeka hadi kufikia shilingi 1,702,430,000, wakati pato la mkazi nalo liliongezeka hadi kufikia shilingi 979,882”.

Amesema changamoto anayoiona kwa sasa ni kulitafsiri pato hilo kwa maana ya mkazi mmoja mmoja na jinsi linavyochangia katika kubadilisha maisha yake ya kila siku badala ya kuonekana katika ujumla wake. Akifafanua zaidi amesema kuwa sehemu kubwa ya pato la Mkoa wake huchangiwa na mashamba makubwa ya chai  na viwanda vya chai, misitu na viwanda vya mbao na tumbaku.

Ukiwa umesheheni wataalamu wa fani kadhaa, Mkoa wa Iringa unaokadiriwa kuwa na wakazi 1,764,285 pamoja na Halmashauri zake ni miongoni mwa taasisi za serikali zinazoshiriki katika maadhimisho hayo, ukiwa unashiriki kikamilifu katika kuonesha, kuchangia uzoefu wa mafanikio, changamoto na wadau mbalimbali nchini.

=30=

IDODI FIKIRIENI KILIMO CHA MTAMA

Mkuu wa Mkoa wa Iringa, Dk. Christine Ishengoma amewataka wananchi wa Tarafa ya Idodi kufikiria kilimo cha mazao yanayostahimili ukame ili kukabiliana na tatizo la njaa linalowakabili wananchi wa Tarafa hiyo mara kwa mara.

Dk. Ishengoma anayefanya ziara maalumu ya kuhamasisha shughuli za kilimo na elimu katika Mkoa wa Iringa, siku yake ya kwanza ya ziara aliyoifanya katika Kata ya Nzihi, Tungamalenga na Mahuninga amesisitiza kilimo cha zao la mtama pamoja na mazao mengine. Amesema “si lazima kulima mahindi na mpunga tu kama zao la chakula, bali tubadilishe kidogo fikra ili tuweze kulima mazao yanayostahimili ukame na tuanze na zao la mtama”.

Amesema pamoja na jitihada za Serikali ya Mkoa kuhimiza kilimo cha zao la mtama lakini mkulima mmoja mmoja ni vizuri akalima pia muhogo na viazi vitamu kwa kujihakikishia uhakika na hifadhi ya chakula.

Amesema kuwa matarajio ni kila kaya kulima angalau ekari mbili za mtama. Amesema kuwa Halmashauri ya Wilaya ya Iringa, itazigawa hizo mbegu bure kwa wakulima na kuwakumbusha wakulima kuwa wamebakiwa na kazi moja tu ya kulima baada ya kuondolewa gharama za kununua mbegu ya mtama. Vilevile, amesisitiza kuwa serikali itakuwa makini katika kuzigawa mbegu hizo kwa kuangalia eneo lililolimwa ili kuepukana na baadhi ya wakulima kuzitumia kwa matumizi mengine tofauti na makusudio yaliyokusudiwa na serikali.

Aidha, amewataka wananchi kujihusisha na ufugaji wa wanyama wadogo wadogo ili uweze kuwasidia katika kukidhi mahitaji ya kawaida ya nyumbani. Amesema “ufugaji wa wanyama wadogowadogo unasaidia sana hasa akina mama kuweza kukidhi mahitaji ya familia”.

Akiongelea ufugaji wa ng’ombe ameshauri kuwa yatumike madume bora ili kupata maziwa mengi. Vilevile ameshauri kutumia njia ya uhamilishaji ili kupunguza gharama za ufugaji wa madume mengi ya ng’ombe na uhifadhi wa mazingira.

Kuhusu elimu, Mkuu wa Mkoa ameagiza watoto wote watakaofaulu wapelekwe shule ili kukuza kuwango cha elimu katika Mkoa. Amesema “kila mmoja lazima aone fahari kumpeleka mwanae shule na hasa watoto wa kike ili kuachana na tamaduni za kale zilizokuwa zikimfanya mtoto wa kike kukosa elimu”.

=30=

RC AKEMEA UKATAJI MITI

Mkuu wa Mkoa wa Iringa ameagiza kuacha tabia ya kukata miti ovyo ili kuunusuru Mkoa na kugeuka jangwa kama baadhi ya maeneo ambayo yanakubwa na ukame wa mara kwa mara na kusababisha upungufu wa chakula.

Agizo hilo limetolewa na Mkuu wa Mkoa wa Iringa, Dk. Christine Ishengoma wakati akiongea na wananchi wa Kata ya Idodi iliyopo katika Halmashauri ya Wilaya ya Iringa alipofanya ziara ya kuhamasisha shughuli za kilimo na elimu.

Dk. Ishengoma amesema kuwa katika kipindi cha kuandaa mashamba wananchi wamekuwa na tabia ya kukata miti katika mashamba yao. Amesema “msikate miti yote sababu miti hii ndiyo inayotengeneza mvua hivyo, tukiendelea kukata miti hiyo ukame hautaisha bali utazidi kuongezeka katika eneo kubwa zaidi”.

Kutokana na ukame wa mara kwa mara unaosababisha upungufu wa chakula, Serikali imeweka mikakati ya kukabiliana na upungufu wa chakula ikiwa ni pamoja na kuanzisha kilimo cha mtama amesema Dk. Ishengoma.

Amesema ni vizuri wananchi wakabadili mawazo ya kutegemea mazao ya mahindi na mpunga pekee na kufikiria kilimo cha zao la mtama.

Akiongelea vocha za pembejeo za kilimo, amesema kuwa wananchi waliopata vocha hizo wazitumie vizuri ili kuweza kunufaika nazo na kufikiwa kwa malengo ya serikali ya kuwainua wananchi kiuchumi kupitia kilimo. Amesema wananchi wanawajibu wa kufahamu kuwa seti moja ya vocha za pembejeo inahusisha mbolea ya kupandia, mbegu bora na mbolea ya kukuzia.

Aidha, alitahadharisha kwa mawakala wasiowaaminifu kuwa lazima wafuate utaratibu uliowekwa katika usambazaji na matumizi ya vocha hizo na hatua kali zitachukuliwa dhidi ya wakala yeyote atakayekiuka utaratibu uliowekwa.

Mkuu wa Mkoa wa Iringa anafanya ziara ya kuhamasisha kilimo na elimu baada ya msimu wa kilimo kuanza wakati baadhi ya sehemu katika Tarafa ya Idodi ni miongoni mwa maeneo yaliyokubwa na ukame na kusababisha upungufu mkubwa wa chakula. 

=30=

MALENGAMAKALI WEKEZENI KATIKA ELIMU

Mkuu wa Mkoa wa Iringa amewataka wananchi wa kata ya Malengamakali kuwekeza katika elimu ya watoto wao ili iweze kuwasaidia kwa kujiletea maendeleo.

Wito huo umetolewa na Mkuu wa Mkoa wa Iringa, Dk. Christine Ishengoma wakati akiongea na wananchi wa kata ya Malengamakali iliyopo katika Jimbo la Ismani katika Halmashauri ya Wilaya ya Iringa.

Dk, Ishengoma amesema “kwa kuwa leo tumepata nafasi ya kukutana hapa napenda kuwaomba wazazi wote kuhakikisha watoto wote waliomaliza darasa la saba na kufaulu wanahimizwa kwenda sekondari”.  Amesema elimu ndiyo hazina pekee mzazi anayoweza kujivunia kwa mtoto wake hivyo ni lazima kuhakikisha watoto wote waliofaulu wanapelekwa sekondari.

Kwa upande wa kilimo Mkuu wa Mkoa amesema kuwa kutokana na sehemu kubwa ya Mkoa kukumbwa na upungufu wa chakula uliosababishwa na upungufu wa mvua ulioleteleza ukame, mkoa umeweka mkakati wa kilimo cha mazao yanayostahimili ukame. Amesama mkakati unaoendelea kwa sasa ni kilimo cha zao la mtama.

Amesema kwa sasa wananchi wa mkoa wa Iringa tunaimba wimbo mmoja nao ni kilimo cha mtama. “Tumekubaliana kilimo cha zao la mtama kwa sababu zao la mtama linavumilia ukame kutokana na upungufu wa mvua”.  Amesema “pamoja na shukrani tunazozitoa kwa Serikali ya Jamhuri ya Muungano kutupatia chakula cha njaa, lakini hatuwezi kukubali kama wanairinga huo ukawa utaratibu wetu wa kusaidiwa chakula cha njaa, lazima sisi wenyewe kukabiliana kwa pamoja na upungufu wa chakula kwa kulima mazao yanayovumilia ukame”.

=30=

WALIMU WA KUJITOLEA WASAIDIWE

Mkuu wa Mkoa wa Iringa amezishauri serikali za kata na vijiji kuangalia uwezekano wa kuwasaidia vijana wanaofanya kazi ya kufundisha kwa kujitolea baada ya kumaliza masomo yao.

Ushauri huo ameutoa Mkuu wa Mkoa wa Iringa, Dk. Christine Ishengoma wakati akiongea na wananchi wa kata ya Idunda iliyopo wilayani Mufindi.

Mkuu wa Mkoa alikuwa akijibu swali juu ya mpango wa serikali wa kuwaajiri vijana wanaojitolea kufundisha katika shule za msingi na sekondari  katika baadhi ya maeneo ya Wilaya ya Mufindi. Dk. Ishengoma amesema “ni kweli vijana hawa wanaokuwa wamemaliza kidato cha nne na sita na kujitolea kufundisha madarasa yaliyochini  yao wanamchango mkubwa katika kutoa mchango wao kwa kuwafundisha wananfunzi wa shule za msingi na sekondari”.

 Amesema kutokana na upungufu wa walimu uliopo katika baadhi ya maeneo ya Kata za Wilaya ya Mufindi, vijana hawa wanaojitolea wanasaidia kupunguza upungufu uliopo ila ni jukumu la serikali za vijiji na kata iangalie upungufu uliopo katika ikama za shule zao na kuweka mikakati ya kuwasaidia ili wanafunzi waweze hao wakati serikali inaendelea kuongeza idadi ya walimu katika shule zake.

Aidha, kuhusu kuwaajiri amesema kuwa serikali haina utaratibu wa kuwaajiri watumishi wasiopitia mafunzo na kupata utaalamu unaostahili katika fani husika. Mkuu wa Mkoa ameziagiza Hamlashauri pindi yanapotokea matangazo ya kozi mbalimbali yaweze kutawanywa katika Kata na vijiji ili vijana wengi waweze kuyasoma na kuomba kozi hizo.

Akiongelea changamoto inayoikabili shule ya sekondari ya Idunda sambamba na umbali wa wanafunzi kati ya nyumbani na shuleni, Dk. Ishengoma amewataka wananchi wa Kata hiyo kuanza ujenzi wa Daharia za wanafunzi kwa juhudi na kuahidi kuwachangia shilingi 1,000,000. 

=30=